Erkin iqtisodiy zonalar faoliyati muvofiqlashtiriladi va boshqarish tizimi yanada soddalashtiriladi - Prezident farmoni

O‘zbekiston Respublikasi Prezidentining “Erkin iqtisodiy zonalar faoliyatini muvofiqlashtirish va boshqarish tizimini yanada takomillashtirish chora-tadbirlari to‘g‘risida”gi farmoni imzolandi.

Hujjatda qayd etilishicha, erkin iqtisodiy zonalarni tashkil etish va faoliyat ko‘rsatish amaliyotini o‘rganish ularning samarali faoliyat yuritishiga to‘sqinlik qiluvchi tizimli muammolar va kamchiliklar mavjudligini ko‘rsatmoqda.

Ma'muriy kengashlar va erkin iqtisodiy zonalar direksiyalari faoliyatining yetarlicha samarali emasligi, shuningdek, transport va muhandislik-kommunikatsiya infratuzilmasining sust rivojlanganligi investitsiya loyihalarini jadal amalga oshirishga to‘sqinlik qilmoqda va erkin iqtisodiy zonalarning salohiyatli investorlar uchun jozibadorligini pasaytirmoqda.

Prezident farmoni bilan erkin iqtisodiy zonalar faoliyatini muvofiqlashtirish va boshqarish tizimini yanada soddalashtirish, investitsiyalar jalb qilish uchun sharoitlarni yaxshilash, investitsiya loyihalarini jadal amalga oshirishni ta'minlash, shu asosda yangi ish o‘rinlarini tashkil etish va aholi daromadlarini oshirish maqsadida quyidagilar belgilanmoqda:

• investitsiya loyihalarini amalga oshirish uchun yer maydonlari ajratish, tuman (shahar) hokimining yer maydonlarini ajratish to‘g‘risidagi alohida qarorisiz, ma'muriy kengashlarning investitsiya loyihalarini tanlash va amalga oshirish uchun erkin iqtisodiy zonalar hududida joylashtirish to‘g‘risidagi bayonnomalari bilan rasmiylashtiriladi;
• erkin iqtisodiy zonalar hududida investitsiya loyihalarini joylashtirishning sharti sifatida faoliyat boshlanganidan keyin ikkinchi moliyaviy yili yakunlariga ko‘ra ikki yil davomida yillik ishlab chiqarilgan mahsulotning 25 foizidan kam bo‘lmagan, keyingi yillarda 50 foizdan kam bo‘lmagan miqdorda eksport qilish belgilanadi. Mazkur shartlar bajarilmagan taqdirda, tadbirkorlik sub'yektining erkin iqtisodiy zonasi ishtirokchisi maqomi hamda avval taqdim etilgan imtiyozlar bekor qilinadi;
• erkin iqtisodiy zonalar hududida investitsiya loyihasini amalga oshirish bo‘yicha ma'muriy kengashlar tomonidan qarorlar biznes-rejalar va texnik-iqtisodiy asoslarga O‘zbekiston Respublikasi Prezidenti huzuridagi Loyiha boshqaruvi milliy agentligining “Loyihalar va import kontraktlarini kompleks ekspertiza qilish markazi” DUKning ijobiy xulosasi mavjud bo‘lgan taqdirda qabul qilinadi;
• Markazning amalga oshirilayotgan loyihalar biznes-rejalari yoki ularning texnik-iqtisodiy asosnomalari bo‘yicha xulosalar berish muddatlari 20 kalendar kunidan oshmasligi lozim;
• ma'muriy kengashlar tomonidan ishlab chiqarish loyihalarini erkin iqtisodiy zonalar hududida joylashtirish bo‘yicha investitsiya buyurtmanomalarini ko‘rib chiqish muddati Markaz tomonidan xulosa berish jarayoni bilan birga 30 kalendar kunidan oshmasligi lozim;
• erkin iqtisodiy zonalar ishtirokchilari tomonidan bojxona imtiyozlari qo‘llangan holda import qilingan tovarlarning bojxona rasmiylashtiruvi tovarlar ro‘yxatini har tomonlama ekspertizadan o‘tkazish natijalari bo‘yicha Markazning ijobiy xulosasi mavjud bo‘lgan taqdirda amalga oshiriladi;
• tovarlar ro‘yxatini har tomonlama ekspertizadan o‘tkazish bo‘yicha Markazning xulosa berish muddati 15 kalendar kunidan oshmasligi lozim;
• erkin iqtisodiy zonalar qatnashchilariga berilgan imtiyozlar faqat erkin iqtisodiy zonalar hududida ishlab chiqarilgan mahsulotlarga tatbiq etiladi;
• erkin iqtisodiy zonalarning bosh rejalari ma'muriy kengashlar tomonidan O‘zbekiston Respublikasi Qurilish vazirligi va Investitsiyalar bo‘yicha davlat qo‘mitasi bilan kelishilgan holda tasdiqlanadi;
• erkin iqtisodiy zonalar direksiyalarining direktorlarini tayinlash va lavozimidan ozod etish ma'muriy kengashlar tomonidan O‘zbekiston Respublikasi Vazirlar Mahkamasi bilan kelishilgan holda amalga oshiriladi;