O‘zbekiston Eronga insonparvarlik yordami jo‘natadi

Yordam Eronning koronavirusga qarshi kurashish bo‘yicha sa'y-harakatlarini qo‘llab-quvvatlash va virusni yengish uchun birgalikdagi chora-tadbirlarni ta'minlash maqsadida jo‘natilmoqda.

O‘zbekiston Vazirlar Mahkamasining “Eron Islom Respublikasiga insonparvarlik yordamini yuborish to‘g‘risida Hukumat farmoyishi”da Eronga quyidagi tovarlar yetkazilishi aytilgan: 

• bir martalik steril tibbiy qo‘lqoplar;
• himoya qiluvchi kombinezon;
• maxsus tibbiy forma;
• tibbiy niqoblar;
• tibbiy doka;
• tibbiy spirt;
• gigiyenik gel;
• “Rutan” tabletkalari.

Insonparvarlik yukini kuzatib borish va topshirish uchun Eronga favqulodda vaziyatlar vazirining o‘rinbosari boshchiligida O‘zbekiston delegatsiyasi yuboriladi.

Avvalroq, 12 fevralda va 3 martda O‘zbekiston Xitoyga ikkita insonparvarlik yordamini jo‘natgandi.

Oxirgi ma'lumotlarga ko‘ra, Eronda koronavirusdan kasallanganlar soni 9 mingni, undan vafot etganlar soni 354 nafarni tashkil qilmoqda.