O‘zbekistonlik yosh shaxmatchilar jahon chempionatida 5ta medalni qo‘lga kiritishdi

Turkiyaning Antalya shahrida bo‘lib o‘tgan shaxmat bo‘yicha maktab o‘quvchilari o‘rtasida jahon chempionatida O‘zbekiston terma jamoasi 3 ta oltin, 1 ta kumush va 1 ta bronza medalni qo‘lga kiritdi.

O‘zbekiston terma jamoasi hisobiga oltin medallarni Nodirbek Yoqubboyev (17 yoshgacha yigitlar), Javohir Sindarov (15 yoshgacha o‘smirlar) va Humoyun Begmuratov (9 yoshgacha bolalar) taqdim etishdi. Kumush medalini Shamsiddin Vohidov (17 yoshgacha yigitlar) va bronza medalini esa 13 yoshgacha qizlar musobaqasida Umida Omonova qo‘lga kiritdi.

Umumjamoa hisobida Mo‘g‘uliston va Qozog‘iston kabi 3 ta oltinga egalik qilgan O‘zbekiston terma jamoasi kumush medallar soni bo‘yicha ulardan ortda qoldi va 3-o‘rinni egalladi.

Mazkur musobaqada 33 mamlakatdan 392 nafar shaxmatchi qatnashdi. Turkiya terma jamoasi eng ko‘p – 125 kishilik tarkib bilan qatnashgan bo‘lsa, Qozog‘istondan 64 nafar, Ozarbayjondan 29, Angliyadan 27, Mo‘g‘ulistondan 23 nafar yosh shaxmatchilar ishtirok etdi. Umumjamoa hisobida uchinchi o‘rinni egallagan O‘zbekiston terma jamoasi esa 10 kishilik tarkib bilan qatnashdi.

Kecha, Islom Karimov nomli Toshkent Xalqaro aeroportida shaxmatchilarimiz tantanali kutib olindi.