Vazirlar Mahkamasining “Orol dengizi tubidagi suvi qurigan hududlarda “yashil qoplamalar” - himoya o‘rmonzorlari barpo etishni jadallashtirish chora-tadbirlari to‘g‘risida”gi qarori qabul qilindi.
Qayd etilishicha, Orol dengizining suvi qurishi natijasida so‘nggi yillarda ekologik muhit va tabiiy muvozanat buzilib, iqlim salbiy tomonga o‘zgarib bormoqda. Ushbu hududlardan qum, tuz va changlarning havoga ko‘tarilishi va atrof-muhitga yog‘ilishi natijasida Orolbo‘yi mintaqasi hududida yashovchi aholiga, o‘simlik va hayvonot dunyosiga jiddiy zarar yetmoqda. Qishloq xo‘jaligi ekinlari, bog‘ va tokzorlar ekilgan yerlarda ikkilamchi sho‘rlanishlar kuchayib, hosildorlikka salbiy ta'sir qilmoqda.
Qaror bilan O‘zbekiston Respublikasi O‘rmon xo‘jaligi davlat qo‘mitasi, Moliya vazirligi, Iqtisodiyot va sanoat vazirligi, “O‘zbekneftgaz” aksiyadorlik jamiyati va Qoraqalpog‘iston Respublikasi Vazirlar Kengashining:
Orol dengizining suvi qurigan tubida "yashil qoplamalar” - himoya o‘rmonzorlari barpo etish;
“yashil qoplamalar" barpo etish uchun 2019 yil mobaynida "O‘zbeknefgaz” aksiyadorlik jamiyatining Moliya vazirligi huzuridagi Orolbo‘yi mintaqasini rivojlantirish jamg‘armasi oldidagi qarzdorligi hisobidan bosqichma-bosqich 100 mlrd so‘m miqdorida mablag‘ ajratilishi to‘g‘risidagi takliflariga rozilik berildi.
Orol dengizining suvi qurigan hududida 2019 yil bahor va kuz mavsumlarida “yashil qoplamalar" barpo etish hajmlari tasdiqlandi.
O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi, Qoraqalpog‘iston Respublikasi Vazirlar Kengashi va O‘rmon xo‘jaligi davlat qo‘mitasi “yashil qoplamalar” barpo etiladigan yer maydonlarini xatlovdan o‘tkazib. o‘rmon xo‘jaliklariga doimiy egalik qilish huquqi asosida ajratib berish choralarini ko‘radilar.
“Yashil qoplamalar" barpo etish uchun istisno tariqasida:
O‘zbekiston Respublikasi O‘rmon xo‘jaligi davlat qo‘mitasi tizimidagi o‘rmon xo‘jaligi organlari - buyurtmachi va pudratchi etib;
“O‘rmonloyiha” davlat unitar korxonasi - bosh loyihachi etib belgilandi.
O‘zbekiston Respublikasi O‘rmon xo‘jaligi davlat qo‘mitasi:
a) “yashil qoplamalar” barpo etiladigan hududlarni o‘rmon xo‘jaliklarining imkoniyatidan kelib chiqib biriktirilishini, "yashil qoplamalar” amalga oshiriladigan hududlarda ihota o‘rmonzorlari o‘z muddatida va sifatli barpo etilishi nazorat qilinishini ta'minlaydi;
