11:00 / 09.09.2019
2
14125
Reklama

Toshkent irrigatsiya va qishloq xo‘jaligini mexanizatsiyalash muhandislari institutida John Deere o‘quv markazi ochildi

Amerika Qo‘shma Shtatlarining John Deere kompaniyasi Toshkent irrigatsiya va qishloq xo‘jaligini mexanizatsiyalash muhandislari instituti bilan hamkorlikda oliy o‘quv yurtida o‘quv markazini tashkil etdi. Shu munosabat bilan TIQXMMIda tantanali ochilish marosimi bo‘lib o‘tdi. Unda Bosh vazir maslahatchisi, «O‘zagrotexsanoatxolding» AK raisi Nodir Otajonov, Oliy va o‘rta-maxsus ta'lim vaziri Inomjon Majidov, CIS Equipment Group rahbari Jyeyson Hant, AQShning O‘zbekistondagi elchixonasi, John Deere kompaniyasining O‘zbekistondagi rasmiy dileri – Landtech kompaniyasi vakillari hamda institut professor-o‘qituvchilari va talabalari ishtirok etdi.

Ta'kidlash o‘rinliki, John Deere kompaniyasining mazkur o‘quv markazi O‘zbekiston Respublikasi Prezidenti Sh.Mirziyoyev tomonidan 2019 yil 31 iyulda imzolangan «Qishloq xo‘jaligi mashinasozligini jadal rivojlantirish, agrar sektorni qishloq xo‘jaligi texnikalari bilan ta'minlashni davlat tomonidan qo‘llab-quvvatlashga oid chora-tadbirlar to‘g‘risida»gi qaroridan kelib chiqadigan vazifalar ijrosini ta'minlash maqsadida tashkil etildi.

Institut rektori, iqtisodiyot fanlari doktori, professor O‘ktam Umurzoqov tantanali marosimda so‘zga chiqar ekan, «Institut bugungi juda katta raqobat sharoitida qishloq va suv xo‘jaligi uchun ilg‘or texnologiyalarni biladigan, zamonaviy bilim va ko‘nikmalarga ega, raqobatbardosh muhandis kadrlar tayyorlashni o‘z oldiga asosiy maqsad va vazifa qilib qo‘ygan».

«Hozirda O‘zbekiston qishloq xo‘jaligiga zamonaviy texnika va texnologiyalar keng joriy etilmoqda. Bu, o‘z navbatida, mazkur texnika va texnologiyalar bilan ishlay oladigan muhandis kadrlar tayyorlashni talab etadi. Bunday vazifani bajarishda esa, nafaqat AQSh, balki dunyoda o‘z ilg‘or texnologiyalari va zamonaviy texnikalari bilan mashhur bo‘lgan John Deere kompaniyasining O‘zbekistondagi rasmiy dileri  hamkorlik qo‘lini cho‘zdi. O‘ylaymizki, John Deere kompaniyasi bilan birgalikda amalga oshirayotgan bu ishlarimiz, sohada ta'lim sifatini yanada oshirishga va qishloq xo‘jaligi uchun eng yuqori malakali muhandis kadrlar tayyorlashga xizmat qiladi», - dedi institut rektori O‘ktam Umurzoqov.

«Davlatimiz rahbari Shavkat Mirziyoyev «O‘zagrotexsanoatxolding» kompaniyasiga tashriflari chog‘ida har bir zavodda oliy o‘quv yurtlarining fakultetlarini, oliy o‘quv yurtlarida esa, qishloq xo‘jaligi mashinasozligi korxonalari tomonidan ishlab chiqilayotgan texnikalarning o‘quv sinflari, maketlarini tashkil etishga doir topshiriqlarni bergan edi. Ushbu topshiriqning ijrosi yuzasidan dunyoning eng yirik qishloq xo‘jaligi texnikalari ishlab chiqaruvchi John Deere kompaniyasi o‘z o‘quv markazini ochdi.

Ta'kidlash joizki, bu kompaniya texnikalari juda murakkab hisoblanib, unda eng so‘nggi ilg‘or aqlli texnologiyalardan juda keng foydalanilgan. Shu boisdan ham institutning ta'lim berish sohasida mazkur kompaniya bilan hamkorlikni yo‘lga qo‘yishi dargoh talabalari uchun beqiyos imkoniyatlarni taqdim etadi. Bu yerda dars berayotgan domlalar uchun ham ilg‘or o‘qitish usullari va texnologiyalarini o‘zlashtirishlariga imkon beradi», - dedi Nodir Otajonov.

«John Deere ushbu institut bilan talabalarga zamonaviy qishloq xo‘jaligi texnikalari bo‘yicha ta'lim berishda hamkorlik qilishdan, qolaversa, shunday imkoniyatni taqdim etishdan faxr hissini tuyadi. O‘quv markazi O‘zbekiston agrar sohasiga ilg‘or texnologiyalarni a'lo darajada o‘zlashtirgan malakali mutaxassislarni yetkazib berishda o‘z hissasini qo‘shadi, deb umid qilamiz», - dedi CIS Equipment Group rahbari Jyeyson Hant.

O‘quv markazi John Deere kompaniyasining rasmiy dileri – Landtech kompaniyasi bilan institut o‘rtasida imzolangan memorandum doirasida tashkil etilgan bo‘lib, barcha o‘qitishning barcha xalqaro andazalariga javob beradi. Tadbir davomida o‘quv markazining eng ilg‘or, xalqaro ta'lim standartlariga javob beradigan sinfxonasi, amaliy mashg‘ulotlar o‘tkazish xonasida barpo etilgan sharoitlar ham mehmonlarga tanishtirildi. Xususan, zamonaviy, innovatsion jihozlangan o‘quv xonasidagi shart-sharoitlar ko‘rsatilib, interaktiv doska imkoniyatlari ham namoyish qilindi.  

Amaliy mashg‘ulotlar xonasida John Deere traktorlarida qo‘llaniladigan dizel dvigatelining namunasi ham joylangan bo‘lib, bo‘lg‘usi muhandis talabalar uni qismlarga ajratib, qayta terish amaliyotlarini ham o‘tishlari ma'lum qilindi.

John Deere (Deere & Company) – qishloq xo‘jaligi, o‘rmonsozlik, qurilish, irigatsiya, bog‘dorchilik texnikasi, traktorlar, yirik kombayn mashinalari, ekskavatorlar, paxta terish mashinalari va boshqa ko‘plab texnikalar ishlab chiqarish bo‘yicha jahon yetakchisi hisoblanadi. Kompaniya, shuningdek, katta hajmli avtomobillar uchun dvigatellar ishlab chiqarish bilan ham shug‘ullanadi. Bosh ofisi AQShning Illinoys shtati, Molin shahrida joylashgan. John Deere – bu texnika yaratishda mijozlarning talab va ehtiyojlariga javob beradigan uskunalar va ishonchli xizmat belgisidir.

Reklama huquqi asosida

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top