O‘zbekistonda «Ko‘p tarmoqli», «Idoraviy» va «Oliy maktab» ko‘rinishidagi kollejlar paydo bo‘ladi

Normativ-huquqiy hujjatlar loyihalari muhokamasi portalida “Kasb-hunar ta'lim tizimini yanada takomillashtirishga doir tashkiliy chora-tadbirlar to‘g‘risida”gi prezident qarori loyihasi joylashtirildi.

Hujjatga ko‘ra, O‘zbekiston Respublikasi Prezidentining 2018 yil 25 yanvardagi PF-5313-sonli farmoni bilan tashkil etilgan Kasb-hunar ta'limi tizimini yanada takomillashtirishni muvofiqlashtirish Respublika komissiyasi tomonidan quyidagilarni nazarda tutuvchi takliflari, ya'ni:

hududlarning ijtimoiy-iqtisodiy rivojlanish dasturlari asosida tadbirkorlik sohasi, shu jumladan, kichik biznes va xususiy tadbirkorlik sub'yektlari, hamda mahalliy mehnat bozori ehtiyojlariga asosan kadrlar tayyorlaydigan «Ko‘p tarmoqli» kasb-hunar kollejlari ro‘yxati;

iqtisodiyot tarmoqlarini kompleks rivojlantirish, xorijiy investitsiyalarni jalb qilish, strategik muhim ahamiyatga ega bo‘lgan loyihalar asosida yaratiladigan yangi ish o‘rinlarini malakali mutaxassislar bilan butlashga yo‘naltirilgan vazirliklar, idoralar, xo‘jalik birlashmalari va yirik korxonalar tasarrufida faoliyat ko‘rsatadigan «Idoraviy» kasb-hunar kollejlari ro‘yxati;

oliy ta'lim tizimi bilan integratsiyalashgan «Oliy maktab» ko‘rinishida faoliyat ko‘rsatadigan o‘rta maxsus, kasb-hunar ta'limi muassasalari ro‘yxati;

oliy ta'lim muassasalari faoliyatini kengaytirish, quvvatlarini oshirish, istiqbolda respublikamiz hududlarida xorijiy oliy ta'lim muassasalari va ularning filiallarini tashkil etish maqsadida foydalaniladigan kasb-hunar kollejlari ro‘yxati;

umumiy o‘rta ta'lim maktablari sifatida foydalaniladigan kasb-hunar kollejlari ro‘yxati;

bino va inshootlari vazirlik, idora va boshqa tashkilotlarga berilgan kasb-hunar kollejlarining faoliyati tugatilgan deb hisoblanib, ularning maxsus ustaxonalari va jihozlarining harakati ro‘yxati tasdiqlanishi mumkin.

O‘zbekiston Respublikasi Oliy va o‘rta maxsus ta'lim vazirligining Kasb-hunar ta'limi markazi, manfaatdor vazirlik va idoralar bilan birgalikda ikki oy muddatda kasb-hunar ta'lim muassasalarining yotoqxonalari, jihozlari, o‘quv adabiyotlaridan samarali foydalanish bo‘yicha Vazirlar Mahkamasiga taklif kiritadi.

Belgilanishicha:

a) «Ko‘p tarmoqli» kasb-hunar kollejlari:

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tasarrufida faoliyat ko‘rsatadi;

boshlang‘ich kasb-hunar ta'limi darajasida kunduzgi va kechki ta'lim shakllarida kadrlar tayyorlaydi, bunda tadbirkorlik, shu jumladan, kichik biznes, tomorqa biznes va xususiy tadbirkorlik sub'yektlari uchun bilim, malaka, ko‘nikma berish ustuvor vazifa hisoblanadi;

joriy saqlash, joriy faoliyatini amalga oshirish, moddiy-texnika bazasini mustahkamlash xarajatlari o‘quvchilarning to‘lov-kontrakt asosida tushadigan mablag‘lari hamda davlat budjeti mablag‘lari hisobidan ta'minlanadi;

kadrlar tayyorlash kasblar va mutaxassisliklarning murakkablik darajasidan kelib chiqqan holda 1 yilgacha bo‘lgan muddatda amalga oshiriladi;

yakuniy davlat attestatsiyasini muvaffaqiyatli topshirgan bitiruvchilarga davlat namunasidagi diplom va tegishli kasblar bo‘yicha belgilangan tartibda razryadlar beriladi;

direktorlari tegishli ravishda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan lavozimga tayinlanadi va ozod etiladi;

o‘quvchilar qabul qilish ko‘rsatkichlari Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan shakllantiriladi va Kasb-hunar ta'limi markazi tomonidan tasdiqlanadi.

b) «Idoraviy» kasb-hunar kollejlari:

vazirliklar, idoralar, xo‘jalik birlashmalari, klasterlar va yirik korxonalar tasarrufida faoliyat ko‘rsatadi;

o‘rta kasb-hunar ta'limi darajasida kunduzgi, kechki va sirtqi ta'lim shakllarida, vazirliklar, idoralar, xo‘jalik birlashmalar va yirik korxonalarning o‘z ehtiyojlari, yuridik va jismoniy shaxslarning buyurtmalari asosida shakllantirilgan buyurtmalar portfeli bo‘yicha kadrlar tayyorlash yo‘lga qo‘yiladi;

vazirliklar, idoralar, xo‘jalik birlashmalari, klasterlar, yirik korxonalar va boshqa ish beruvchilarning budjetdan tashqari mablag‘lari va o‘quvchilarning to‘lov-kontrakt asosida tushadigan mablag‘lari hisobidan faoliyat yuritadi;

kadrlar tayyorlash kasblar va mutaxassisliklarning murakkabligidan kelib chiqqan holda 2 yilgacha muddatda amalga oshiriladi;

yakuniy davlat attestatsiyasini muvaffaqiyatli topshirgan bitiruvchilarga davlat namunasidagi diplom va tegishli kasblar bo‘yicha belgilangan tartibda razryadlar beriladi;

tegishli vazirliklar, idoralar, xo‘jalik birlashmalari, klasterlar, yirik korxonalar rahbarlari tomonidan kollej direktorlari lavozimga tayinlanadi va ozod etiladi;

tayyorlov yo‘nalishlari, o‘quvchilar qabul qilish ko‘rsatkichlari vazirliklar, idoralar, xo‘jalik birlashmalari, klasterlar, yirik korxonalar tomonidan Kasb-hunar ta'limi markazi bilan kelishilgan holda tasdiqlanadi.

v) “Oliy maktablar”:

idoraviy mansubligi bo‘yicha O‘zbekiston Respublikasi Oliy va o‘rta maxsus ta'lim vazirligi va boshqa vazirliklar hamda idoralar tasarrufida faoliyat ko‘rsatadi;

o‘rta maxsus, kasb-hunar ta'limi darajasida kunduzgi, kechki va sirtqi ta'lim shakllarida kadrlar tayyorlaydi, bunda mutaxassisliklar oliy ta'lim tizimi mutaxassisliklari bilan integratsiyalashgan ta'lim dasturlari amaliyotga joriy etiladi;

bino va inshootlarining kommunal xizmat va joriy ta'mirlash xarajatlarining manbasi etib - davlat budjeti, faoliyatini moliyalashtirishning asosiy manbalari etib - vazirlik, idoralar, yirik ish beruvchi buyurtmachilarning budjetdan tashqari mablag‘lari va o‘quvchilarning to‘lov-kontrakt asosida tushadigan mablag‘lari hisoblanadi;

o‘rta maxsus, kasb-hunar ta'limi darajasida kadrlar tayyorlash kamida 2 yil muddatda amalga oshiriladi;

yakuniy davlat attestatsiyasini muvaffaqiyatli topshirgan bitiruvchilarga davlat namunasidagi diplom va tegishli kasblar bo‘yicha belgilangan tartibda razryadlar beriladi;

idoraviy mansubligi bo‘yicha O‘zbekiston Respublikasi Oliy va o‘rta maxsus ta'lim vazirligi va boshqa vazirliklar hamda idoralar tomonidan oliy maktablar direktorlari lavozimga tayinlanadi va ozod etiladi;

o‘quvchilarni qabul qilish ko‘rsatkichlari vazirlik va idoralar tomonidan Kasb-hunar ta'limi markazi bilan kelishilgan holda tasdiqlanadi.

Davlat buyurtmalari asosida o‘rta bo‘g‘in mutaxassislari tayyorlanadigan kasb-hunar kollejlari (mutaxassisliklar va kasblar bo‘yicha) Vazirlar Mahkamasi tomonidan belgilanadi.

Boshlang‘ich, o‘rta va o‘rta maxsus, kasb-hunar ta'limi darajasida kadrlar tayyorlaydigan ta'lim muassasalarda idoraviy mansubligidan qat'iy nazar metodik rahbarlik qilish hamda kasb-hunar ta'limi sohasida davlat siyosatini yuritish vazifasi Kasb-hunar ta'limi markaziga yuklanadi.

Kasb-hunar ta'limi muassasalariga o‘zlariga belgilangan asosiy ta'lim darajalaridan quyi pog‘onadagi kasb-hunar ta'lim darajalari bo‘yicha kadrlar tayyorlash huquqi beriladi.