Sirdaryodagi barcha maktablarda ta'lim sifati o‘rganiladi 

2019 yil 2 oktabr kuni Sirdaryo viloyat hokimligida bosh vazir o‘rinbosari Aziz Abduhakimov raisligida Ta'lim sifatini nazorat qilish davlat inspeksiyasi rahbari Ulug‘bek Toshkenboyev, xalq ta'limi vaziri Sherzod Shermatov, Davlat test markazi direktori Majid Karimov, Guliston davlat universiteti rektori Muhsin Hojiyevlardan iborat Respublika ishchi guruhining tashkiliy yig‘ilishi bo‘lib o‘tdi.

Ta'lim sifatini nazorat qilish davlat inspeksiyasi matbuot xizmati xabariga ko‘ra, yig‘ilishda viloyatda mavjud umumiy o‘rta ta'lim muassasalarini xatlovdan o‘tkazish, ularning moddiy-texnika bazasi ahvolini o‘rganish, maktab direktorlarining menejyerlik qobiliyatlari va bilimlari, fan metodistlari va o‘qituvchilar hamda o‘quvchilarning bilim darajalarini aniqlagan holda viloyat xalq ta'limi tizimining bugungi kundagi real holatini baholash bo‘yicha vazifalar belgilandi. 

Xususan, Vazirlar Mahkamasi huzuridagi Ta'lim sifatini nazorat qilish davlat inspeksiyasiga viloyatdagi barcha umumta'lim maktablarida o‘quvchilar bilimini sinovdan o‘tkazish va mavjud ta'lim sifati holatini baholash vazifasi yuklatildi.

Joriy yilda ilk marotaba respublikadagi mavjud o‘n mingga yaqin maktabdan 10 foizi (956 ta) da o‘rganishlar o‘tkazilgan va maktablar reytingi e'lon qilingan. Ushbu jarayonda to‘plangan tajriba asosida Sirdaryo viloyatidagi barcha maktablardan bittadan 9-sinflar tanlab olinib, o‘quvchilardan ona tili fani bo‘yicha diktant va matematika bo‘yicha yozma ishlar olinadi. Mazkur jarayonni shaffof va obektiv tashkil etish maqsadida Ta'lim inspeksiyasi hamda tegishli tashkilotlar vakillaridan iborat 15 ta ishchi guruh tuzilib, har bir o‘quvchi uchun alohida sinov materiallari tayyorlandi.

Bundan tashqari, Sirdaryo viloyati pedagoglari o‘rtasida so‘rovnoma o‘tkazilmoqda. Mazkur so‘rovnoma TALIS-2018 savollari asosida ishlab chiqilgan bo‘lib, maktabdagi o‘quv muhiti haqida va pedagogning kasbiy faoliyatiga oid 33 ta ijtimoiy savollardan iborat.

3 oktabr kuni respublika ishchi guruhi a'zolari tomonidan o‘quvchilar bilimini sinash va pedagoglar o‘rtasida so‘rovnoma o‘tkazish ishlari boshlab yuborildi. 8 kun davom etadigan o‘rganishlar jarayonida 15 ming nafarga yaqin o‘qituvchilar o‘rtasida so‘rovnoma o‘tkazish va 9-sinflar mavjud 299 ta umumta'lim maktablarining 8000 nafarga yaqin o‘quvchilarning bilim darajasini aniqlash rejalashtirilgan.

O‘rganish yakunida natijalar tahlil qilinadi va har bir maktab, tuman (shahar) va viloyat miqyosida ta'lim sifatini oshirish bo‘yicha «yo‘l xaritalari» ishlab chiqiladi. Shuningdek, mazkur hududda to‘plangan tajribani respublika miqyosida ommalashtirish choralari ko‘riladi.

Ma'lumot uchun, TALIS (Teaching and Learning International Survey) Iqtisodiy hamkorlik va taraqqiyot tashkiloti (OECD)ga a'zo mamlakatlar ishtirok etib kelayotgan xalqaro dastur hisoblanib, O‘zbekiston ham 2023 yilda TALIS'da ishtirok etishi rejalashtirilgan.