Bojxona qoʻmitasining Kun.uz’ga maʼlum qilishicha, 1-oktabr kuni soat 22:30 da Surxondaryo viloyati bojxona boshqarmasining “Ayritom” chegara bojxona postiga Afgʻonistondan kirib kelgan boʻsh yuk avtotransport vositasini bojxona koʻrigidan oʻtkazish davomida kinolog xizmat itining belgi berishi bojxona xodimlarining diqqatini tortgan.
Shundan soʻng Termiz tumanida istiqomat qiluvchi fuqaro boshqaruvidagi mazkur yuk avtotransport vositasi chuqurlashtirilgan bojxona nazoratidan oʻtkazilgan.
Nazorat tekshiruvi chogʻida transport vositasi tirkamasining pol qismi tagiga 98 dona oʻram yashirilganligi aniqlangan.
Bojxona postidagi inspeksion rentgen qurilmasini chalgʻitish maqsadida mazkur oʻramlar polietilen, zarqogʻoz va skotch bilan toʻrt qavat qilib qadoqlangan.
Ushbu oʻramlar koʻzdan kechirilganida 79 donasining ichiga “gashish” va 19 donasining ichiga “opiy” giyohvandlik vositasi joylangani maʼlum boʻlgan.
Ularning ogʻirligi oʻrami bilan hisoblaganda gashish 42 kg 335 grammni, opiy esa 10 kg 260 grammni, jami ogʻirligi esa 52 kg 595 grammni tashkil etadi.
Holat yuzasidan bojxona organlari tomonidan tergovga qadar tekshiruv harakatlari olib borilmoqda va bunda asosiy eʼtibor ushbu giyohvandilk vositalarini qabul qiluvchi shaxslarni qidirishga qaratilgan.
