John Deere O‘zbekistonda qishloq xo‘jaligi texnikalari ishlab chiqarishni yo‘lga qo‘yishi mumkin

AQShning John Deere kompaniyasi O‘zbekistonda qishloq xo‘jaligi texnikasini ishlab chiqarishni yo‘lga qo‘yishni rejalashtiryapti. Bu haqda Investitsiyalar, sanoat va savdo vazirligi xabar berdi.

Ma’lum qilinishicha, vazir Laziz Kudratov 24 mart kuni korporatsiya vitse-prezidenti Piter Saks bilan uchrashuv o‘tkazdi.

Muloqotda milliy agrosanoat majmuasini modernizatsiya qilish hamda qishloq xo‘jaligiga innovatsion yechimlarni joriy etish istiqbollari muhokama qilingan. Asosiy e’tibor texnikalar yetkazib berish, servis infratuzilmasini rivojlantirish va ilg‘or raqamli texnologiyalarni integratsiya qilish masalalariga qaratilgan.

Uchrashuvda ishtirokchilar mamlakatdagi sohaviy institutlar bilan aloqalarni mustahkamlash, shuningdek, to‘g‘ridan-to‘g‘ri investitsiyalarni jalb etish va respublika hududida ishlab chiqarishni mahalliylashtirish imkoniyatlarini ko‘rib chiqqan.

Muzokaralar yakunida uzoq muddatli hamkorlikka o‘zaro qiziqish borligi ta’kidlab o‘tilgan. Tomonlar O‘zbekiston agrar tarmog‘ining samaradorligi va ekologik barqarorligini oshirishga qaratilgan qo‘shma loyihalarni amalga oshirish uchun konstruktiv muloqotni davom ettirishga tayyor ekanliklarini bildirdi.

John Deere — 1837 yilda tashkil etilgan global korporatsiya bo‘lib, qishloq xo‘jaligi, qurilish va o‘rmon xo‘jaligi texnikalarini ishlab chiqarishda dunyodagi yetakchilardan biri hisoblanadi. Kompaniya dunyoning 170 dan ortiq mamlakatida keng distribyutorlik tarmog‘i hamda o‘zining ilmiy-ishlab chiqarish markazlariga tayanib faoliyat yuritadi.