Prezident qarori: 1 yanvardan shahar ko‘chalarini qurish va ta'mirlashda unga tutash hududlar ham majburiy obodonlashtiriladi

O‘zbekiston Respublikasi prezidenti “Aholi punktlarini obodonlashtirish sohasida ishlar samaradorligini oshirishga doir qo‘shimcha chora-tadbirlar to‘g‘risida”gi qarorni imzoladi.

Quyidagilar obodonlashtirish sohasida ishlarni tashkil etishni takomillashtirishning asosiy vazifalari va yo‘nalishlari etib belgilandi:

aholi punktlari hududlarini obodonlashtirish sohasida davlat boshqaruvini takomillashtirish, obodonlashtirish sohasida normativ-huquqiy baza, standartlar, shaharsozlik normalari va qoidalarini ishlab chiqish va yangilash;

tasdiqlangan strategiyalar asosida shaharlarning ko‘cha-yo‘l va jamoat joylarini kompleks rivojlantirishni ta'minlash, hududlarni obodonlashtirish masalalariga keng jamoatchilikni jalb qilish;

obodonlashtirish sohasida davlat mablag‘laridan foydalanish samaradorligini va ko‘rsatiladigan xizmatlar sifatini oshirishga qaratilgan davlat-xususiy sheriklik mexanizmlarini bosqichma-bosqich joriy qilish;

obodonlashtirish boshqarmalarining kuch va resurslaridan oqilona foydalanish, ularning ishini optimallashtirish, qo‘l mehnatini kamaytirish, yuzaga kelayotgan muammolarga tezkorlik bilan munosabat bildirishga, shuningdek, samarali, shu jumladan jamoatchilik nazoratini ta'minlashga yo‘naltirilgan innovatsion yechimlarni joriy qilish;

obodonlashtirish sohasi xodimlariga munosib mehnat sharoitlarini yaratish, ularni moddiy rag‘batlantirish va ijtimoiy muhofaza qilish darajasini oshirish.

O‘zbekiston Respublikasi Uy-joy kommunal xizmat ko‘rsatish vazirligi hududlarni obodonlashtirish sohasidagi muammolar o‘rganish va metodologik ta'minlash uchun mas'ul organ etib belgilandi.

O‘zbekiston Respublikasi Uy-joy kommunal xizmat ko‘rsatish vazirligining Uy-joy kommunal xizmat ko‘rsatish sohasida me'yoriy bazani takomillashtirish boshqarmasi tegishli ravishda vazirlik markaziy apparati boshqaruv xodimlarining cheklangan sonini ko‘paytirib, 2 nafar qo‘shimcha shtat birligi ajratilgan holda Uy-joy kommunal xo‘jaligi va hududlarni obodonlashtirish sohalarining metodologik bazasini takomillashtirish boshqarmasiga aylantiriladi.

O‘zbekiston Respublikasi Uy-joy kommunal xizmat ko‘rsatish vazirligiga Qoraqalpog‘iston Respublikasi Vazirlar Kengashi, viloyatlar va Toshkent shahar, tuman (shahar) hokimliklaridan joylarda hududlarni obodonlashtirish bo‘yicha amalga oshirilayotgan chora-tadbirlar to‘g‘risida zarur axborotni so‘rab olish huquqi berildi.

Belgilanishicha, 2020 yil 1 yanvardan boshlab:

a) quyidagilarga:

Toshkent shahar hokimligi huzuridagi Obodonlashtirish bosh boshqarmasi va Mustaqillik maydonini ko‘kalamzorlashtirish, obodonlashtirish va saqlash departamenti, shuningdek, Toshkent shahar hokimligi huzuridagi Obodonlashtirish bosh boshqarmasining ixtisoslashtirilgan boshqarmalari (Fuqarolarga xizmat ko‘rsatish boshqarmasidan tashqari) xodimlariga – oylik tarif stavkasining (lavozim maoshining) 30 foizi miqdorida;

Toshkent shahar hokimligi huzuridagi Obodonlashtirish bosh boshqarmasining Fuqarolarga xizmat ko‘rsatish boshqarmasi, Toshkent shahri tumanlarining obodonlashtirish boshqarmalari, Nukus shahri va shaharlar – viloyat markazlari obodonlashtirish boshqarmalari, viloyat (Qoraqalpog‘iston Respublikasida – respublika) bo‘ysunuvidagi shaharlar va tumanlar obodonlashtirish boshqarmalari xodimlariga – oylik tarif stavkasining (lavozim maoshining) 15 foizi miqdorida ustama belgilanadi;

b) obodonlashtirish bo‘linmalari xodimlariga ovqatlanish uchun qonun hujjatlarida belgilangan eng kam oylik ish haqining bir baravari miqdorida kompensatsiya to‘lanadi;

v) Qoraqalpog‘iston Respublikasi va viloyatlarning tuman va shahar obodonlashtirish boshqarmalari xodimlari uchun mehnatga haq to‘lash bo‘yicha tarmoq tarif setkasiga muvofiq mehnatga haq to‘lash miqdorlari Toshkent shahri tumanlarining obodonlashtirish boshqarmalari va Fuqarolarga xizmat ko‘rsatish boshqarmasi xodimlari uchun nazarda tutilgan miqdorda belgilanadi; 

g) faoliyati hayvonlarning jasadlarini zararsizlantirish va utilizatsiya qilish bilan bevosita bog‘liq bo‘lgan obodonlashtirish boshqarmalarining nazoratsiz hayvonlarni tutish bo‘limlari xodimlariga mehnatning zararli sharoitlari uchun – lavozim maoshiga 20 foiz miqdorida ustamalar belgilanadi.

O‘zbekiston Respublikasi Qurilish vazirligi Uy-joy kommunal xizmat ko‘rsatish vazirligi bilan birgalikda 2020 yil 1 yanvarga qadar:

shu jumladan nogironligi bo‘lgan shaxslar va keksa yoshdagilar uchun qulay muhit yaratishni nazarda tutgan holda obodonlashtirish sohasidagi standartlar, shaharsozlik normalari va qoidalarini;

tegishli loyihalarni ishlab chiqishga ochiq tanlovlar o‘tkazish yo‘li bilan ko‘cha-yo‘l hududi, istirohat bog‘lari, xiyobonlar va bulvarlar tashkil etish tamoyillarini joriy etish, yoritish elementlari, me'moriy shakllarni joylashtirish, ko‘kalamzorlashtirish, odamlar uchun qulay hududlar yaratish, yo‘lovchilar va velosipedlar harakatlanishini rivojlantirish uchun shart-sharoitlarni takomillashtirishni nazarda tutuvchi “odamlar uchun shahar” va “yashil shahar” modellarining elementlarini qo‘llagan holda, hududlarni obodonlashtirishning namunaviy loyihalarini ishlab chiqish va yangilashni ta'minlaydi.

O‘zbekiston Respublikasi Uy-joy kommunal xizmat ko‘rsatish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining quyidagi imkoniyatlarni beruvchi “Obod hudud” axborot tizimini yaratish to‘g‘risidagi taklifiga rozilik berildi:

fuqarolar tomonidan obodonlashtirish sohasidagi mavjud muammolar bo‘yicha murojaatlar yuborish va jamoatchilik nazoratini amalga oshirish, shuningdek, ular uchun qayta aloqani, shu jumladan bajarilgan ish natijalarini “avval” va “keyin” formatida taqqoslash imkoniyatini ta'minlash;

aholi bilan hamkorlikda obodonlashtirish ishlarini rejalashtirish, bunda mavjud moddiy resurslar va infratuzilma imkoniyatlaridan samarali va oqilona foydalanishni hisobga olish;

fuqarolar bilan hududlarni obodonlashtirish holati to‘g‘risida axborot almashish, qurilish, ta'mirlash va obodonlashtirish obektlari bo‘yicha takliflarni yo‘naltirish orqali ularni obodonlashtirish loyihalarini amalga oshirishga jalb qilish;

obodonlashtirish, ko‘kalamzorlashtirish va sanitariya holatidan kelib chiqib hududlar reytingini belgilash;

maxsus onlayn-maydonchada loyihalashtirish va obodonlashtirish bo‘yicha yo‘riqnomalar va qo‘llanmalar, hududlarni obodonlashtirishning namunaviy loyihalari, shuningdek, standartlar, shaharsozlik normalari va qoidalarini joylashtirish.

Shunday tartib joriy qilinadiki, unga muvofiq 2020 yil 1 yanvardan boshlab:

shahar ko‘chalarini qurish va rekonstruksiya qilish bo‘yicha loyiha-smeta hujjatlari parametrlarida ushbu ko‘chalarning tutash hududlarini obodonlashtirish (irrigatsiya tarmoqlari, yoritish elementlari, ko‘kalamzorlashtirish, yo‘laklar, axlat qutilari, kichik me'moriy shakllar va boshqalar) bo‘yicha kompleks tadbirlar majburiy tartibda nazarda tutiladi;

yo‘l qatlami va obodonlashtirishning boshqa obektlari ostida joylashgan yer osti muhandislik kommunikatsiyalarini qurish, rekonstruksiya qilish va kapital ta'mirlash qo‘shma grafiklar asosida obodonlashtirish obektlarida loyiha va pudrat ishlari bilan o‘zaro bog‘liq holda amalga oshiriladi;

yangi qurilgan obektlarni, rekonstruksiya qilingan va kapital ta'mirlangan binolar yoki inshootlarni tutash hududlarni obodonlashtirmasdan turib foydalanishga qabul qilish taqiqlanadi.

Toshkent shahar hokimligining poytaxtda, eksperiment tartibida, jahonning yirik shaharlarida muvaffaqiyatli qo‘llanilayotgan jarayonlarni boshqarish va avtomatlashtirishning zamonaviy tizimlarini joriy etish to‘g‘risidagi taklifiga rozilik berildi.

Toshkent shahar hokimiga eksperiment doirasida:

Obodonlashtirish bosh boshqarmasi, tumanlarning obodonlashtirish boshqarmalari tuzilmalarini, tuman (shahar) obodonlashtirish boshqarmalari to‘g‘risidagi nizomlarni tasdiqlash;

2019–2020 yillar davrida Toshkent shahrini obodonlashtirish tizimini rivojlantirish konsepsiyasi loyihasini ishlab chiqish va keyinchalik amalga oshirishga eng yaxshi takliflarni tanlash yo‘li bilan manfaatdor tashkilotlar, shu jumladan xorijiy tashkilotlarni jalb etish huquqi berildi.

O‘zbekiston Respublikasi Uy-joy kommunal xizmat ko‘rsatish vazirligi, O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

2019 yil 1 oktyabrga qadar davlat-xususiy sheriklik shartlarida obodonlashtirish bo‘yicha ishlarni va xizmatlarni tashkil etish uchun hududlarni berish imkoniyatini o‘rganib chiqadi va zarur hujjatlarni tayyorlaydi;

2019 yil 1 dekabrga qadar kamida beshta shahar va tumanlarda davlat-xususiy sheriklik shartlarida obodonlashtirish bo‘yicha ishlarni va xizmatlarni tashkil etish uchun hududlarni berish choralarini ko‘radi;

ijobiy tajriba yakunlari bo‘yicha uni keyinchalik butun respublika hududida joriy etish yuzasidan takliflar tayyorlaydi.

2019 yil 1 oktyabrdan boshlab shunday tartib o‘rnatiladiki, unga muvofiq:

yuridik va jismoniy shaxslar – aholi punktidagi binolar va inshootlarning mulkdorlari yoki ulardan foydalanuvchilar, shu jumladan, ijaraga oluvchilar o‘ziga biriktirilgan hududni obodonlashtirish ishlari o‘z vaqtida va sifatli amalga oshirilishi uchun mas'ul hisoblanadi;

obodonlashtiriladigan hududning maydoni mahalliy davlat hokimiyati organlari tomonidan belgilanadi. Bunda biriktirilgan hudud maydoni tegishli yer uchastkasi maydonidan katta bo‘lishi mumkin emas;

biriktirilgan hududni obodonlashtirish ishlari binolar va inshootlarning mulkdorlari yoki ulardan foydalanuvchilar tomonidan belgilangan shaharsozlik normalari va qoidalariga, shaharlar va aholi punktlarining tashqi ko‘rinishiga qo‘yiladigan talablarga muvofiq amalga oshiriladi.