«Zamonaviy maktab» talablari asosida amalga oshiriladigan ishlarning nazorati qanday bo‘ladi?

Vazirlar Mahkamasining «Umumta'lim obektlarida «Zamonaviy maktab» talablari asosida amalga oshiriladigan loyihalash va qurilish-montaj ishlarining nazorati tartibi to‘g‘risidagi nizom»ni tasdiqlash to‘g‘risida»gi qarori loyihasi e'lon qilindi.

Belgilanishicha, nizom qoidalari moliyalashtirish manbaidan qat'iy nazar yangidan quriladigan, rekonstruksiya qilinadigan va mukammal ta'mirlanadigan barcha umumiy o‘rta ta'lim muassasalarida amalga oshiriladigan loyihalash va qurilish-montaj ishlari uchun majburiydir.

Umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash jarayonida loyihalash va qurilish-montaj ishlarining «Zamonaviy maktab» talablari asosida amalga oshirilishining nazorati quyidagi prinsiplar asosida amalga oshiriladi:

nazoratni amalga oshirishning qonuniyligi, xolisligi va oshkoraligi;

yuridik va jismoniy shaxslarning huquqlari hamda qonuniy manfaatlariga rioya qilish;

xo‘jalik sub'yektlari moliyaviy-xo‘jalik faoliyatiga aralashmaslik.

Umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash jarayonida loyihalash ishlari «Zamonaviy maktab» namunaviy loyihalariga mos ravishda amalga oshiriladi.

Umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash jarayonida loyihalar «Injiniring kompaniyasi» DUK tomonidan tayyorlanadigan texnik topshiriqlarga asosan ishlab chiqiladi.

Umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlashda buyurtmachi vazifasini amalga oshiruvchi tashkilotlar har yili oktabr oyining oxirgi kuniga qadar keyingi yilda amalga oshiriladigan yangi qurilish, rekonstruksiya va mukammal ta'mirlash ishlari uchun loyiha hujjatlariga texnik topshiriqlarni ishlab chiqish maqsadida «Injiniring kompaniyasi» DUK bilan to‘g‘ridan-to‘g‘ri shartnomalar tuzadilar. Shartnoma qiymat keltirilgan mezon asosida aniqlanadi.

«Injiniring kompaniyasi» DUK umumiy o‘rta ta'lim muassasalarini «Zamonaviy maktab» namunaviy loyihalari asosida yangidan qurish, rekonstruksiya qilish va mukammal ta'mirlash jarayonida sifat monitoringini amalga oshiradi.

Sifat monitoringi umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash jarayonida qurilish-pudrat tashkilotlari tomonidan bajarilgan ish hajmlarining loyiha-smeta hujjatlariga mosligi, ishlatilayotgan materiallarning shaharsozlik normalari, qoidalari, texnik shartlar, sanitariya normalari va boshqa me'yoriy hujjatlar talablariga muvofiqligi yuzasidan olib boriladigan nazoratni nazarda tutadi.

Buyurtmachi tashkilotlar «Injiniring kompaniyasi» DUKni obektlarda qurilish-montaj ishlari boshlanganligi to‘g‘risida yozma ravishda ogohlantirgan vaqtdan boshlab 10 kun ichida sifat monitoringini amalga oshirilishiga kirishiladi. Yozma ogohlantirish qurilish-montaj ishlari boshlangan vaqtdan boshlab 3 kun ichida amalga oshiriladi. Ma'lum obektda qurilish-montaj ishlari boshlanganligi to‘g‘risida yozma ogohlantirishning o‘z vaqtida taqdim etilmaganligi uchun javobgarlik buyurtmachi tashkilotlar zimmasiga yuklanadi.

Sifat monitoringi rejali tekshiruv (sub'yektning moliyaviy-xo‘jalik faoliyatiga aralashmasdan) ko‘rinishida amalga oshiriladi. Rejali tekshiruv tadbirkorlik sub'yektlari faoliyatida o‘tkaziladigan tekshiruvlarni muvofiqlashtirish bo‘yicha vakolatli organni xabardor qilmagan holda hech qanday to‘siqlarsiz «Injiniring kompaniyasi» DUK tomonidan tasdiqlanadigan reja-jadval asosida amalga oshiriladi.

«Injiniring kompaniyasi» DUKning sifat monitoringini amalga oshirish bilan bog‘liq xarajatlar muvofiq tuziladigan shartnomalarda nazarda tutiladi.

Sifat monitoringini amalga oshirish jarayonida zarur hollarda dalolatnoma, yozma ko‘rsatma, taqdimnoma va boshqa hujjatlar rasmiylashtirilishi mumkin.

Sifat monitoringini amalga oshirish jarayonida «Injiniring kompaniyasi» DUK mutaxassislari quyidagi vakolatlarga ega:

qurilish obektiga pudrat tashkiloti vakili, buyurtmachining texnik nazoratchisi, loyihachining mualliflik nazorati xodimini qurilish bosqichidan qat'iy nazar chaqirtirish va tushuntirish olish;

bino va inshootlarning sifatiga ta'sir qiluvchi, tasdiqlangan loyihadan chetga chiqish aniqlangan holatlarda qurilish-montaj ishlarini mos ravishda, biroq 30 kundan ortiq bo‘lmagan muddatga to‘xtatib turishga hamda nomuvofiqliklar (kamchiliklar)ni bartaraf etish bo‘yicha ijro etilishi majburiy bo‘lgan ko‘rsatmalar berish, bunda kamchiliklar ko‘rsatmada belgilangan muddat ichida bartaraf etilmagan taqdirda o‘rnatilgan tartibda tegishli qurilish sohasida nazorat hududiy inspeksiyasiga huquqbuzarliklarning bartaraf etish yuzasidan taqdimnoma kiritish;

bino va inshootlarning sifatiga ta'sir qiluvchi bartaraf etish mumkin bo‘lmagan loyihadan chetga chiqish holatlari aniqlanganda 3 ish kunidan ortiq bo‘lmagan muddatda demontaj ishlarini amalga oshirishni talab qilish;

qurilish-montaj ishlari bajarilishida ishchi loyiha, shaharsozlik norma va qoidalari talablarini buzib bajarilgan sifatsiz holatlar aniqlangan taqdirda belgilangan tartibda sifatsiz ishlar hajmini umumiy ish hajmidan chegirib tashlash yuzasidan buyurtmachiga ijro etilishi majburiy bo‘lgan yozma ko‘rsatma berish.

Buyurtmachi tashkilotlar «Injiniring kompaniyasi» DUKni umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash ishlari yakunlangan vaqtdan boshlab 3 kun ichida bu to‘g‘risida yozma ravishda ogohlantirishi shart.

Obektlarda qurilish-montaj ishlari yakunlangani to‘g‘risida ma'lumot taqdim qilingan paytdan boshlab 5 ish kunidan kechikmasdan «Injiniring kompaniyasi» DUK tomonidan buyurtmachi tashkilot, pudratchi (yordamchi pudratchi), loyihachi tashkilotlar vakillari ishtirokida bajarilgan ishlarning yakuniy nazoratini amalga oshirishga kirishiladi. Yakuniy nazorat davomiyligi amalga oshirilgan ishlar hajmi, bino-inshootlarning murakkablik darajasidan kelib chiqqan holda, lekin 30 kundan oshmagan muddatda amalga oshiriladi.

Yakuniy nazorat «Injiniring kompaniyasi» DUKning bir yoki bir necha mutaxassislari tomonidan, shuningdek zarur hollarda to‘g‘ridan –to‘g‘ri tuziladigan shartnomalar asosida malakali mutaxassislarni jalb qilgan holda amalga oshirilishi mumkin.

«Injiniring kompaniyasi» DUKning yakuniy nazoratni amalga oshirish bog‘liq xarajatlar tuziladigan shartnomalarda nazarda tutiladi.

Buyurtmachi tashkilot yakuniy nazoratni amalga oshirish uchun zarur bo‘ladigan barcha hujjatlarni «Injiniring kompaniyasi» DUKga taqdim etilishiga mas'ul hisoblanadi.

Qurilishi tugallangan umumiy o‘rta ta'lim muassasalarini foydalanishga qabul qilishga «Injiniring kompaniyasi» DUKning amalga oshirilgan qurilish-montaj ishlarining sifati yuzasidan tayyorlanadigan yozma xulosasi taqdim qilingandan keyingina yo‘l qo‘yiladi.

Yakuniy nazorat natijalari uch nusxada dalolatnoma tuzish orqali rasmiylashtiriladi. Dalolatnomalarning bir nusxasi «Injiniring kompaniyasi» DUKda saqlanadi, ikkinchi va uchinchi nusxalari buyurtmachi tashkilot va Bosh pudratchiga taqdim etiladi.

«Injiniring kompaniyasi» DUK tomonidan amalga oshirilgan yakuniy nazorat natijasiga ko‘ra yangidan qurish, rekonstruksiya qilish va mukammal ta'mirlash jarayonida ishchi loyiha, «Zamonaviy maktab» texnik talablarini shaharsozlik norma va qoidalari talablarini buzib bajarilgan sifatsiz holatlar aniqlangan taqdirda, qurilish-pudrat tashkiloti, loyihachilar bilan birgalikda ushbu aniqlangan kamchilik va nuqsonlarni 15 kundan oshmagan muddatda bartaraf etishlari yuzasidan yozma ko‘rsatma rasmiylashtirilishi, mabodo aniqlangan kamchilik va nuqsonlarni bartaraf etish imkoni mavjud bo‘lmagan taqdirda, sifatsiz bajarilgan, belgilangan texnik talablarga mos kelmagan holda bajarilgan hamda ortiqcha hajmda ko‘rsatilgan qurilish-montaj ishlari qiymatini iqtisodiy sudlar orqali undirish bo‘yicha da'vo arizalari kiritilishi mumkin.

Bunda, umumiy o‘rta ta'lim muassasalarini yangidan qurish, rekonstruksiya qilish va mukammal ta'mirlash jarayonida sifatsiz bajarilgan, belgilangan texnik talablarga mos kelmagan holda bajarilgan hamda ortiqcha hajmda ko‘rsatilgan qurilish-montaj ishlari bo‘yicha undirilgan summalarning 90 foizi tegishli obektlardagi aniqlangan kamchiliklarni bartaraf etish uchun bo‘ysunuviga ko‘ra Qoraqalpog‘iston Respublikasi Xalq ta'limi vazirligi va viloyatlar xalq ta'limi boshqarmalarining maxsus shaxsiy g‘azna hisobvaraqlariga, 10 foizi esa «Injiniring kompaniyasi» DUKning maxsus hisob raqamiga xodimlarni rag‘batlantirish va moddiy-texnik bazasini mustahkamlash tadbirlariga yo‘naltiriladi.