O‘zbekistonda yer uchastkalari egalarini mikro ro‘yxatga olish tadbiri o‘tkaziladi

Normativ-huquqiy hujjatlar loyihalari muhokamasi portalida Vazirlar Mahkamasining “Yer uchastkalari egalarini mikro ro‘yxatga olishni tashkil etish va o‘tkazish chora-tadbirlari to‘g‘risida”gi qarori loyihasi e'lon qilindi.

Hujjat bilan 2020 yil 1 iyundan 30 iyungacha respublikaning har bir tumani va shahrida mavjud dehqon (shaxsiy yordamchi) xo‘jaliklari sonining 10 foizini qamrab olgan holda, yer uchastkalari egalarining qishloq xo‘jaligi faoliyati bo‘yicha mikro ro‘yxatga olish tadbiri o‘tkaziladi.

Quyidagilar:

Yer uchastkalari egalarini mikro ro‘yxatga olishni tashkil etish va o‘tkazish ishlarini muvofiqlashtirish bo‘yicha Respublika komissiyasi tarkibi;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi yer uchastkalari egalarini mikro ro‘yxatga olishni tashkil etish va o‘tkazish ishlarini muvofiqlashtirish bo‘yicha hududiy komissiyalarning namunaviy tarkibi tasdiqlangan holda tashkil etiladi.

Qishloq xo‘jaligi mahsulotlarini ishlab chiqarish va qayta ishlashda aholining ishtirokini tavsiflovchi muhim ko‘rsatkichlarni shakllantirgan holda yer uchastkalari egalarini mikro ro‘yxatga olishni tashkil etish, o‘tkazish va yakuniy natijalarini chiqarish bo‘yicha tartib tasdiqlanadi.

Yer uchastkalari egalarining qishloq xo‘jaligi faoliyati bo‘yicha mikro ro‘yxatga olish tadbirini tashkil etish va o‘tkazish sxemasi tasdiqlanadi.

Respublika komissiyasi:

vakolatli organlar va mikro ro‘yxatga olish tadbirini o‘tkazishga jalb qilingan boshqa davlat va xo‘jalik boshqaruvi organlari, mahalliy ijro etuvchi organlarning hamkorlikdagi faoliyatini muvofiqlashtirgan holda, ularning mazkur tadbirga tayyorgarlik ko‘rish va o‘tkazish bilan bog‘liq ishlarning o‘z vaqtida hamda sifatli ijrosi ta'minlanishini nazorat qiladi;
 
mikro ro‘yxatga olish tadbirini tashkil etish va o‘tkazish uchun O‘zbekiston Respublikasi Davlat statistika qo‘mitasi, Iqtisodiyot va sanoat vazirligi, Qishloq xo‘jaligi vazirligi, Yer resurslari, geodeziya, kartografiya va davlat kadastri davlat qo‘mitasi, O‘zbekiston fermer, dehqon xo‘jaliklari va tomorqa yer egalari kengashi, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi va boshqa manfaatdor vazirliklar va idoralarni jalb etish masalalarini ko‘rib chiqadi;

2019 yil 1 noyabrgacha O‘zbekiston Respublikasi Davlat statistika qo‘mitasi tomonidan tasodifiy keng qamrovli tanlov asosida shakllantirilgan mikro ro‘yxatga olish o‘tkaziladigan mahalla fuqarolar yig‘inlari ro‘yxatini tasdiqlaydi;

2020 yil 20 dekabrgacha mikro ro‘yxatga olish natijalarini puxta tahlil qilsin va dehqon (shaxsiy yordamchi) xo‘jaliklarining qishloq xo‘jaligi faoliyatiga oid statistika ma'lumotlariga kiritiladigan tegishli o‘zgartirishlar haqida Vazirlar Mahkamasiga axborot taqdim etadi.

Hududiy komissiyalar:

hududlarda mikro ro‘yxatga olish tadbiriga tayyorgarlik ko‘rish va o‘tkazish bo‘yicha aniq chora-tadbirlar va mas'ul ijrochilarni ko‘rsatgan holda ishlarni tashkil etadilar hamda ularning ijrosini ta'minlanishi yuzasidan nazorat o‘rnatadilar;

2019 yil 15 oktyabrgacha O‘zbekiston Respublikasi Davlat statistika qo‘mitasi bilan birgalikda mikro ro‘yxatga olish o‘tkaziladigan mahalla fuqarolar yig‘inlari ro‘yxatini, ularda mavjud dehqon (shaxsiy yordamchi) xo‘jaliklarining sonini ko‘rsatgan holda tayyorlaydilar va Respublika komissiyasiga taqdim etadilar;

2020 yil 1 aprelgacha mikro ro‘yxatga olish tadbirini o‘tkazish uchun davlat statistika organlari, qishloq xo‘jaligiga aloqador hududiy tashkilot va idoralarning xodimlari orasidan yer uchastkalari egalarining qishloq xo‘jaligi faoliyati to‘g‘risida ma'lumotlar to‘plovchi shaxslar kontingentini shakllantiradilar.

O‘zbekiston Respublikasi Davlat statistika qo‘mitasi:

2020 yil aprel oyida, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda yer uchastkalari egalarining qishloq xo‘jaligi faoliyati to‘g‘risida ma'lumotlarni to‘plash uchun jalb etiladigan shaxslar kontingentini joylarda o‘qitilishini tashkil etadi;

2020 yil 1 maygacha mikro ro‘yxatga olish so‘rovnomalari va so‘rovnomani to‘ldirish bo‘yicha ko‘rsatmalarni zarur miqdorda tayyorlanishini ta'minlaydi;

2020 yil 15 maygacha mavjud kompyuter texnikasi negizida so‘rovnomalarni avtomatlashtirilgan tarzda qayta ishlash va umumlashtirish bo‘yicha vaqtinchalik markazlar tashkil etadi;

mikro ro‘yxatga olish o‘tkazilgandan (so‘rovnomalar olingandan) keyin bir oy muddatda ma'lumotlarni umumlashtirish bo‘yicha mutaxassislarning zarur sonini shartnoma asosida qo‘shimcha jalb etgan holda so‘rovnomalarni qayta ishlashni va tahlil etilishini ta'minlaydi;
 
mikro ro‘yxatga olish natijalarini umumlashtiradi va tahlil qiladi, yer uchastkalari egalarining qishloq xo‘jaligi faoliyati to‘g‘risidagi statistika ko‘rsatkichlarining hisob-kitobini amalga oshiradi hamda yakuniy ma'lumotlarni 2020 yil 1 dekabrgacha Respublika komissiyasiga taqdim etadi.

O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari va tegishli tashkilotlar bilan birgalikda, 2020 yil 1 aprelga qadar, mikro ro‘yxatga olishni o‘tkazish uchun tanlab olingan mahalla fuqarolar yig‘inlarini xatlovdan o‘tkazadi, ko‘chalar nomlari indeksini yaratadi va uylar tartib raqamlarini tashkil etilishini ta'minlaydi.

O‘zbekiston Respublikasi Moliya vazirligi mikro ro‘yxatga olish tadbirini tashkil etish, o‘tkazish, materiallarni qayta ishlash va yakuniy natijalarini umumlashtirish ishlarini moliyalashtirish uchun davlat budjetidan O‘zbekiston Respublikasi Davlat statistika qo‘mitasiga zarur miqdorda mablag‘ ajratadi.

O‘zbekiston Respublikasi Ichki ishlar vazirligi jamoat tartibini va xavfsizlikni ta'minlash uchun mikro ro‘yxatga olish tadbirini o‘tkazish guruhlari tarkibida ichki ishlar organlari xodimlarining ishtirokini ta'minlaydi.