O‘zbekiston Respublikasi Transport vazirligi tomonidan aholiga qulaylik yaratish, yo‘lovchilarni o‘z vaqtida manzillariga xavfsiz yetkazib qo‘yishni tashkil etish borasida bugungi kunda tizimli ishlar amalga oshirilmoqda, deyiladi vazirlik xabarida.
Hozirda nafaqat viloyat markazlari va yirik shaharlar balki yo‘lovchi oqimi katta bo‘lgan tuman va qishloqlarni poytaxt Toshkent bilan bog‘lovchi yo‘nalishlarda ham avtobus qatnovlari tashkil etilmoqda.
17 iyuldan e'tiboran Uzautotrans Service korxonasi Toshkent- Jo‘sh (Samarqand viloyati) yo‘nalishida muntazam avtobus qatnovlarni amalga oshirishni boshladi. Toshkent avtovokzalidan avtobus soat 7:30 da jo‘nab ketadi. Jo‘shdan esa tonggi 6:30 Toshkent tomon yo‘lga chiqadi. Yo‘nalish masofasi 460.8 km bo‘lib, chipta narxi 47 000 so‘m etib belgilangan. Ushbu yo‘nalishda barcha qulayliklarga ega bo‘lgan zamonaviy YUTONG avtobuslari yo‘lovchilarga xizmat ko‘rsatmoqda. Chiptalarni Toshkent avtovokzali kassalaridan xarid qilish mumkin.
Eslatib o‘tamiz, bugungi kunda Uzautotrans Service korxonasi Toshkent- Denov, Toshkent-Qarshi, Toshkent-Urganch, Toshkent-Yangiyer, Toshkent-Buxoro, Toshkent-Qorako‘l, Toshkent-Jizzax, Toshkent-Gagarin, Toshkent-Zomin, Toshkent-Samarqand, Toshkent- Termiz kabi mahalliy yo‘nalishlarda ham muntazam avtobus qatnovlarini amalga oshirmoqda.
