Elektr energiyasi va gaz hisoblagichlarini qiyoslovdan o‘tkazish to‘g‘risidagi nizomlar tasdiqlanadi (batafsil)

Normativ-huquqiy hujjatlar loyihalari muhokamasi portalida Vazirlar Mahkamasining “Maishiy iste'molchilarning elektr energiyasini va gazni hisobga olish priborlarini davlat qiyoslovidan o‘tkazish tartibi to‘g‘risidagi Nizomlarni tasdiqlash haqida”gi qarori loyihasi joylashtirildi.

Maishiy iste'molchilarning elektr energiyasini hisobga olish priborlarini davlat qiyoslovidan o‘tkazish tartibi to‘g‘risidagi nizomga ko‘ra, iste'molchilar tomonidan foydalanilayotgan O‘zbekiston Respublikasi O‘lchov vositalari davlat reyestriga kiritilgan elektr energiyasini hisobga olish priborlari belgilangan tartibda davlat qiyoslovidan o‘tkazilishi shart.

Iste'molchilar tomonidan foydalanilayotgan elektr energiyasini hisobga olish priborlari:

davriy qiyoslovdan - elektr energiyasini hisobga olish priborlarini qiyoslashlararo interval muddati tugaganda;

navbatdan tashqari qiyoslovdan - elektr energiyasini hisobga olish priborlarining davlat qiyoslovidan o‘tkazilganligini tasdiqlovchi plombasi shikastlanganda yoki qayta sozlash ishlarini o‘tkazish zarurati vujudga kelganda;

ekspert qiyoslovdan - elektr energiyasini hisobga olish priborlarining sozligi yoki ularning qo‘llashga yaroqliligi, metrologik tavsiflari bo‘yicha munozarali savollar tug‘ilganda o‘tkaziladi.

Elektr energiyasini hisobga olish priborlarining qiyoslashlararo interval muddati 48 oyni tashkil qiladi.

O‘zbekiston Respublikasida elektr energiyasi va tabiiy gaz nazorati va hisobining avtomatlashtirilgan tizimini joriy etish loyihasi doirasida o‘rnatiladigan hisobga olish priborlarining davlat qiyoslovidan o‘tkazilishi «O‘zstandart» agentligi tomonidan xar 120 oyda amalga oshiriladi.

Elektr ta'minoti korxonasi o‘zining ma'lumotlar bazasi orqali har bir elektr energiyasini hisobga olish priborining qiyoslashlararo interval muddati o‘tishini kuzatib boradi va davriy qiyoslovdan o‘tkazishning o‘z vaqtida amalga oshirilishi uchun javobgar hisoblanadi.

Elektr energiyasini hisobga olish pribori ekspert qiyoslovdan tergovga qadar tekshiruvni amalga oshiruvchi organning mansabdor shaxsi, surishtiruv, tergov, prokuratura organlari yoxud sudning qaroriga (ajrimiga), asosan o‘tkazilishi mumkin.

Iste'molchining elektr energiyasini hisobga olish priborini yechib olish (demontaj qilish), davlat qiyoslovidan o‘tgan elektr energiyasini hisobga olish priborini iste'molchiga yetkazib berish, elektr energiyasini hisobga olish priborini joyiga o‘rnatish (montaj qilish) elektr ta'minoti korxonasining shtatdagi elektrotexnik xodimi tomonidan amalga oshiriladi.

Davlat qiyoslovidan o‘tkazish ishlari elektr energiyasini hisobga olish pribori yechib olingandan so‘ng 15 kun ichida yakunlanishi lozim.

Vakolatli xodim soat 8.00 dan 20.00 gacha iste'molchining elektr energiyasini hisobga olish priborini yechib olish va o‘rnatish uchun kelish huquqiga ega. Bunda vakolatli xodim o‘z xizmat guvohnomasini iste'molchiga ko‘rsatishi lozim.

Maishiy iste'molchilarning gazni hisobga olish priborlarini davlat qiyoslovidan o‘tkazish tartibi to‘g‘risidagi nizomga ko‘ra, O‘zbekiston Respublikasi O‘lchov vositalari davlat reyestriga kiritilgan gazni hisobga olish priborlari davlat qiyoslovidan o‘tkaziladi.

Iste'molchilar tomonidan foydalanilayotgan gazni hisobga olish priborlari:

davriy qiyoslovdan - gazni hisobga olish priborlarini davlat qiyoslovidan o‘tkazishning amal qilish muddati tugaganda;

navbatdan tashqari qiyoslovdan - gazni hisobga olish priborlarining davlat qiyoslovidan o‘tkazilganligini tasdiqlovchi plombasi shikastlanganda yoki qayta sozlash ishlarini o‘tkazish zarurati vujudga kelganda;

ekspert qiyoslovdan - gazni hisobga olish priborlarining sozligi yoki ularning qo‘llashga yaroqliligi, metrologik tavsiflari bo‘yicha munozarali savollar tug‘ilganda o‘tkaziladi.

Gazni hisobga olish priborlari quyidagi oraliqda davriy qiyoslovdan o‘tkaziladi:

Maishiy qo‘llanish uchun gazlar hajmiy sarfining hisoblagichlari, sarf o‘lchagichlari – 48 oy;

Tabiiy gaz nazorati va hisobining avtomatlashtirilgan tizimini joriy etish loyihasi doirasida o‘rnatiladigan zamonaviy gazni hisobga olish priborlari – 120 oy.

Foydalanilmagan gazni hisobga olish priborlarining davriy qiyoslovdan o‘tkazish muddatlari o‘tib ketgan taqdirda, ulardan belgilangan tartibda davlat qiyoslovidan o‘tkazilgandan so‘ng foydalanish mumkin.

Gazni hisobga olish priborlarini davlat qiyoslovidan o‘tkazish “O‘zstandart” agentligining davlat metrologiya xizmati organlari tomonidan amalga oshiriladi.

Tegishli hududdagi gaz ta'minoti tashkiloti gazni hisobga olish priborini davriy qiyoslovdan o‘tkazishning amal qilish muddati tugashidan o‘ttiz kun oldin iste'molchini gazni hisobga olish priborini davriy qiyoslovdan o‘tkazish zarurligi haqida yozma ravishda ogohlantiradi. Tegishli hududdagi gaz ta'minoti tashkiloti rahbari gazni hisobga olish priborini davriy qiyoslovdan o‘tkazish zarurligi haqida iste'molchilarning o‘z vaqtida ogohlantirilishi uchun mas'uldir.

Iste'molchi gazni hisobga olish priborini davlat qiyoslovidan o‘tkazish uchun uni yechishni so‘rab tegishli hududdagi gaz ta'minoti tashkilotiga ariza bilan murojaat qiladi.

Gazni hisobga olish priborlari ekspert qiyoslovdan o‘tkazish uchun tergovga qadar tekshiruvni amalga oshiruvchi organlar, surishtiruv, tergov, prokuratura organlari, yoxud sudning qarori yoki ajrimiga asosan yechib olinishi mumkin.

Gazni hisobga olish priborlarini davlat qiyoslovidan o‘tkazish uchun yechib olish tegishli hududdagi gaz ta'minoti tashkilotining xodimi tomonidan Majburiy ijro byurosining vakolatli xodimi va Iste'molchi ishtirokida amalga oshiriladi.

Tegishli hududdagi gaz ta'minoti tashkilotining xodimi, Majburiy ijro byurosining vakolatli xodimi bilan birga ariza berilgandan so‘ng, besh ish kuni ichida gazni hisobga olish priborini davlat qiyoslovidan o‘tkazish uchun iste'molchi ishtirokida yechib oladi.

Hujjatning to‘liq matni bilan ushbu havola orqali tanishish mumkin.