«Manchester Siti» APLning 37-turida qiyinchilik bilan «Lester»ni mag‘lub etdi (1:0) va premer-liga turnir jadvalida yana «Liverpul»ni quvib o‘tdi. Endi barchasi shu hafta oxiridagi yakshanbada, mavsumning oxirgi o‘yinlarida hal bo‘ladi.
Angliya chempionati. Premer-liga. 37-tur
«Manchester Siti» – «Lester» – 1:0 (0:0)
Gol: Kompani, 70.
«Manchester Siti»: Ederson, Uoker, Kompani, Lyaport, Zinchenko, Silva (Stouns, 90+1), Gundo‘g‘an, Foden (Sane, 56), Bernardu Silva, Aguero (Gabriel Jyezus, 87), Sterling.
«Lester»: Shmayxel, Rikardu Pereyra, Evans, Maguayr, Chilvell, Olbrayton (Grey, 85), Ndidi, Chudxuri, Tilemans (Barns, 75), Meddison (Ixeanacho, 80), Vardi.
Ogohlantirishlar: Silva, 22. Maguayr, 35. Kompani, 44. Gabriel Jyezus, 89. Ixeanacho, 90.
Hakam: Din.
6 may. Manchester. «Etihad» stadioni.
Futbol karikaturachilari uchun «Manchester Siti» va «Liverpul»ning «mushuk-sichqon o‘yini» ko‘plab g‘oyalar uchun ilhom berib kelmoqda. Angliya chempionatining har bir turi oldidan yangi karikaturalar paydo bo‘ladi. «Siti»ning «Lester»ga qarshi o‘yini arafasida rassomlardan biri Yurgen Kloppni «shaharliklar»ning navbatdagi raqibi futbolkasida tasvirladi. Uning oldida esa «Siti»ning oldingi raqiblari - «MYu», «Tottenhem», «Kristal Pelas» va «Byornli» futbolkalari chiqindi idishiga irg‘itilgan holatda ko‘rsatilgan (bu jamoalarning hech biri mersisaydliklar jamoasi umidlarini oqlay olmadi va «Siti» bu jamoalarga qarshi o‘yinlarda ochko yo‘qotmadi).
Pep Gvardiola o‘yindan oldin «Liverpul» o‘z faoliyati davomida to‘qnashgan eng kuchli ikki raqibdan biri ekanini tan oldi. Ikkinchisi – «Bavariya»ni Chempionlar ligasidan chiqarib yuborgan Luis Enrike boshqaruvidagi «Barselona».
Bugungi «Liverpul» haqiqatdan ham buyuk jamoaga aylandi - jamg‘arilgan ochkolarning o‘zi buni tasdiqlaydi. Besh yil muqaddam ham qizillar chempionlik uchun oxirigacha kurashgan va «Siti» bilan bir qatorda asosiy favorit bo‘lgandi. Lekin o‘shanda oxirgi turlardan birida «Chelsi»ga qarshi o‘yinda Stiven Jyerrardning yiqilib to‘p yo‘qotishi oqibatida jamoa raqibni oldinga o‘tkazib yuborgan, yakunda «Manchester Siti» chempionlikni nishonlagandi.
O‘shanda «Liverpul»ga Brendan Rojyers ustozlik qilgandi. Ushbu shimoliy irlandiyalik mutaxassisning «Enfild»ga mehri bo‘lakcha. Fevral oyida Rojyers «Lester»ni qabul qilib oldi va og‘ir ahvoldagi jamoani Yevropa Ligasi uchun kurashayotgan jamoaga aylantirdi. Endi sobiq jamoasi fanatlari undan «Siti»ga qarshi muhim o‘yinda matonat ko‘rsatishni kutishayotgandi. Murabbiy esa o‘yin arafasida bergan intervyusida shunday dedi: «Men bor diqqat-eʼtiborimni «Lester»ga qaratganman. Ha, bu hayajonli, biz chempionlik taqdiriga ta'sir ko‘rsatishimiz mumkin, ammo men hozir faqat hozirgi klubim haqida o‘ylamoqdaman».
