Oilaviy tadbirkorlik sub'yektlariga yuridik shaxs tashkil etmagan holda 3 nafargacha doimiy ishchini yollash imkoni beriladi

Oliy Majlis Qonunchilik palatasining 2020 yil 23 aprel kuni bo‘lib o‘tgan majlisida “Oilaviy tadbirkorlik to‘g‘risida”gi Qonunga o‘zgartish va qo‘shimchalar kiritish haqida”gi qonun loyihasi ikkinchi o‘qishda moddama-modda muhokama qilindi.

Ta'kidlanganidek, mazkur qonun loyihasi oila institutini mustahkamlash konsepsiyasini amalga oshirish hamda oilaviy biznesni kelajakda rivojlantirish yo‘li bilan oilalarning farovonligi hamda turmush darajasini yuksaltirish maqsadida ishlab chiqilgan.

Aholining daromad topishga qaratilgan muayyan mehnat faoliyati bilan shug‘ullanishiga, oilaviy tadbirkorlik rivojlanishiga har tomonlama ko‘maklashish, mazkur yo‘nalishdagi ishlarni takomillashtirish va tizimli tashkil etish ushbu loyihaning asosiy maqsadi hisoblanadi.

Qonun loyihasi bilan kiritilayotgan o‘zgartish va qo‘shimchalar bilan yuridik shaxs tashkil etmagan holda, oilaviy tadbirkorlik sub'yektlariga 3 nafargacha doimiy ishchilarni yollash imkoniyati berilmoqda. Shuningdek, noturar joy bino-inshootlaridan foydalanilganda kommunal to‘lovlar uchun to‘lov aholi uchun belgilangan tariflar bo‘yicha va shartlar asosida amalga oshirilishi belgilanmoqda.

Deputatlarning fikriga qo‘ra, mazkur qonun loyihasining qabul qilinishi aholi bandligini ta'minlash, oilaviy tadbirkorlikni rivojlantirish hamda aholi turmush darajasini yanada yaxshilashda muhim huquqiy asos bo‘ladi.