07:04 / 16.06.2020
7309
Қозоғистон бош вазири вертолёти фавқулодда қўнишни амалга оширгани маълум қилинди  

Қозоғистон бош вазири Аскар Мамин бўлган вертолёт 12 июнда мажбурий қўнишни амалга оширгани маълум қилинди.

Фото: planespotters.ne

Қозоғистон бош вазири Аскар Мамин бўлган вертолёт 12 июнда мажбурий қўнишни амалга оширгани маълум қилинди. Воқеа оқибатида йўловчилар ва экипажга жабр етмаган.

15 июнда “Казавиаспас” АЖ Маминнинг вертолёти Жамбил вилоятида фавқулодда қўнишни амалга оширганини маълум қилди. Мамин бу ерга амалий сафар билан ташриф буюрган. Вертолёт учувчилари гидравлик тизим ишламай қолгани сабабли Тараз шаҳридан 140 км узоқликдаги Тасоткел қишлоғида фавқулодда қўнишни амалга оширишган.

Вертолётга талафот етмаган. Бош вазир ўз парвозини захирадаги вертолётда давом эттирган.

Мамин Жамбил вилоятига ҳудуднинг ижтимоий-иқтисодий ривожланиши давлат дастурлари амалга оширилишини кўздан кечириш учун келган. Унга сафари давомида вилоят раҳбари Бердибек Сапарбаев ҳамда бир қатор вазирликлар раҳбарлари ҳамроҳлик қилган. Парвоз учун “Казавиаспас”га тегишли Ми-171 вертолётидан фойдаланилган.

Top