MSK raisi: «Kamchiliklarimizni ko‘rsatib berishayotgani uchun jurnalist va blogerlarga rahmat»

17 dekabr kuni Xalqaro matbuot markazida bo‘lib o‘tgan Markaziy saylov komissiyasining navbatdagi majlisida MSK raisi Mirzo Ulug‘bek Abdusalomov tanqidiy chiqishlari orqali Oliy Majlis Qonunchilik palatasi hamda mahalliy kengashlarning deputatlari sayloviga tayyorgarlik jarayonidagi kamchiliklarni ko‘rsatib berayotgan jurnalist va blogerlarga minnatdorchilik bildirdi.

«Internet saytlari, matbuot nashrlari, radio va televideniyeda saylovga oid 60 mingdan ortiq chiqish qilindi. Buning ichida ikki mingdan oshig‘i tanqidiy materiallardir. Bu materiallar uchun jurnalistlarimizga, blogerlarimizga rahmat aytishimiz kerak. Kamchiliklarimizni ko‘rsatishyapti. Ularning chiqishlari orqali qayerda, qanday kamchiliklarga yo‘l qo‘yayotganimizni bilib olyapmiz. Tanqidiy chiqishlardan keyin darhol kamchiliklarni bartaraf etish chorasini ko‘ryapmiz. Bu – hammamiz uchun ham yaxshi bir yo‘nalish. Ayniqsa, saylov jarayonida ochiqlik, matbuot erkinligi ta'minlanayotganidan xursand bo‘lishimiz kerak», deya Mirzo Ulug‘bek Abdusalomovning so‘zlarini keltirmoqda Kun.uz muxbiri.

U ayrim nomzodlar haqidagi plakatlar, saylovoldi tashviqotiga oid bannerlardagi xatolar aynan blogerlarning chiqishlari orqali aniqlanib, Markaziy saylov komissiyasining aralashuvi bilan bu kabi muammolar tezda bartaraf etilganini qayd etib o‘tgan.

MSK a'zosi Alisher Isoqboyevning Kun.uz’ga ma'lum qilishicha, hozirgi kunga qadar akkreditatsiyadan o‘tkazilgan mahalliy ommaviy axborot vositalari vakillari soni 283 nafarga, xorijiy ommaviy axborot vositalari vakillari soni esa 99 nafarga yetdi.

Bugungi majlisda Saylov kodeksining 14, 16 va 35-moddalari hamda Markaziy saylov komissiyasining 2019 yil 5 oktyabrdagi 952-son qarori bilan tasdiqlangan Saylov kampaniyasi davrida ommaviy axborot vositalari vakillarini akkreditatsiyadan o‘tkazish tartibi to‘g‘risidagi nizomga muvofiq Belgiyaning «Diplomat Magazine» jurnali, AQShning «Radio svoboda» Yevropa xizmati, Tailandning «NBT World» telekanali, Shveytsariyaning «Diva International» jurnali, «Kun.uz» internet nashri, «Podrobno.uz» yangiliklar agentligining saylovlarni yoritishda ishtirok etuvchi 20 nafar jurnalistni akkreditatsiyadan o‘tkazish bo‘yicha qaror qabul qilindi.

Shuningdek, tadbirda saylovga oid tahliliy materiallarning kam ekani, ommaviy axborot vositalaridagi chiqishlarning aksariyati shaxsiy fikr, shov-shuvli xabarlardan iborat bo‘lib qolayotgani tanqid qilindi.