Limonchilik tarmog‘i bo‘yicha prezident qarori qabul qilinadi

Limonchilik tarmog‘ini yanada rivojlantirish va qo‘llab-quvvatlash chora-tadbirlari qabul qilinadi. Prezidentning tegishli qarori loyihasi muhokama uchun joylashtirildi.

O‘zbekiston Respublikasi Qishloq xo‘jaligi vazirligi, Iqtisodiyot va sanoat vazirligi hamda Moliya vazirligining O‘zbekiston Respublikasi Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi tarkibida qo‘shimcha 4 ta shtat birligidan iborat “Limonchilikni rivojlantirish bo‘limi”ni tashkil etish to‘g‘risidagi takliflariga rozilik berilishi mumkin.

2020 yil 1 yanvardan boshlab agroklaster va kooperatsiyalarga birlashgan limon yetishtiruvchi fermer va dehqon xo‘jaliklari, qishloq xo‘jaligi korxonalariga:

O‘zbekiston Respublikasi Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi qoshidagi Bog‘dorchilik va issiqxona xo‘jaligini rivojlantirish jamg‘armasi hisobidan yangidan barpo etilgan limonzorlarda ekilgan ko‘chatlarni xarid qilish bilan bog‘liq bo‘lgan xarajatlarning har bir gektar uchun 30 million so‘mdan oshmaydigan miqdorda;

O‘zbekiston Respublikasi Investitsiyalar va tashqi savdo vazirligi huzuridagi Eksportni rag‘batlantirish agentligi limon mevalarining eksporti bilan bog‘liq transport xarajatlarini (avtomobil, temir yo‘l, aviatsiya transporti) 25 foizgacha miqdorida subsidiya hisobiga qoplab berish tartibi o‘rnatiladi.

Qoraqalpog‘iston Respublikasi Vazirlar Kengashi va viloyatlar hokimliklari, O‘zbekiston Respublikasi Qishloq xo‘jaligi vazirligi Agrosanoat majmui va oziq-ovqat ta'minoti sohasidagi loyihalarni amalga oshirish agentligi, Investitsiyalar va tashqi savdo vazirligi, Yer resurslari, geodeziya, kartografiya va davlat kadastri davlat qo‘mitasi, O‘zbekiston fermer, dehqon xo‘jaliklari va tomorqa yer egalari kengashi, “Respublika limon yetishtiruvchilar va eksport qiluvchilar” uyushmasi, “Turonbank” aksiyadorlik tijorat banki bilan birgalikda:

2020 yil 1 martga qadar xalqaro moliya institutlari va xorijiy hukumat moliya tashkilotlaridan jalb etilgan kreditlar hisobidan 2020-2021 yillarda meva-sabzavotchilikka ixtisoslashgan 55 ta tumanlarda agroklaster va kooperatsiyalarga birlashgan fermer va dehqon xo‘jaliklari yer maydonlarida limon yetishtirish uchun kamida 20 gektar maydonda issiqxonalar qurish uchun loyiha tashabbuskorlarini aniqlash;

Agroklasterlar va kooperatsiyalar negizida tashkil etilgan yangi limonzorlarni qonunchilikda belgilangan tartibda aholiga uzoq muddatli ijara asosida 1 gektardan 5 gektargacha yer maydoni ajratishni ta'minlaydilar.

“Turonbank” aksiyadorlik tijorat banki tomonidan limonchilik sohasidagi loyihalarni moliyalashtirish uchun Osiyo taraqqiyot bankining 30,0 million AQSh dollari miqdoridagi kredit liniyasi jalb etilganligi, shuningdek, Xalqaro tiklanish va taraqqiyot bankining 20,0 million AQSh dollari miqdoridagi kredit liniyasini jalb etish choralari ko‘rilmoqda.

“Turonbank” aksiyadorlik tijorat banki limonchilik bilan shug‘ullanuvchi tashabbuskorlarni xalqaro moliya institutlari mablag‘lari hisobiga milliy valutada kreditlash amaliyotini joriy etadi.

O‘zbekiston Respublikasi Innovatsion rivojlanish vazirligi, Qishloq xo‘jaligi vazirligi bir oy muddatda limonning serhosil eksportbop navlarini yaratish, limon yetishtirish va ularni kasallik va zararkunandalardan himoya qilish bo‘yicha ilmiy-tadqiqot ishlarini rivojlantirish maqsadida 2020–2024 yillarga mo‘ljallangan fundamental va amaliy tadqiqotlar hamda innovatsion ilmiy-texnik loyihalar ro‘yxatini shakllantirsin va 2020 yildan boshlab grant tanlovlari asosida amalga oshirilishini ta'minlaydi.

O‘zbekiston Respublikasi Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi, akademik M.Mirzayev nomidagi bog‘dorchilik, uzumchilik va vinochilik ilmiy-tadqiqot instituti, Toshkent davlat agrar universiteti, “Respublika limon yetishtiruvchilar va eksport qiluvchilar” uyushmasiga:

limonchilik tarmog‘ini rivojlantirish borasida ilg‘or xorijiy tajribani chuqur tahlil qilgan holda resurstejamkor agrotexnologiyalar asosida limon yetishtirishga ixtisoslashtirilgan issiqxonalarni tashkil etish, limon yetishtirish, parvarishlash, saqlash va qayta ishlash bo‘yicha tavsiyalar ishlab chiqish va joylarga yetkazish;

2020 yil 1 martgacha limonni ekish, parvarishlash, yetishtirish, hosilni yig‘ishtirib olish, qayta ishlash, saqlash, saralash va eksport qilish masalalari bo‘yicha fermer va dehqon xo‘jaliklari rahbarlari hamda tomorqa yer egalari ishtirokida joylarda o‘quv-seminarlari o‘tkazish;

limonchilik seleksiyasi hamda ko‘chat yetishtirish texnologiyalari rivojlangan mamlakatlarda 2020-2021 yillar davomida iqtidorli yosh olimlar va mutaxassislar malakasini oshirish;

yuqori sifatli, serhosil, eksportbop, sertifikatlangan limon ko‘chatlarini yetishtirish va ularni fermer va dehqon xo‘jaliklari, qishloq xo‘jaligi korxonalariga shartnoma asosida yetkazib berish vazifalari yuklatiladi.