13:02 / 02.07.2019
12831

Bozorlarda «arava xizmati»ni tartibga solish taklif qilinmoqda

Foto: Advantour

“Mening fikrim” jamoaviy murojaatlar portalida bozorlarda “arava xizmati”ni tartibga solish haqida petitsiya e'lon qilindi.

“Bugungi kunda bozorlarimizda yo‘q narsaning o‘zi yo‘q. Ayniqsa, yoz mavsumida bozorlarimiz yanada to‘lib, barakali bo‘ladi. Mana shunday manzarani buzadigan bir holat borki, uni albatta tartibga solish lozim. Bu bozorlardagi arava xizmatlaridir”, - deb yozadi murojaat muallifi. 

Qayd etilishicha, aravalarning tartibsiz harakati natijasida turli noqulayliklar va ko‘ngilsiz holatlar yuzaga kelishi tabiiy. Bunday holatlarni ko‘rgan turistlarning ham bozorlar haqidagi fikrlari salbiy tarafga o‘zgarishi mumkin ekani aytiladi. 

Bundan tashqari, arava xizmati uchun to‘lovlarning aniq belgilanmaganligi ham xaridorlarning noroziligiga sabab bo‘lmoqda. Qaysidir aravaning bir soatlik xizmati uchun o‘n ming bersangiz, boshqasi xuddi shu xizmat uchun yigirma, hattoki, o‘ttiz ming so‘mgacha haq so‘raydi.

“Yuqoridagilarni inobatga olgan holda, barcha bozorlardagi arava xizmatini tartibga solish va ularning xizmati uchun “foydalanilgan vaqt doirasida yagona to‘lov stavkalari”ni joriy etishni taklif qilamiz”, - deyiladi petitsiyada.

Top