«Yelkalari ustidagi boshlari ketadi» - Erdo‘g‘an Suriyani yana bir bor ogohlantirdi

Turkiya prezidenti Rajab Toyyib Erdo‘g‘an Adolat va taraqqiyot partiyasining viloyat Kengashi yig‘ilishida so‘zga chiqdi. Yig‘ilish oldidan «Bahor qalqoni» amaliyoti haqida so‘z yuritgan Erdo‘g‘an «shahidlar tepasi bo‘sh emasligi va bo‘sh qolmasligi»ni ta'kidladi.

Erdo‘g‘anning nutqidan kelib chiquvchi satrboshilar quyidagicha:

«Bahor qalqoni» harakati

«Biz Idlibdagi operatsiyalarimizni cheklangan tartibda davom ettirayotgan edik, chunki biz bu masalani sog‘lom fikr va tinchlik yo‘li bilan hal qilishni istagandik. Shu maqsadda biz diplomatiya kanallari samarali ishlashi uchun so‘nggi daqiqagacha harakat qildik va ishladik. Ushbu masala mamlakatimiz uchun qanchalik muhimligi, ushbu maqsad orqali nimani ko‘zlaganimizni takror-takror ta'kidladik. Biroq niyatimiz noto‘g‘ri tushunilganini ko‘rdik.

Shu munosabat bilan operatsiyalarimizni 34 askarimiz shahid bo‘lgan 27 fevraldan e'tiboran rejimning barcha elementlarini nishonga oladigan shaklda keng qamrovli holatga keltirdik. Biz ushbu operatsiyani «Bahor qalqoni» operatsiyasi deb nomladik. «Furot qalqoni», «Zaytun novdasi», «Tinchlik bulog‘i» operatsiyalari bilan nimani maqsad qilgan bo‘lsak, bu harakatda ham shu bir g‘oyani ko‘ryapmiz.

Biz endi chegaralarimiz terrorchilik tashkilotlari va mamlakatimiz sarhadlariga ko‘z tikkan mustabid tuzum tarafidan qurshab olinishiga, millionlab boshpanasizlar yuki yelkamizga muttasil ravishda ortilishiga izn bermaymiz va bu qarorda qat'iymiz.

Hali Idlib shahidlarining tuprog‘i sovib ulgurmay, rejimni eng og‘ir yo‘qotishlarga uchratdik. Hozirga qadar 135 tank, 22 zirhli transport vositasi, 45ta to‘p, 44ta ko‘p barelli raketalar, 5ta havo mudofaasi rampasi, 12ta tankka qarshi qurol, 4ta minomyot, 2ta uchuvchisiz samolyot, 8ta vertolyot, 49ta turli transport vositalari, 7ta o‘q-dori, 24ta zirhli transport vositalari, 9ta o‘q-dori ombori, 2ta samolyot, 2ta raketa uchiruvchisi va rejimning 2557 askarini yakson qildik.

Qon to‘kilmasligi, odamlar qurbon bo‘lmasligi, azob chekilmasligi uchun qilgan harakatlarimizni zaiflik va tortinchoqlikka yo‘yganlarga haqiqiy kuchimizni ko‘rsatishni boshladik. Hozircha rejimning odamlar va jihozlardan mahrum bo‘lishi – bu faqat boshlanishidir.

Atrofda mamlakatimizni «nomi boru, o‘zi yo‘q» davlatlardan biri, deb bilganlar bor. Biz bu g‘ofillarga Turkiyaning zarur paytda jon bergan, ammo bo‘yin egmagan buyuk bir davlat ekanini ko‘rsatyapmiz». 

«Yelkalari ustidagi boshlari ketadi»

«Ishlar shu nuqtaga kelganidan biz juda afsusdamiz. Buning sababi ularning ortida turgan kuchlarning soyasini o‘z tanalari deb bilib, bizga qarshi chiqqanlardir. Har biri jonimizning bir parchasi bo‘lgan askarlarimizning hayotiga qasd qilganlarni yer bilan yakson etish bo‘ynimizdagi qarzdir. Bo‘lib o‘tgan voqealardan ibrat olmaganlarning kuzatuv punktlarimizga hujum qilish bilan tahdid etishlari hali ham ularning aqllari kirmaganidan dalolatdir. Agar Turkiya belgilagan chegaradan tashqariga zudlik bilan chiqib ketishmasa, yelkalari ustidagi boshlari ketadi»

Rossiya va Eron ochiqlamasi

«Yana bir bor Rossiya va Eronga murojaat qilaman. Suriyada siz bilan hech qanday muammomiz yo‘q. Turkiyaning Suriyadagi kurashi sarhadlarni kengaytirish urinish ham, strategik bazaga ega bo‘lish ham emas. Biz Suriyada ushbu mamlakatdan qochib, o‘lkamizga oqib kelayotgan millionlab odamlar keltirib chiqargan gumanitar inqirozni hal etish, shuningdek, sarhadlarimiz xavfsizligini ta'minlash uchun kurashmoqdamiz. Ikki masala ham biz uchun juda muhimdir.

Hududida 3,7 million, chegaralarida 1 milliondan ortiq kishiga panoh bo‘lgan davlat na Eron, na Rossiyadir. Bu yukni biz 9 yildan beri yolg‘iz boshimiz bilan ko‘tarib kelmoqdamiz. Turkiya buni zimmasiga olmoqda. «Eshiklarni yoping», deyishyapti. U ish bitdi, endi G‘arb hisob beradi. Gaz bombasi, haqiqiy bomba bilan qo‘rqitmoqchi bo‘lganlar endi hisob berishga majbur. G‘arbning qochoqlar qo‘rquvi bilan aytgan balandparvoz gaplari real hayotda aniq bir ifodasini topmayapti. Biz yillar davomida «Suriyada xavfsiz zonalar yarataylik, tuzumdan qochgan odamlar bu yerda joylashib olsin», degan chaqiriqlar bilan chiqdik. Yevropaning hech bir davlati ushbu chaqiriqni qo‘llab-quvvatlamadi. Chegaralarimizni ochganimizdan beri Yevropaga kirganlar soni 100 mingdan oshdi. Tez orada bu raqam millionlarda ifodalanadi.

Endi chegaralarimizni ochganimiz uchun barchalari ayyuhannos solyaptilar. Yo bu insonlarni o‘z tuproqlarida munosib bir hayotga qovushtiramiz, yoki har kim bu yukdan o‘z chekiga tushganini oladi. Endi bir tomonlama fidokorlik davri tugadi. 

Mamlakatimizga yordam berishini bildirgan ayrim davlatlar hatto tuklari ham qimir etmay, voqealar rivojini kuzatganidan xabardormiz. Go‘yo xalqaro miqyosda tinchlik va barqarorlik, xavfsizlikni ta'minlash uchun tashkil etilgan tuzilmalar majlisbozlik, axborot berish, qoralashdan boshqa ish qilmaydi.

Turkiya o‘z kurashini qandaydir bir davlat yoki tashkilotga ishonib emas, o‘z yuragiga, o‘z bilagiga, o‘z insoni, o‘z imkoniga tayangan holda yuritmoqda.

…Bundan tashqari, Turkiya shu paytga qadar Suriyada na Rossiyani, na Eronni to‘g‘ridan-to‘g‘ri nishonga olmagan, olmaydi ham. Harakatlarimiz bilan faqat askarlarimiz qonini to‘kkan rejim unsurlarini yo‘q qilyapmiz. Bu hassosiyatimizga hurmat ko‘rsatiladi, degan umiddamiz.

Turkiya har bir masaladagi kabi Suriyadagi muammoni ham o‘z imkonlari bilan hal eta oladigan iroda va iqtidorga sohibdir. Bu kunlar ayni paytda haqiqiy do‘st va makkor dushmanlarni ayirib beruvchi palladir. Oldimizdagi kunlarda kechadigan voqealar bu farqni yanada aniqlashtiradi. Bu kurash bizning shaxsiy tanlovimiz emas, millatimizning umumiy irodasi bilan yuritilmoqda. Suriyadagi o‘yinni millatimiz bilan birga ko‘rdik, tashxis qo‘ydik va shunga asosan harakat qildik. Bu millat 15 iyulda nima uchun ko‘chalarga chiqqan bo‘lsa, bugun ham Turkiya ayni sabab bilan Suriyadadir. Bu millat Kurdiston ishchilar partiyasi, IShID tajovuzlariga qarshi qanday ko‘ksini kergan bo‘lsa, bugun ham Turkiya ayni sabab bilan Idlibda, Suriyaning boshqa joylaridadir».