Kim haq: tadbirkormi yo hokimlik? - Buxoro markaziy bozoridagi to‘sib qo‘yilayotgan bir do‘kon mojarosi

Kun.uz tahririyatiga Buxoro shahridan tadbirkor Lola G‘aniyeva murojaat qilib, «Buxoro markaziy bozori» hududida o‘zi barpo etib ishlatayotgan savdo do‘konining bir tarafidagi darvoza ko‘chirilib, do‘konning ikki tashqi derazasi va eshigi to‘sib qo‘yilayotganini bildirdi.

Kun.uz murojaatni voqea joyiga borib o‘rgandi.

Ma'lum bo‘lishicha, Lola G‘aniyeva bu do‘konni 2007 yildan boshlab o‘z mablag‘lari hisobiga bunyod etishga kirishgan, hozirgacha oilasi bilan shu do‘konda tirikchilik qiladi, bir necha kishini ish bilan ta'minlagan.

U do‘kon uchun bozorga ijara haqi, soliqlarni va boshqa to‘lovlarni o‘z vaqtida to‘lab kelayotganini aytdi.

Do‘kon avtoturargohdan bozorga kiraverishda joylashgan bo‘lib, darvozaxonada ham eshik va deraza ochilgan. Do‘konning yana bir eshik-derazasi — bozor hududidan ochilgan.

Ayni paytda o‘sha darvoza berkitilib, kirish yo‘lagi o‘rnidan L.G‘aniyevaga tegishli do‘konga yopishtirilib, yangi do‘konlar barpo etilmoqda. Yangi darvoza esa biroz nariga ko‘chirilgan.

G‘aniyevaning kuyib-pishishiga sabab — uning do‘konining ikki derazasi va avvalgi darvozaxona o‘rnidagi eshigi berkilib qolayotganidir. Shuningdek, do‘konning yerto‘la qismiga tushadigan zina ham yopilib qolmoqda.

Murojaatchining ta'kidlashicha, O‘zbekiston Respublikasi Vazirlar Mahkamasining 2012 yil 12 avgustdagi №253-sonli «Bozorlar va savdo komplekslari faoliyatini tartibga solishga doir qo‘shimcha chora-tadbirlar to‘g‘risida»gi qarori bilan tasdiqlangan, O‘zbekiston Respublikasi bozorlarida savdo faoliyatini tashkil etish qoidalarining 13-bandiga ko‘ra, bozorlar hududida obektlarni joylashtirishning tasdiqlangan sxemasidan tashqari qo‘shimcha savdo o‘rinlarini tashkil etish taqiqlanadi.

Murojaatchiga ko‘ra, «Buxoro markaziy bozori» o‘zi yaqin yillarda yangidan barpo etilgan, endi esa uning sxemasi qoidalarga zid o‘laroq tadbirkorning manfaatlariga daxl qiladigan tarzda o‘zgartirilmoqda. Shuningdek, ShNQ 2.07.01-03* qoidalariga muvofiq, savdo do‘koni qurilishi uchun ajratiladigan tavsiya etilgan yer maydoni boshqa obektlardan belgilangan yong‘inga qarshi oraliq masofa saqlangan holda joylashtirilishi kerakligini ro‘kach qilishmoqda. Ammo avvaldan bu bozorda do‘konlarning barchasi bir-biriga jips holda qurilgan. Jumladan, G‘aniyevaga tegishli do‘konning chap tarafidagi do‘kon ham, undan oldingilari ham jipslashtirilib qurilgan.

L.G‘aniyeva yangidan barpo etilayotgan do‘konlar va o‘z do‘koni orasida hech bo‘lmaganda kamida 2 metr masofa qoldirilishini talab qilmoqda va tegishli idoralarga, jumladan, Kun.uz’ga ham murojaat qilgan.

Biz mazkur masala yuzasidan «Buxoro markaziy bozori» MChJ direktori Bobur Sobirov va Buxoro shahar hokimi Karim Kamolovdan izoh so‘radik.

K.Kamolov va B.Sobirovning tushuntirishicha, bozorga yondosh hudud homiylar hisobidan yaqindagina obodonlashtirilib, tekislab, asfaltlanib, yangidan ulkan avtomobillar turar joyi barpo etilgan.

Eski darvoza oldida avval hech qanday hujjatsiz, yengil konstruksiyadan muvaqqat do‘konlar ham barpo etilgan bo‘lgan. Ular buzdirilgan. Eski darvozadan kirilsa — bozor hududidagi inshootga duch kelish mumkin edi. Shuning uchun bozorga kiruvchi darvoza yangi loyiha bo‘yicha, yong‘in xavfining oldini olish va boshqa maqsadlarda transportlar kirib-chiqishi uchun qulay ko‘rinishga keltirildi va umumiy yo‘lakning to‘g‘risiga ko‘chirilmoqda. Yangi darvoza oldidan esa tadbirkorlarga qo‘shimcha uchta savdo do‘koni qurish uchun ruxsat berilgan. Buning uchun barcha hujjatlar tayyorlangan.

L.G‘aniyevaga tegishli do‘konning joylashuviga putur yetayotgani, uning deraza va eshiklari berkilib qolayotgani haqidagi savolimizga, shahar hokimi ushbu do‘konning avtoturargohga qaragan orqa qismidan ham eshik ochishga ruxsat berilishini aytib o‘tdi.

Shuhrat ShOKIRJONOV,
Kun.uz muxbiri.