«Sportchi biroz ehtiyotsizlik qilgan». Doping tufayli Olimpiadadan mahrum qilingan Hasanboy Rahimov borasida bayonot berildi

O‘zbekistonlik erkin kurashchi Hasanboy Rahimov (-125 kg) antidoping qoidalarini buzgani uchun 2020 yilgi Tokio Olimpiadasi yo‘llanmasidan mahrum qilingani haqida xabar berilgandi. Jismoniy tarbiya va sport vazirligi bu borada rasmiy bayonot berdi.

 «O‘zbekiston sport kurashlari assotsiatsiyasiga Birlashgan sport dunyosi United World Wrestling (UWW) federatsiyasidan ham rasmiy maktub kelib tushgan. Maktub mazmunida UWW Mustaqil antidoping tashkiloti (ITA) tahlillariga asoslangan holda Hasanboy Rahimovda doping aniqlanganini aytilgan.

 Bayon qilinishicha, Hasanboy Rahimovdan o‘tgan yili Qozog‘istonning Nur-Sulton shahrida o‘tkazilgan sport kurashlari bo‘yicha kattalar o‘rtasidagi Jahon chempionati chog‘ida olingan doping-tahlil ijobiy natija bergan. Tekshiruv Germaniyaning Drezden shahridagi laboratoriyada o‘tkazilgan. Rahimovning qon tarkibida taqiqlangan klomifen (S4 toifa. gormonlar va modulyatorlar, metabolizm/klomifen) moddasi borligi aniqlangan.

 Aynan Nur-Sultondagi jahon chempionatida Hasanboy Rahimov 125 kg vazn toifasida bronza medalini qo‘lga kiritish barobarida Tokio-2020 Olimpiadasi litsenziyasini ham rasmiylashtirgan edi.

 O‘zbekiston sport kurashlari assotsiatsiyasining ma'lum qilishicha, Hasanboy Rahimov sog‘lig‘ida yuzaga kelgan muammo sabab shifokor tavsiyasiga ko‘ra, dori vositasi qabul qilgan. Ammo bu vosita tarkibida taqiqlangan klomifen moddasi borligini bilmagan. Sportchi o‘sha paytda sog‘lig‘ini birinchi o‘ringa qo‘ygani uchun biroz ehtiyotsizlik qilgan», - deyiladi Jismoniy tarbiya va sport vazirligi rasmiy xabarida.

 Ma'lumot uchun, Hasanboy Rahimovdan tashqari suriyalik Badha Xutaba (-125 kg) va fransiyalik Zelimxon Hojiyev (-74 kg) ham qonidan doping topilgani sababli diskvalifikatsiya qilingandi.