Kompanidan «oltin zarba» va «Siti»da oxirgi qadam. Oxirgi tur arafasida vaziyat qanday?
|16:30 / 07.05.201917 21612 min
«Manchester Siti» APLning 37-turida qiyinchilik bilan «Lester»ni mag‘lub etdi (1:0) va premer-liga turnir jadvalida yana «Liverpul»ni quvib o‘tdi. Endi barchasi shu hafta oxiridagi yakshanbada, mavsumning oxirgi o‘yinlarida hal bo‘ladi.
Futbol karikaturachilari uchun «Manchester Siti» va «Liverpul»ning «mushuk-sichqon o‘yini» ko‘plab g‘oyalar uchun ilhom berib kelmoqda. Angliya chempionatining har bir turi oldidan yangi karikaturalar paydo bo‘ladi. «Siti»ning «Lester»ga qarshi o‘yini arafasida rassomlardan biri Yurgen Kloppni «shaharliklar»ning navbatdagi raqibi futbolkasida tasvirladi. Uning oldida esa «Siti»ning oldingi raqiblari - «MYu», «Tottenhem», «Kristal Pelas» va «Byornli» futbolkalari chiqindi idishiga irg‘itilgan holatda ko‘rsatilgan (bu jamoalarning hech biri mersisaydliklar jamoasi umidlarini oqlay olmadi va «Siti» bu jamoalarga qarshi o‘yinlarda ochko yo‘qotmadi).
Pep Gvardiola o‘yindan oldin «Liverpul» o‘z faoliyati davomida to‘qnashgan eng kuchli ikki raqibdan biri ekanini tan oldi. Ikkinchisi – «Bavariya»ni Chempionlar ligasidan chiqarib yuborgan Luis Enrike boshqaruvidagi «Barselona».
Bugungi «Liverpul» haqiqatdan ham buyuk jamoaga aylandi - jamg‘arilgan ochkolarning o‘zi buni tasdiqlaydi. Besh yil muqaddam ham qizillar chempionlik uchun oxirigacha kurashgan va «Siti» bilan bir qatorda asosiy favorit bo‘lgandi. Lekin o‘shanda oxirgi turlardan birida «Chelsi»ga qarshi o‘yinda Stiven Jyerrardning yiqilib to‘p yo‘qotishi oqibatida jamoa raqibni oldinga o‘tkazib yuborgan, yakunda «Manchester Siti» chempionlikni nishonlagandi.
Mavzuga oid
O‘shanda «Liverpul»ga Brendan Rojyers ustozlik qilgandi. Ushbu shimoliy irlandiyalik mutaxassisning «Enfild»ga mehri bo‘lakcha. Fevral oyida Rojyers «Lester»ni qabul qilib oldi va og‘ir ahvoldagi jamoani Yevropa Ligasi uchun kurashayotgan jamoaga aylantirdi. Endi sobiq jamoasi fanatlari undan «Siti»ga qarshi muhim o‘yinda matonat ko‘rsatishni kutishayotgandi. Murabbiy esa o‘yin arafasida bergan intervyusida shunday dedi: «Men bor diqqat-eʼtiborimni «Lester»ga qaratganman. Ha, bu hayajonli, biz chempionlik taqdiriga ta'sir ko‘rsatishimiz mumkin, ammo men hozir faqat hozirgi klubim haqida o‘ylamoqdaman».
«Tulkilar»ga chindan ham ochko kerak edi, jamoada Yevropa Ligasiga yo‘llanma olish uchun minimal imkoniyatlar saqlanib qolgan, buning uchun jamoa oxirgi turlarda «Manchester Siti» va «Chelsi»ni mag‘lub etishi kerak edi.
«Lester» «Etihad»da mardonavor kurashdi. Raqib naqadar kuchli bo‘lmasin, ular bu maydonda zarracha qo‘rquv his qilishmadi. Birinchi bo‘lim davomida Tilimansda va Rikardu Pereyrada gol urish uchun qulay imkoniyatlar bo‘ldi. Tilemansning zarbasi biroz xato ketdi, Pereyraning zarbasini esa Kompani to‘sib qoldi.
«Siti» maydonda faolroq bo‘ldi va gol urish uchun eng yaxshi imkoniyat mezbonlarda yuzaga keldi: Aguero to‘pni kuch bilan darvoza sari yo‘llaganida to‘p to‘singa tegib pastga sho‘ng‘idi, ammo Kasper Shmeyxel uni darvoza chizig‘idan o‘tmasidan qaytarib yubordi - o‘yin hakami Mayk Dinning qo‘lidagi soatda gol bo‘lmagani ko‘rsatildi. O‘tgan turda argentinalik futbolchi «Byornli»ga xuddi shunday holatda gol urgan, o‘shanda hakamning qo‘lidagi soat to‘p darvoza chizig‘ini kesib o‘tganini ko‘rsatgandi.
Ohhh what a chance but Goal-line technology keeping Sergio Aguero and Man City out against Leicester.
Man City 0- 0 Leicester #MCILEIpic.twitter.com/FWRuh7nKmr
Ikkinchi bo‘limni ham jamoalar faollik bilan boshlashdi - Gundo‘g‘an va Meddisonda qulay imkoniyatlar bo‘ldi, ularning ikkisiga ham biroz aniqlik yetishmadi. «Lester» xotirjamlik bilan himoyalanishda davom etdi.
Gvardiola 56-daqiqadayoq zaxiradan foydalanishga qaror qildi, Foden o‘rniga Sane maydonga tashlandi. Shundan keyin «Siti» markazdan ham, qanotlardan ham hujum uyushtira boshladi, tank kabi bosim uyushtirdi. 69-daqiqada Aguero bir amallab raqib jarima maydoniga yorib kirdi va zarba berdi, Shmeyxel yana qutqardi.
70-daqiqada esa mezbonlarning ko‘p yillik sardori Kompani 35 metr masofadan Shmeyxel qo‘riqlayotgan darvozaning «to‘qqizligi»ni aniq nishonga oldi. Fantastika! Bu keyingi yillarda jarohatlar tufayli asosiy tarkibdan tushib qolgan belgiyalik himoyachining muhim pallada katta sahnaga chiqishi bo‘ldi.
E'tiborli jihati, u to‘p bilan oldinga intilayotganida barcha jamoadoshlari Kompanini zarba berishdan qaytarishdi. Ulardan biri Aguero o‘yindan keyin kulimsirab tan oldi: «Men senga qarab, qichqirdim: Tepma! Yo‘q, Vinni, yo‘q!».
«Barcha «tepma» deya baqirdi, ammo men shu vaqtgacha tepish uchun qulay vaziyat bo‘lib turganida boshqalarning tepmaslik haqidagi gaplariga quloq solmaganman. Gap gollar sonidamas, o‘z vaqtida urilganida. Bugun ham ayni vaqti ekanini his qilib turardim», – deya belgiyalik futbolchining so‘zlarini keltirdi Independent.
Sky Spors esa Kompanidan boshqa bir iqtibos keltirdi: «Men mashg‘ulotlar vaqtida bunday gollarni ko‘p uraman! Men 15 yildan buyon top-darajada to‘p suraman, yarimhimoyachilar esa menga deyishadi: «Tepma, qanotga uzat». Ularga uzatganimda xato qilishganida esa men deyman: «Va'da beraman, qachondir men jarima maydoni tashqarisidan zarba yo‘llab gol uraman va siz bundan juda ham xursand bo‘lasiz».
Qayd etish kerakki, jamoadoshlarida uni zarba yo‘llashdan qaytarishga yetarli asoslar bo‘lgan: bu himoyachining mavsumdagi ilk goli bo‘ldi. U oxirgi marta 2018 yilning 7 aprelida premer-liga doirasida «MYu»ga qarshi o‘yinda gol urgandi. Bu gol Kompanining «shaharliklar» safidagi 20-goli edi, holbuki u bu jamoada 11-mavsumini o‘tkazmoqda. Qolaversa, bu gol uning «Man Siti» safida jarima maydoni tashqarisidan urgan ilk golidir - bu esa jamoadoshlari Vensanni zarba berishdan to‘xtatishga urinishining asosiy sababidir. Bu gol jamoa uchun mavsumdagi 100-gol bo‘ldi va bu APL rekordidir.
Kompanining goli trendga chiqib, tvitterda Britaniya taxti uchun yana bir valiahd - shahzoda Harrining o‘g‘li tug‘ilgani haqidagi muhokamalarni ortda qoldirdi. To‘g‘ri, Angliyada chempionlik poygasi qirollik xonadonidagi yana bir chaqaloqdan muhimroq bo‘lib ulgurgan. Jamoaning shu darajaga yetishida beqiyos xizmat ko‘rsatgan faxriy futbolchining bu goli «oltin gol»ga aylanishi mumkin - bunda ham ramziy ma'no bor.
O‘yinning qolgan qismida manchesterliklar to‘pni nazorat qila boshlashdi va ehtiyotkorlik bilan harakatlanishdi.
«Lester» mag‘lubiyatdan qutulib qolishi va «Liverpul»ga yordam qo‘lini cho‘zishi mumkin edi. Ammo o‘yinga 80-daqiqada zaxiradan qo‘shilgan «Siti»ning sobiq hujumchisi Ixenacho 87-daqiqada yakkama-yakka vaziyatda gol urmay, sobiq jamoasiga «yordam berib yubordi».
«Siti» oxirgi tur arafasida yana qizillardan o‘zib ketdi va sovrin uchun katta qadam tashladi. Jamoa oxirgi turda g‘alaba qozonsa - chempion bo‘ladi, «Liverpul»ning vaziyati esa og‘irroq.
Hal qiluvchi tur oldidan:
1. «Manchester Siti» – 37 o‘yin, 95 ochko.
Raqib – «Brayton», 17-o‘rin, 37 ochko. «Siti» bu jamoaga qarshi so‘nggi 4 o‘yinida 4 bor g‘alabaga erishgan. Bu haftada boshqa o‘yini yo‘q. Jarohat olgan yetakchilari: De Bryuyne, Fernandino.
2. «Liverpul» – 37 o‘yin, 94 ochko.
Raqib – «Vulverhempton», 7-o‘rin, 57 ochko. «Liverpul» bu jamoaga qarshi so‘nggi 3 o‘yinida atigi 1 bor g‘alabaga erishgan. Hafta davomida boshqa o‘yini ham bor – YeChL yarimfinalida «Barselona»ga qarshi javob o‘yini. Jarohat olgan yetakchilari: Saloh, Firmino.
«Siti» – chempion, agar...
• oxirgi turda «Brayton»ni yengsa;
• oxirgi turda «Brayton»ga 3tadan ortiq gol farqi bilan yutqazmasa va «Liverpul» durang o‘ynasa;
• oxirgi turda «Braytonu» 4tagacha gol farqi bilan yutqazsa, «Liverpul» esa – 0:0, 1:1, 2:2 yoki 3:3 hisoblarida durang o‘ynasa;
«Liverpul» – chempion, agar...
• Oxirgi turda «Vulverhempton»ni yengsa, «Siti» esa «Brayton»ga mag‘lub bo‘lsa;
• oxirgi turda «Vulverhempton»ni yengsa, «Siti» esa «Brayton» bilan durang o‘ynasa;
• «Vulverhempton» bilan durang o‘ynasa, «Siti» esa «Brayton»ga 5 yoki undan ko‘p gol farqi bilan yutqazsa.
«Man Siti» va «Liverpul» o‘rtasida Oltin o‘yin o‘tkaziladi, agar...
• «Liverpul» «Vulverhempton» bilan durang o‘ynasa, «Siti» «Brayton»ga 4ta gol farqi bilan yutqazsa va jamoalarda gollar nisbati bir xil bo‘lsa.
