John Deere kompaniyasining rasmiy dileri UHMLANDTECH kompaniyasi o‘z faoliyatini kengaytirdi. 27 aprel kuni kompaniyaning Qarshi shahridagi rasmiy dilerlik ofisi ochilish marosimi bo‘lib o‘tdi.
John Deere kompaniyasining texnologiyalari O‘zbekistonda 2017 yildan beri UHMLANDTECH rasmiy dilerlik kompaniyasi tomonidan taqdim etilmoqda. Hozirgi kunda kompaniyada 100 dan ortiq xodim ish bilan band, Qarshi shahridagi ofisda yana 20 kishi ish bilan ta’minlandi. Bugungacha John Deere kompaniyasining 1,5 mingdan ortiq texnikalari O‘zbekistonga kirib kelgan, qishloq xo‘jalagi sohasida yuqori unumdorlikka erishish uchun xizmat qilmoqda.
John Deere kompaniyasining MDH bo‘yicha direktori Peter Sachse quyidagilarni ta’kidladi: “O‘zbekiston bozorida davom etayotgan ijobiy o‘zgarishlar va xorijiy investorlar uchun imkoniyatlar kengayib borayotganini qayd etish quvonarli. Biz mamlakatimiz fermerlariga yuqori xizmat va innovatsion imkoniyatlarni taqdim etishni davom ettirish maqsadida respublika hududlarida ish boshlaganimizdan mamnunmiz. Biz har doim o‘z tamoyillarimizga: sifat, majburiyat, innovatsiyaga amal qilamiz”.
Qarshida kompaniya ofisi filialining ochilishidan maqsad janubiy viloyatlardagi yirik klasterlar, qishloq xo‘jaligi sohasi vakillariga xizmat ko‘rsatishni raqamlashtirish va osonlashtirishdan iborat. Shuningdek, hududlarda aniq dehqonchilik sistemasini yaxshilash ham maqsad qilingan.
Raqamlashtirish degani bu aniq dehqonchilik tizimi, bu – qishloq xo‘jaligida yuqori sifatli texnologiyalardan foydalangan holda olinadigan hosilni oshirishga qaratilgan innovatsion metoddir. Bunda texnologiyalar yordamida daladagi ishlarni o‘ta aniqlikda nazorat qilish, hosildagi yo‘qotishlarning oldini olish mumkin. John Deere O‘zbekistonda aynan mana shu yo‘nalishdagi ishlar olib borilishida yetakchi bo‘lyapti, Qarshidagi yangi ofis esa agrar soha vakillariga bu ishlarni jadallashtirishga, ko‘proq yangi innovatsiyalar bilan tanishishga yordam beradi.
Agrar sohani tushunuvchilar orasida John Deere kompaniyasi haqida eshitmagan odam bo‘lmasa kerak. John Deere qishloq xo‘jaligini raqamlashtirish bilan shug‘ullanuvchi jahondagi yetakchi kompaniyalardan biri hisoblanadi. Kompaniyaga 1837 yilda asos solingan bo‘lib, O‘zbekistonga uning texnologiyalari 2017 yildan buyon UHMLANDTECH rasmiy dilerlik kompaniyasi tomonidan olib kiriladi.
Shuningdek, 2022 yili oktyabr oyida UzAuto John Deere kompaniyasi bilan shartnoma imzolagan. Shartnomaga ko‘ra, tomonlar O‘zbekiston Respublikasida John Deere savdo belgisi ostida qishloq xo‘jaligi texnikasini yig‘uv ishlab chiqarish va realizatsiya qilishni tashkillashtirish borasida hamkorlik boshladi.
