KXDR Janubiy Koreyaga qarshi urush bilan tahdid qildi

KXDR hukumati Janubiy Koreyani tashviqot varaqalari tarqatganligi uchun mamlakat qurolli kuchlari  "qasos akti" tayyorlayotgani haqida ogohlantirdi. Bu haqda Rodong Sinmun gazetasi yozmoqda.

"Bizning yengilmas inqilobiy armiyamiz xalqimiz tahqirlangani uchun qasos aktini amalga oshiradi", - deyiladi gazeta maqolasida. 

Qayd etilishicha, "Janubiy Koreya hukumati oliy rahbariyatni haqorat qilganligi uchun javobgarlikdan qochib qutulolmaydi. Qasos akti oxirigacha davom etadi". 

Shanba kuni Koreya mehnat partiyasi markaziy qo‘mitasi bo‘limi mudirining o‘rinbosari, KXDR yetakchisi Kim Chen Inning singlisi Kim Yo Chjon Pxenyan yaqin vaqt ichida Janubiy Koreyaga nisbatan "navbatdagi qadam"ni qabul qilishini aytgandi.

U shuningdek, navbatdagi harakatlar bo‘yicha qaror qabul qilish Koreya xalq armiyasining bosh shtabi zimmasiga yuklatilishini qayd etdi.

KXDR 9 iyundan buyon Janubiy Koreya bilan barcha aloqa kanallarini uzib qo‘ygan. Bunga Janubiy Koreyaning Shimolga tashviqot varaqalari jo‘natganligi sabab bo‘lganligi aytildi.