Adliya vazirligining Apellyatsiya kengashi qanday masalalarni ko‘rib chiqishi ma'lum bo‘ldi

Normativ-huquqiy hujjatlar loyihalari muhokamasi portalida Vazirlar Mahkamasining “O‘zbekiston Respublikasi Adliya vazirligining Apellyatsiya kengashi to‘g‘risida nizomni tasdiqlash to‘g‘risida”gi qarori loyihasi joylashtirildi.

O‘zbekiston Respublikasi Adliya vazirligining Apellyatsiya kengashi to‘g‘risidagi nizomga ko‘ra, Apellyatsiya kengashi:

a) O‘zbekiston Respublikasi Adliya vazirligi huzuridagi Intellektual mulk agentligining talabnomada ko‘rsatilgan:

sanoat mulki obektlari;

seleksiya yutuqlari;

integral mikrosxemalar topologiyalari;

tovar belgilari, xizmat ko‘rsatish belgilari va tovar kelib chiqqan joy nomlariga nisbatan qabul qilingan qarorlari yuzasidan apellyatsiyalarni ko‘rib chiqadi;

b) manfaatdor yuridik va jismoniy shaxslarning:

sanoat mulki obektlariga patent berilishiga;

seleksiya yutuqlariga patent berilishiga;

integral mikrosxemalar topologiyalarining ro‘yxatdan o‘tkazilishiga;

sanoat mulki obektlariga va seleksiya yutuqlariga berilgan patentlarning haqiqiyligiga;

tovar belgisi va xizmat ko‘rsatish belgisi, tovarning kelib chiqqan joy nomidan foydalanish huquqi to‘g‘risidagi berilgan guvohnomaning haqiqiyligiga;

O‘zbekiston Respublikasi hududida belgining xalqaro ro‘yxatdan o‘tkazilishining amal qilishiga qarshi apellyatsiyalarini ko‘rib chiqadi;

v) quyidagilarning:

integral mikrosxemalar topologiyalarini ro‘yxatdan o‘tkazish to‘g‘risidagi guvohnomalarning;

tovar belgilari, xizmat ko‘rsatish belgilariga berilgan, tovar kelib chiqqan joy nomlaridan foydalanish huquqiga berilgan guvohnomalarning amal qilishi tugatilishi yuzasidan apellyatsiyalarini ko‘rib chiqadi;

g) tovar kelib chiqqan joy nomi ro‘yxatdan o‘tkazilishi bekor qilinishi yuzasidan apellyatsiyalarini ko‘rib chiqadi;

Apellyatsiya kengashi O‘zbekiston Respublikasida hammaga ma'lum tovar belgilari deb e'tirof etish to‘g‘risidagi arizani ko‘rib chiqadi. 

Apellyatsiya kengashi apellyatsiya yoki ariza ko‘rib chiqishda quyidagi huquqlarga ega:

apellyatsiya yoki ariza bergan shaxslardan, shuningdek boshqa manfaatdor shaxslardan apellyatsiyani yoki arizani ko‘rib chiqish uchun zarur bo‘lgan qo‘shimcha materiallar va ma'lumotlarni so‘rab olish;

qo‘shimcha ekspertiza tayinlash, uni o‘tkazish uchun mustaqil ekspert
va maslahatchilarni jalb etish;

Agentlik ixtiyoridagi patent hujjatlari va ilmiy-texnika adabiyotlari davlat fondlaridan foydalanish.

Apellyatsiya kengashining majburiyatlari quyidagilardan iborat:

o‘z faoliyatida qonunchilikka va mazkur Nizom talablariga qat'iy rioya qilish;

qabul qilingan qarorlarning haqqoniyligi va asoslanganligini ta'minlash.

Apellyatsiya kengashi Kengash raisi, uning o‘rinbosari, kengash a'zolari va kotibidan iborat tarkibda faoliyat ko‘rsatadi.

O‘zbekiston Respublikasi Adliya vaziri o‘rinbosari Apellyatsiya kengashi raisi hisoblanadi. Apellyatsiya kengashi tarkibiga O‘zbekiston Respublikasi Adliya vazirligi va Agentlikning malakali va tajribali xodimlari, shuningdek mustaqil olimlar va mutaxassislar kiradi.

Apellyatsiya kengashi tarkibidagi Adliya vazirligi va Agentlikning xodimlari soni Apellyatsiya kengashi umumiy a'zolari sonining o‘ttiz foizdan oshmasligi lozim.

Apellyatsiya kengashining shaxsiy va son tarkibi O‘zbekiston Respublikasi Adliya vaziri buyrug‘i bilan tasdiqlanadi.

Apellyatsiya kengashi raisi, uning topshirig‘iga ko‘ra esa – uning o‘rinbosari Apellyatsiya kengashining faoliyatini tashkil etadi.

Apellyatsiya kengashida ishlar kengash kotibi tomonidan yuritiladi. Apellyatsiya kengashi kotibi Apellyatsiya kengashi tomonidan qarorlar qabul qilishda ovoz berish huquqiga ega emas.