Mol-mulk va yer solig‘i o‘rniga ko‘chmas mulk solig‘i joriy etiladi

O‘zbekiston Respublikasi prezidentining «Soliq ma'muriyatchiligini takomillashtirish bo‘yicha qo‘shimcha chora-tadbirlar to‘g‘risida»gi qarori qabul qilindi.

Prezidentning mazkur qarorida «Soliq ma'muriyatchiligini takomillashtirish strategiyasini amalga oshirish bo‘yicha «yo‘l xaritasi» ma'qullangan. Chora-tadbirlarni amalga oshirish mexanizmlari, ijro muddati va mas'ullar belgilangan.

«Yo‘l xaritasi»ning birinchi bobi Soliq siyosatini takomillashtirish va iqtisodiyotda xufiyona aylanmani qisqartirishga bag‘ishlangan va chora-tadbirlar ichida quyidagi muhim choralar o‘rin olgan:

·        Tadbirkorlik sub'yektlariga teng fiskal sharoitlar va raqobat muhitini ta'minlash uchun qo‘llash sohalari va faoliyat turlarini hisobga olgan holda, soliq solishning soddalashtirilgan tartibini qayta ko‘rib chiqish.

·        Yuridik shaxslar va yakka tartibdagi tadbirkorlarning qo‘shilgan qiymat solig‘i to‘lovchilari sifatida ro‘yxatdan o‘tish tartibini ishlab chiqish.

·        Soliqlar bo‘yicha to‘lovlarni keyinchalik bo‘lib-bo‘lib foizi bilan qaytarish orqali kamaytirishni nazarda tutuvchi “investitsiyaviy soliq kreditlari” institutini joriy etish.

·        Soliq to‘lovchilarga keyinchalik soddalashtirilgan “yashil yo‘lak” tartibida xizmat ko‘rsatish maqsadida soliq tavakkalchiliklarini baholash va insoflilik mezonlari asosida segmentlash tizimini joriy qilish.

·        Soliq to‘lovchi ixtiyoriy ravishda soliq majburiyatlarini kamaytirib ko‘rsatish (yashirish) faktlarini ko‘rsatib, soliq qarzining bir qismini to‘laganda, uni javobgarlikdan ozod qilishni nazarda tutuvchi «soliq kelishuvi» mexanizmini joriy etish.

·        O‘zaro bog‘langan yoki afillangan shaxslar o‘rtasidagi bitimlar bo‘yicha transfert narxlar belgilanishining, shu jumladan bunday shaxslar bo‘yicha mezonlarni belgilashni nazarda tutuvchi soliq nazorati mexanizmini joriy etish.

·        Soliq va buxgalteriya hisobi qoidalaridagi tafovutlarni qisqartirish chora-tadbirlarini amalga oshirish va ularni xalqaro moliyaviy hisobot standartlariga to‘liq moslashtirish.

·        Ayrim tovarlar uchun identifikatsiya markirovka qilishning yagona tizimini joriy etish va soliq organlari tomonidan mahsulotni hisobga olishning elektron bazasini yaratish.

·        Hududlar va iqtisodiyot tarmoqlarining soliq imkoniyatlarini baholash metodikasini ishlab chiqish va joriy etish, soliq tushumlarini hududlar va iqtisodiyot tarmoqlari bo‘yicha prognoz qilish uchun indikatorlar va ma'lumotlar manbalarini shakllantirish.

·        Iqtisodiyotda xufiyona aylanma darajasini kamaytirish bo‘yicha «yashirin iqtisodiyot» ko‘lamini baholashning asosiy ko‘rsatkichlarini belgilash, idoralararo hamkorlik tizimini, ko‘riladigan choralar samaradorligini baholash tizimini joriy qilishni, shuningdek, iqtisodiy faoliyatni legallashtirishni nazarda tutuvchi chora-tadbirlarni amalga oshirish.

·        Chakana savdoda naqd pulda sotib olinadigan tovarlar va xizmatlar uchun yuqori to‘lov chegarasini belgilash hamda bazaviy hisoblash miqdorining 30 barobari miqdoridan ortiq bo‘lgan bitimlar uchun soddalashtirilgan hisobvaraq-fakturani joriy etish bo‘yicha takliflarni ishlab chiqish.

·        Mol-mulk va yer solig‘i o‘rniga ko‘chmas mulk solig‘ini joriy qilish.

·        Soliqlarni to‘lashdan bo‘yin tovlash va xufiyona faoliyat amalga oshirish faktlarni aniqlashda yordam bergan (ma'lumot taqdim etgan) shaxslarni moddiy rag‘batlantirish tizimini joriy etish.

·        Mahsulotlar (ishlar, xizmatlar) xarid qilish uchun «onlayn» nazorat-kassa mashinalari cheklari bilan tasdiqlangan xarajatlar miqdorida jismoniy shaxslar daromad solig‘i, mol-mulk va yer soliqlari bo‘yicha chegirmalarni amalga oshirish tartibini ishlab chiqish.

·        O‘zini o‘zi ish bilan band qilgan shaxslar mezonlari va toifalarini aniqlash bo‘yicha ilg‘or xorijiy tajriba asosida takliflar ishlab chiqish, soliq solish maqsadida faoliyatni qonuniylashtirishni rag‘batlantirish.

·        Elektron platformalar, internet-do‘konlar va ijtimoiy tarmoqlar orqali amalga oshiriladigan elektron tijorat faoliyatini qonuniylashtirish va nazorat qilish mexanizmini joriy etish bo‘yicha takliflar tayyorlash.

·        Soliq to‘lovchilar uchun qo‘shilgan qiymat solig‘ini hisobga olish va Davlat budjetiga o‘tkazish maxsus hisobraqamlarini joriy etish bo‘yicha takliflar tayyorlash.

·        Davlat bojxona qo‘mitasi, Markaziy bank va Davlat soliq qo‘mitasining ma'lumotlar bazalarini integratsiyalashtirish, «E-ombor» tovarlarni hisobga olishning elektron tizimini joriy etish va import qilingan tovarlar hisobotlarining elektron tarzda shakllanishini ta'minlash orqali import operatsiyalarini monitoring qilish tizimini takomillashtirish.

·        Toshkent shahrining Mirzo Ulug‘bek tumani misolida jismoniy shaxslarning mol-mulkiga solinadigan soliqni mulkning bozor qiymatiga nisbatan soliq stavkasidan kelib chiqqan holda hisoblash tartibini ko‘rib chiqish va natijasi bo‘yicha O‘zbekiston Respublikasi Vazirlar Mahkamasiga asoslangan takliflar kiritish.