Hodisa joyida olingan suratlarda bir nechta avtomobil pachoqlangani koʻrinadi. Toshkent shahri hokimligi hodisa oqibatida bir kishi yengil jarohat olganini maʼlum qildi. Unga tez tibbiy yordam koʻrsatilgan.
Issiqlik taʼminoti korxonasi – Veolia Energy hodisa joyiga avariya-tiklash brigadasi va mutaxassislari yetib borganini, hodisa tafsilotlari va oʻpirilish sabablari oʻrganilayotganini maʼlum qildi. Kompaniyaga koʻra, hech qanday sizib chiqish holati aniqlanmagan.
«Hududgaz Poytaxt» gaz taʼminoti filiali mazkur hududdan yuqori bosimli gaz quvuri oʻtmagani hamda sodir boʻlgan hodisa tabiiy gaz tarmoqlari bilan bogʻliq emasligini, oʻrganishlar davomida gaz sizib chiqishi bilan bogʻliq holatlar aniqlanmaganini bildirdi.
«Toshkent shahar suv taʼminoti» AJ avariya ichimlik suvi tarmoqlariga tegishli emasligini, u issiq suv tarmogʻida yuzaga kelganini maʼlum qildi.
Glinka koʻchasining Shota Rustaveli koʻchasiga olib chiquvchi qismida transport vositalari harakati vaqtincha toʻxtatildi.
