O‘smirlar Olimpiadasi yakunlari. Eng ko‘p medalni O‘zbekiston qaysi sport turlarida qo‘lga kiritdi?

Kecha, 18 oktabr kuni Argentinaning Buenos-Ayres shahrida III yozgi o‘smirlar Olimpiya o‘yinlari yakunlandi. Bu safargi «kichik Olimpiada» o‘zbekistonlik sportchilar uchun muvaffaqiyatli o‘tdi, mamlakat medallar sifati bo‘yicha umumjamoa hisobida 206 mamlakat ichida 13-o‘rinni egalladi. Bu orqali O‘zbekiston sporti o‘smirlar Olimpiadasidagi o‘z natijasini yaxshiladi.

• Ma'lumot uchun, o‘zbekistonlik o‘smirlar 2010 yilgi Singapur olimpiadasida 2 ta kumush va 4 ta bronza bilan umumjamoa hisobida 62-o‘rinni, oradan to‘rt yil o‘tib Nankinda 2 ta oltin, 3 ta kumush va 3 ta bronza medallarini ko‘lga kiritgan holda 27-o‘rinni band etgan.

Bu galgi Olimpiadada qaysi sport turlari bo‘yicha musobaqalar O‘zbekiston delegatsiyasi vakillari uchun muvaffaqiyatli o‘tdi? Milliy olimpiya qo‘mitasi axborot xizmati shu haqda ba'zi ma'lumotlarni keltirib o‘tdi.

Buenos-Ayres Olimpiadasi ayniqsa o‘zbekistonlik og‘ir atletikachilar uchun muvaffaqiyatli kechdi. Federatsiya sportchilari Argentinadagi o‘yinlarga uchta litsenziya qo‘lga kiritishgandi. Yakunda musobaqada ishtirok etgan har uchchala sportchi ham medallarga sazovor bo‘ldi. Kumush Fayzullayeva, Muhammadqodir Toshtemirov va Dolera Davronovalar mos ravishda oltin, kumush va bronza medallari bilan qaytadigan bo‘lishdi. Qayd etish joiz, o‘zbekistonlik og‘ir atletikachilar shu kungacha o‘smirlar Olimpiya o‘yinlarida oltin medalga sazovor bo‘lmagandi.

Sport kurashlari bahslarida ham o‘zbek polvonlari juda yaxshi ishtirok eta olishdi: to‘rt sportchidan uch nafari sovrindorlar qatoridan o‘rin oldi. O‘zbekistonlik polvonlar delegatsiya hisobiga 3 ta medal (1 ta oltin, 1 ta kumush va 1 ta bronza) qo‘shib qo‘yishdi. Ayollar kurashi bahslarida qo‘lga kiritilgan medal O‘zbekiston uchun o‘smirlar Olimpiadasidagi dastlabkisi bo‘ldi: Shohida Abdullayevaning kumush medali O‘zbekiston sport kurashlari assotsiatsiyasi uchun tarixiy axamiyat kasb etdi. Kurashchilardan Umidjon Jalolov shohsupaning eng yuqori pog‘onasidan joy olgan bo‘lsa, delegatsiya bayroqdori Muhammadrasul Rahimov bronza medali sohibiga aylandi.

Eshkak eshish bo‘yicha bahslarda olti nafar sportchi O‘zbekiston sharafini himoya qildi. Baydarka va kanoeda eshkak eshishning yakkalik bahslarida mamlakat sportchilari ilk marta o‘smirlar Olimpiya o‘yinlarida medallarga sazovor bo‘lishdi. Sportning ushbu turida mos ravishda oltin va kumush medallarni qo‘lga kiritgan Gulbahor Fayziyeva va Islom Abdusalomov bildirilgan ishonchni oqlay oldi.

Boks – kompleks musobaqalarda O‘zbekiston uchun medal taqdim etadigan asosiy sport turi. Argentinaga to‘rt nafar charm qo‘lqop ustasi yo‘l olgan edi. Musobaqa yakunlariga ko‘ra, ularning uch nafari sovrindorlar qatoridan o‘rin ola bildi. Abdumalik Xalakov oltin medalga ega chiqqan bo‘lsa, Jahongir Rahmonov va Timur Merjanovlar delegatsiya jamg‘armasini bronza medallari bilan boyitdi.

E'tiborlisi, Abdumalik Xalakov oltin medalni qo‘lga kiritishi barobarida Bektemir Meliqo‘ziyevning natijasini takrorlay oldi. Endi unda ham Bektemir kabi yoshlar o‘rtasidagi jahon chempionati va o‘smirlar Olimpiadasining oltin medallari bor.

Dzyudo bo‘yicha O‘zbekiston terma jamoasi musobaqaga ikki sportchi bilan tashrif buyurgan edi. Yakunda ularning har ikkisi ham sovrindor bo‘la oldi. Jayhunbek Nazarov dzyudoning mikst yo‘nalishida oltin medalga sazovor bo‘lgan bo‘lsa, Nilufar Yermagambetova bronza sohibasi bo‘ldi.

Taekvondo bo‘yicha bahslarda Ulug‘bek Rashitov o‘zbekistonlik taekvondochi yigitlar ichida o‘smirlar Olimpiadasining kumush medalini qo‘lga kiritgan ilk sportchi bo‘ldi.

Karate bellashuvlarida qatnashgan Dildora Aliqulova guruh bahslarida mag‘lubiyatsiz qatnashib, yarim finalgacha yetib bora oldi. Final ostonasida esa yaponiyalik raqibga to‘qnash keldi. Karate vatani sanalgan kunchikar yurt vakiliga qarshi jangda Dildoraga biroz omad yetishmadi va u yakunda bronza bilan kifoyalandi.

Shuningdek, delegatsiya tarkibidagi eng yosh atlet, gimnastikaning mikst bahslarida ishtirok etgan Indira O‘lmasova (14 yosh) ham bronza medaliga sazovor bo‘ldi. 

O‘zbekiston vakillari yengil atletika bo‘yicha bellashuvlarda ham medallar qo‘lga kiritishga juda yaqin kelgandi. Ammo Roksana Xudoyarova (uchxatlab sakrash) va Regina Adashbayeva (bosqon uloqtirish)dan so‘nggi pallalarda omad yuz o‘girdi va ular to‘rtinchi o‘rin bilan kifoyalanishdi.

Xulosa qilib aytganda, Buenos-Ayres Olimpiadasida O‘zbekiston nomidan 37 nafar atlet sportning 16 turida bahslarda qatnashdi va yakunda 16 ta medalni (5 ta oltin, 4 ta kumush va 7 ta bronza) qo‘lga kiritdi. Mamlakat umumjamoa hisobida, yuqorida ta'kidlanganidek, 13-o‘rinni egalladi.

Quyida kichik Olimpiadada kumush va bronza medallariga sazovor bo‘lgan o‘zbekistonlik yosh atletlar bilan ham tanishishingiz mumkin. Suratlar muallifi - Anvar Ilyasov.