5-oktabr kuni eʼlon qilingan farmoyish «YuniKredit Bank» tarkibidan alohida kompaniya ajratib chiqarish hamda bankning UniCredit’ga tegishli 100 foiz aksiyasi bilan bitim tuzishga ruxsat beradi.
Hujjatda ushbu bitimlar uchun Rossiya qonunchiligida nazarda tutilgan boshqa ruxsat va kelishuvlarni olish talab etilmasligi belgilangan. Biroq ruxsat berilishi sotuv yakunlanganini anglatmaydi.
UniCredit 2026-yil 7-mayda Rossiyadagi faoliyatining bir qismini sotish boʻyicha dastlabki, majburiy kuchga ega boʻlmagan kelishuv imzolaganini maʼlum qilgan. Xaridor Birlashgan Arab Amirliklaridagi xususiy investor ekani aytilgan, ammo uning nomi oshkor etilmagan.
Guruhning rasmiy bayonotiga koʻra, Rossiyadagi bank faoliyatining bir qismi yangi yuridik shaxsga oʻtkaziladi. Yangi bankning barcha aksiyalari UniCredit’da qoladi, qolgan biznesni oʻz ichiga olgan bank esa xaridorga toʻliq sotiladi.
Italiya guruhi Rossiyadagi faoliyatini asosan xalqaro toʻlovlarga yoʻnaltirmoqchi. Bunda sanksiyalarga tushmagan Rossiya va Gʻarb korporativ mijozlarining, birinchi navbatda, yevro va AQSH dollaridagi operatsiyalariga xizmat koʻrsatish koʻzda tutilgan.
Kompaniya bitimni 2027-yilning birinchi yarmida yakunlashni rejalashtirgan. Buning uchun majburiy kuchga ega hujjatlarni imzolash, biznesni ajratish jarayonini amalga oshirish va tegishli regulyatorlar talablarini bajarish zarurligi qayd etilgan.
Avvalroq, 2025-yil mayida OAV BAAda roʻyxatdan oʻtgan Asas Capital, Mada Capital va Inweasta kompaniyalari UniCredit’ning Rossiyadagi biznesini sotib olishga qiziqish bildirgani haqida yozgan edi.
DW keltirgan maʼlumotlarga koʻra, Inweasta asoschisi Andrey Yelinson 2023-yilgacha «Alfa-grupp»ning investitsiya boʻlinmasi - A1’da boshqaruvchi hamkor boʻlgan. Biroq ushbu kompaniyalardan biri hozirgi bitim xaridori ekani tasdiqlanmagan.
UniCredit Rossiyaning 2022-yilda Ukrainaga keng koʻlamli hujumidan keyin ham mamlakatda faoliyatini davom ettirgan yirik Gʻarb banklaridan biri boʻlib qoldi. Yevropa regulyatorlari guruhdan Rossiyadagi ishtirokini qisqartirishni talab qilib kelgan.
Ayni paytda Rossiyada «doʻst boʻlmagan» davlatlar investorlariga tegishli bank aksiyalari bilan bitimlar uchun prezidentning maxsus ruxsati talab qilinishi sotuv jarayonini murakkablashtirgan. Putinning yangi farmoyishi UniCredit rejalashtirgan qayta tashkil etish va sotuv uchun shunday ruxsatni beradi.
