MSK raisi: «Saylov komissiyalari a'zolariga tarqatiladigan pullarga ko‘z olaytirganlarga nisbatan jinoyat ishi qo‘zg‘atiladi»

Markaziy saylov komissiyasi raisi Mirzo Ulug‘bek Abdusalomov joylarda saylov komissiyalari a'zolariga tarqatiladigan pul haligacha egalariga yetib bormagani kuzatilayotgani haqida gapirib, bu pullarga ko‘z olaytirayotganlarga nisbatan jinoyat ishi qo‘zg‘atilishini ta'kidladi.

«Saylov uchastkalarida ishlayotganlarga ish haqini tarqatish bo‘yicha joylarda muammolar kuzatilyapti. Bizga berilgan ma'lumotlarga ko‘ra, saylov komissiyalari ishiga jalb qilingan xodimlarga ajratilgan pullar yuz foiz tarqatilgan. Lekin, afsuski, ushbu pullar ayrim uchastkalarga yetib bormagan ko‘rinadi. Bu haqda Call-markazimizga murojaatlar bo‘lyapti, ijtimoiy tarmoqlarda yozilyapti. Bugun – saylov komissiyalari a'zolariga transport va boshqa xarajatlarni qoplash uchun kompensatsiya to‘lovlari to‘liq yetkazib berish uchun oxirgi kun.

Yana bir gap. Ba'zi joylarda saylov komissiyalari a'zolariga tarqatiladigan pulga ham ko‘z olaytirayotganlar chiqyapti. Bu – umuman chidab bo‘lmaydigan hol. Qayerda shunday holat aniqlansa, bilib qo‘yinglar, jinoyat ishi qo‘zg‘attiramiz, to‘plangan ma'lumotlarni prokuraturaga beramiz, ishni oxirigacha yetkazamiz», deya MSK raisining so‘zlarini keltirmoqda Kun.uz muxbiri.

MSK raisi o‘rinbosari Mahmud Istamovning Kun.uz’ga ma'lum qilishicha, 2019 yilning 9 dekabridan boshlab okrug va uchastka saylov komissiyalari raislariga 500 ming so‘mdan, komissiyaning boshqa a'zolariga 250 ming so‘mdan kompensatsiya to‘lanishi belgilangan. Bu soliq chegirilgandan keyin qo‘lga tegadigan miqdor. Joriy yildagi saylov kampaniyasi uchun davlat budjetidan 230 milliard so‘m ajratilgan bo‘lsa, shundan 70 milliard 600 million so‘mi, ya'ni 30,6 foizi saylov komissiyalari ishiga jalb qilingan komissiya a'zolariga qo‘shimcha kompensatsiya to‘lovlari uchun sarflanadi. Komissiya a'zolari mehnatiga haq to‘lanishi uchun viloyat, tuman shahar saylov komissiyalari raislari javobgardir.

Eslatib o‘tamiz, okrug va uchastka komissiya a'zolari 2019 yil 12 noyabrdan boshlab doimiy ravishda faoliyat olib bormoqda.