RF harbiylari oktabr oyi boshidan Ukraina poytaxti Kiyev shahrini ikkiga ajratib turuvchi Dnepr daryosi ustidan oʻtgan koʻpriklar boʻylab zarba berish kampaniyasini boshladi – bungacha ushbu koʻpriklar hujumga uchramagandi.
1 va 2-oktabr kunlari Rossiya dronlari Janubiy koʻprikka hujum qilgan. Natijada ustunlardan biri, yoʻl chetidagi toʻsiq, yoʻl qoplamasi va metropolitenning beton toʻsigʻi shikastlangan. Koʻprik boʻylab harakat toʻxtatildi; u hozirgacha avtomobillar uchun ham, metro poyezdlari uchun ham ochilmadi.
3-oktabrda esa Shimoliy koʻprikka ham hujum qilindi. Ikki kishi jarohatlanib, yoʻl qoplamasi hamda trolleybus aloqa tarmogʻi shikastlangan. Koʻprik boʻylab harakat qisman cheklangan.
4-oktabr tongida ushbu koʻprik takroriy hujumga uchradi. Ijtimoiy tarmoqlarda tarqalgan videoda zarba berilgan vaqtda koʻprik boʻylab avtomobillar harakatlanayotgan boʻlganini koʻrish mumkin.
Shahar meri Vitaliy Klichko ikkinchi hujum oqibatlari yuzasidan tafsilotlarni keltirmagan – jarblanganlar bor yoki yoʻqligi va koʻprikning hozirgi holati maʼlum emas. Lekin ijtimoiy tarmoqlarda ertalabki zarbadan keyin koʻprik yoʻlida ulkan teshik hosil boʻlganini koʻrish mumkin.
Bu hujum Ukraina poytaxtiga Germaniya kansleri Fridrix Mers tashrif buyurgan vaqtga toʻgʻri keldi.
Kiyevda Dnepr daryosi ustidan oʻtgan jami toʻqqizta koʻprik mavjud. Ukrainalik ekspertlar koʻpriklarni vayron qilish uchun dronlar bilan berilayotgan zarbalar yetarli emasligini aytishmoqda – bunday vazifa uchun ancha kuchliroq qurol qoʻllash kerak boʻladi. Ammo agar dronlar orqali hujumlar davom ettiriladigan boʻlsa, ular koʻpriklarni avariyaviy holatga keltirishi mumkin. U holda koʻpriklar yopiladi, bu esa Kiyev boʻylab logistikani jiddiy darajada qiyinlashtiradi. Hozirdan muammolar yuzaga kelgan: Janubiy koʻprik boʻylab dastlabki zarbalardan keyin Ukraina poytaxtida ulkan tirbandliklar boshlangan.
Kiyevdagi koʻpriklar boʻylab zarbalar berilishi bilan bir vaqtda Ukraina prezidenti Volodimir Zelenskiy Vladimir Putin oʻz harbiy qoʻmondonlariga Ukraina boʻylab havo zarbalari berishda urush olib borish qoidalariga rioya etib oʻtirmaslikni buyurganini aytib chiqdi. Zelenskiyning soʻzlariga koʻra, Ukraina maxsus xizmatlari bu haqda qoʻlga kiritilgan razvedka maʼlumotlaridan xabar topgan, Putinning bunday buyrugʻi esa sentabr oyida, Rossiya Kiyev boʻylab zarbalarni kuchaytirganida berilgandi (zarbalar koʻpaygan va fuqarolik infratuzilmalari uchun yanada vayronkor tus olgandi).
