MIB: Yangi loyihadagi undiruv jarayoni odatiy kommunal to‘lovlarga mutlaqo tegishli emas

Bugun, 14 noyabr kuni Axborot va ommaviy kommunikatsiyalar agentligida «regulation.gov.uz» sayti orqali muhokamaga qo‘yilgan «Sud hujjatlari va boshqa organlar hujjatlarini majburiy ijro etish tizimini yanada takomillashtirish chora-tadbirlari to‘g‘risida»gi prezident farmoni yuzasidan brifing bo‘lib o‘tdi.

Majburiy ijro byurosining Huquqiy ta'minlash va huquqiy-aloqalar bo‘limi boshlig‘i Nasimxon Burxanovning so‘zlariga ko‘ra, loyihadan asosiy maqsad soddalashtirilgan majburiy ijro institutini joriy etish, bu tartib bo‘yicha davlat ijrochisi majburiy ijro harakatlarida qarzdor bilan muloqotga kirmasdan va undiruvni mol-mulkka qaratmagan holda, masofaviy amalga oshirishi nazarda tutilmoqda.

Bu tartib sudlar va boshqa vakolatli organlarning jismoniy shaxslardan ma'muriy jarima, soliq qarzi va davlat boji undirish haqidagi ijro hujjatlari bo‘yicha amal qiladi.

«Ijtimoiy tarmoqlarda bu loyiha noto‘g‘ri talqin qilinmoqda. Bu loyihaning ishlab chiqilishida jamoatchilik fikri hisobga olingan. Bu jarayon odatiy kommunal to‘lovlarni undirish jarayoniga mutlaqo tegishli emas. 

Undiruvni faqatgina hisobraqamlardan va plastik kartochkadan so‘zsiz yechib olish orqali hamda qarzdorlik mehnatga haq to‘lashning eng kam miqdoridan ko‘p bo‘lmagan hollarda esa (bu miqdor hozirda 635 ming so‘mgacha) qarzdorlikni ish haqiga qaratish orqali amalga oshiriladi», deya Nasimxon Burxanovning so‘zlarini keltirmoqda Kun.uz muxbiri.