Estoniya Rossiyaning ehtimoliy bosqinidan himoyalanishga hozirlik koʻrib, elita qoʻshinlarini Rossiya chegarasiga yaqinroq koʻchirmoqda va uzoq masofaga zarba beruvchi qurollarni xarid qilmoqda. Bu haqda Financial Times xabar berdi.

Estoniya qurolli kuchlari va razvedkasi rahbariyati Moskva NATO bilan - hech boʻlmaganda yaqin ikki yil ichida - keng koʻlamli urush olib borishga intilmoqda deb hisoblamaydi, biroq Rossiya kelgusida yuz berishi mumkin boʻlgan toʻqnashuvga tayyorgarlik koʻrmoqda degan fikrda.

«Tiyib turish mexanizmi ish bermayapti. Ushbu muammoni hal qilish uchun oʻta muhim pallaga kelyapmiz - bu ham biz uchun, ham barcha Boltiqboʻyi mamlakatlari uchun yaqin bir-toʻrt yil ichida boshlanadi», - dedi Estoniya harbiy razvedkasining yuqori martabali vakili.

Estoniyaning asosiy harbiy bazasi boʻlgan Tapadan saralangan qismlar hozir doimiy asosda sharqroqdagi - Rossiya chegarasiga yaqinroq joylashgan pozitsiyalarga koʻchirilmoqda.

Yixvidagi yangi bazadan tashqari, Narvaning oʻzida ham 1000 nafargacha harbiy xizmatchini joylashtirishga moʻljallangan baza bunyod etilmoqda: u 200 askarning doimiy turishi uchun moʻljallangan, biroq inqirozli vaziyat yuz berganda yana 800 kishini oʻz bagʻriga sigʻdira oladi.

Shuningdek, soʻnggi bir yil ichida Estoniya Amerikaning 300 km masofaga parvoz qiluvchi M57 ballistik raketalarini oʻz ichiga olgan toʻqqizta HIMARS yoppasiga oʻt ochish reaktiv tizimini hamda xuddi shunday masofaga ucha oladigan Janubiy Koreyaning toʻqqizta Chunmoo tizimini xarid qilish boʻyicha shartnoma imzoladi. Bunda Tapadan Sankt-Peterburgacha boʻlgan masofa 260 km ni tashkil etadi.

FT nashrining yozishicha, avvalroq Estoniya harbiy rejalashtiruvchilari mamlakatning tarixiy va geografik xususiyatlarini hisobga olgan mudofaa doktrinasini ishlab chiqqan edi. Ushbu strategiyaga koʻra, Rossiya bostirib kirgan taqdirda, chaqiruv boʻyicha toʻplangan qoʻshinlar tezkor safarbarlik oʻtkazib, NATO qoʻshimcha kuchlari yetib kelguniga qadar partizanlik urushini olib borishi va dushman kuchlarini holdan toydirishi lozim.

Biroq Rossiyaning Ukrainadagi xatti-harakatlarini tahlil qilgan Estoniya harbiy rahbariyati bunday reja naf bermaydi degan xulosaga keldi. Endi ular Kreml yoʻqotishlar bilan hisoblashmaydi degan fikrda. Estoniyada, shuningdek, rossiyalik harbiylar marralarni egallab olgach, ularni qaytarib bermasdan, hatto hududdagi barcha narsa yer bilan yakson qilingan boʻlsa ham, uni oʻz nazoratida ushlab turishda davom etayotganiga eʼtibor qaratildi.