AIBA o‘z nizomiga o‘zgartish kiritish orqali XOQ bilan ziddiyatni yumshatishga urinadi

Shu yilning yanvaridan buyon Xalqaro Boks Assotsiatsiyasi prezidenti vazifasini bajaruvchi sifatida faoliyat yuritib kelayotgan o‘zbekistonlik G‘ofur Rahimov tashkilotning Moskvada bo‘lib o‘tayotgan Kongressida AIBA va Xalqaro Olimpiya Qo‘mitasi o‘rtasidagi ziddiyatni bartaraf etish chorasi haqida ma'lumot berdi.

Anjumanni kuzatib borayotgan Kun.uz muxbirining xabar qilishicha, o‘zbekistonlik sport funktsioneri AIBA Nizomiga kiritilishi kutilayotgan tuzatishlar natijasida tashkilot prezidenti zarur hollarda o‘z lavozimidan ma'lum vaqtga tanaffus olishi mumkin bo‘lishini ma'lum qilgan.

«Xalqaro Olimpiya Qo‘mitasi AIBA va boksning Olimpiadadagi o‘rniga nisbatan xavotir bilan qarayotganidan xabaringiz bor, deb o‘ylayman. Biz o‘z ustavimizga o‘zgartirish va qo‘shimchalar kiritish orqali tashkilot rahbarlari, shu jumladan prezident saylovi natijalari ortidan XOQda yuzaga kelishi mumkin bo‘lgan e'tirozlarga befarq emasligimizni bildirmoqchimiz.

Bugun ovozga qo‘yiladigan o‘zgartishlarga asosan shunday tizim joriy etiladiki, bu saylangan prezidentga – u kim bo‘lishidan qat'i nazar – zarur hollarda muayyan muddatga o‘z lavozimidan chetlashib turish imkonini beradi», - deya aytib aytgan Rahimov.

«Ushbu Kongress haqida to‘liq hisobot va unda qabul qilinadigan barcha qarorlarni noyabr oyi o‘rtasiga qadar XOQga yuborish bo‘yicha kelishuvga erishganmiz. Men sizlar tomoningizdan ma'qullangan o‘zgartirishlarni o‘z ichiga olgan hisobotni yaqin kunlarda [XOQga] topshirishni intiqlik bilan kutmoqdaman.

Shundan so‘ng Tokio, Parij, Los-Anjyeles va ulardan keyingi har qanday Olimpiya o‘yinlarida boks sport turi bilan barchasi joyida bo‘ladi», - deya ishonch bildirgan G‘ofur Rahimov.

Ma'lumot uchun, Xalqaro Olimpiya Qo‘mitasi «Magnitskiy ro‘yxati»ga kiritilgan G‘ofur Rahimov AIBA prezidenti etib saylangan taqdirda boksni olimpiya sport turlari tasnifidan chiqarish bilan tahdid qilib keladi.

Prezidentlikka nomzodlar ikki nafar bo‘lib, 20 yildan ortiqroq vaqt davomida AIBA`da yuqori rahbarlik lavozimlarida ishlab kelgan G‘ofur Rahimovdan tashqari tashkilot vitse-prezidenti, Osiyo Boks Konfederatsiyasi prezidenti qozog‘istonlik Serik Qo‘naqbayev ham da'vogarlik qilmoqda. Ertaga bo‘lib o‘tadigan saylov kelgusi to‘rt yilda jahon havaskor boksiga kim bosh rahbar bo‘lishiga oydinlik kiritadi.