Joriy yilda neft tankerlari egalari rekord sonda – 100 ta tankerni temir-tersakka jo‘natishdi. Bu haqda Clarkson Research Services Ltd ma'lumotlariga iqtibos keltirgan holda Bloomberg agentligi xabar berdi.
Tankerlarning sig‘imdorligi bo‘yicha bu ko‘rsatkich 1985 yildan beri maksimal hisoblanadi.
Clarkson Research Services dunyodagi eng yirik kemalar makleri Clarkson Plc kompaniyasining bir qismi hisoblanadi.
Joriy yil sentyabrga qadar tankerlar operatorlari olgan daromad oxirgi 30 yil ichidagi eng pasti bo‘lgani bilan ajralib turgan. Shu sababli tankerlar egalari ziyon keltirayotgan kemalardan voz kechishga qaror qilishgan.
Biroq kemalar egalari AQShning Eronga qarshi sanksiyalarining ikkinchi qismi kuchga kirishi hamda Rossiya va Saudiya Arabistoni neft qazib olish hajmini oshirishi sababli neft tashishga talab kuzda keskin ko‘tarilishini hisobga olishmagan.
Clarkson ma'lumotlariga ko‘ra, zarar keltirayotgan tankerlarni saqlab qolgan kompaniyalar uchun yuk tashish haqi sentyabrdan dekabr o‘rtasigacha 3 martadan ko‘proqqa oshgan.
Misol uchun, Shimoliy dengizda 600 ming barrel neft tashishga mo‘ljallangan tankerning fraxti (tashish uchun haq) 3,5 yillik maksimum qiymatgacha – 72 ming dollardan ko‘proqqa qimmatlashgan. 2 mln barrelgacha neft orta oladigan supertankerlar esa Yaqin Sharq davlatlaridan Xitoygacha bo‘lgan yo‘nalishda kuniga 58 ming dollar daromad olmoqda. Bu qiymat 2017 yil boshidan eng yuqori qiymat hisoblanadi.
