Qoʻshimcha funksionallar
-
Tungi ko‘rinish
Eronda qolib ketgan fuqarolar vatanga qaytariladi va karantinga joylashtiriladi
Eron-Turkmaniston chegarasi yopilgani sababli «Lutfobod» (Eron) chegara postida qolib ketgan 14 nafar o‘zbekistonlik haydovchi va ushbu mamlakatdagi boshqa o‘zbekistonliklar, jami 28 kishi vatanga qaytariladi.
Mudofaa vazirligi tomonidan Eronga insonparvarlik yukini yetkazish uchun ajratilgan havo kemasi ushbu mamlakatda bo‘lib turgan 28 nafar o‘zbekistonlikni olib qaytadi va ular ikki hafta davomida karantin holatida saqlanadi.
O‘zbekiston Respublikasi Hukumati portali tomonidan ma'lum qilinishicha, prezidentning alohida ko‘rsatmasiga muvofiq, Mudofaa vazirligi tomonidan Eronga insonparvarlik yukini yetkazish uchun ajratilgan havo kemasida ayni jarayonda Eronda qolib ketgan 14 nafar yuk tashuvchi haydovchilar, tadbirkorlar, talabalar – jami 28 nafar vatandoshimiz olib kelinadi. Ular va samolyot ekipaji a'zolari qaytib kelgach, belgilangan tartibda malakali shifokorlar, soha mutaxassislari nazorati ostida ikki hafta muddatda karantinda saqlanadi.
Bundan avvalroq Eron Islom Respublikasi hukumatining O‘zbekiston Respublikasi Prezidenti Shavkat Mirziyoyevga yangi koronavirus COVID-19 kasalligi tarqalishini bartaraf etish uchun zarur bo‘lgan tibbiy buyumlar va vositalar bilan ta'minlashda amaliy yordam ko‘rsatish yuzasidan murojaati asosida ushbu mamlakatga insonparvarlik yordami jo‘natilishi xabar qilingandi.
«Davlatimiz rahbari Shavkat Mirziyoyevning topshirig‘iga asosan Eronning ushbu murojaatini qo‘llab-quvvatlash, shuningdek mazkur xavfli infeksiyaga qarshi kurashish bo‘yicha birgalikdagi sa'y-harakatlarni kuchaytirish maqsadida steril tibbiy qo‘lqoplar, himoya qiluvchi kombinezonlar, maxsus tibbiy formalar, niqoblar, doka, spirt, gigiyenik gellar va dori vositalari singari umumiy og‘irligi qariyb olti tonna bo‘lgan tibbiy buyumlar shaklida insonparvarlik yordami yuborilmoqda.
Favqulodda vaziyatlar vazirligi insonparvarlik yukini shakllantirish va yetkazib berish uchun mas'ul etib belgilangan», deyiladi xabarda.
Eslatib o‘tamiz, mart oyi boshida Eronning Turkmaniston bilan chegarasidagi bojxona postida qolayotgan o‘zbekistonlik haydovchilar prezidentga videomurojaat bilan chiqishgan, keyinroq Tashqi ishlar vazirligi ular bilan bog‘liq vaziyatni nazoratga olgandi.
- So‘nggi ma'lumotlarga ko‘ra, butun dunyoda virusdan zararlanganlar soni 138 152 nafarni tashkil qilmoqda, qurbonlar soni 5 mingdan oshib ketdi - 5080.
- Eronda esa koronavirus tufayli vafot etganlar soni bir kunda 85 kishiga ko‘payib, 514 kishiga yetdi. So‘nggi 24 soat ichida kasallikni yuqtirib olish bilan bog‘liq yana 1289ta qayd etildi va barcha kasallanganlar soni 11 364 nafarga yetdi.
