O‘zini o‘zi band qilganlar 150 mingga yaqinlashdi, ular qaysi sohada ko‘p ekani ma'lum qilindi

Davlat Soliq Qo‘mitasi xabariga ko‘ra, 16 iyul holatiga o‘zini o‘zi band qilgan shaxs sifatida ro‘yxatdan o‘tgan fuqarolar soni 146 234 nafarga yetdi. Yil oxirigacha ularning miqdori 350 ming bo‘lishi kutilmoqda.

Viloyatlar kesimida olib qaraganda, buxoroliklar bu ko‘rsatkich bo‘yicha karvonboshilik qilmoqda – 20 713 nafar. Keyingi o‘rinlarni Namangan viloyati (18 543), Samarqand viloyati (18 366), Toshkent shahri (14 444) va  Farg‘ona viloyati (12 518) egallab turibdi.

O‘zini o‘zi band qilish mumkin bo‘lgan 67ta faoliyat turlari ichida maishiy xizmatlar (sartaroshlik, manikyur, kosmetolog, pedikyur, uyda kir yuvish va dazmollash, kalitlar tayyorlash, poyabzal tikish, ta'mirlash va bo‘yash xizmatlari) ko‘rsatishga eng ko‘p e'tibor qaratilgan. Ro‘yxatdan o‘tganlarning 40 484 nafari yoki 27 foizi shu sohani tanlagan.

Qishloq xo‘jaligi yo‘nalishi bo‘yicha xizmatlar (chorva mollarini o‘tlatish, ularni parvarish qilish, qishloq xo‘jalik o‘simliklarini ekish va parvarish qilishda tomorqa egalariga yordam) ko‘rsatish bo‘yicha 29 690 nafar fuqaro ro‘yxatdan o‘tgan.

Xalq iste'moli mollari ishlab chiqarish va xizmatlar ko‘rsatish (non, uyda pop-korn, muzqaymoq, salatlar, salqin ichimliklar, ayron, go‘ja hamda dehqon bozorlarida qishloq xo‘jaligi mahsulotlarini sotish) xizmati 25 774 nafar shaxs tomonidan tanlangan.

Shuningdek, sanoat yo‘nalishi bo‘yicha xizmatlar (yog‘och me'morchiligi, santexnika xizmati, elektr montaj ishlari, makulatura, plastik idish, temir tersak to‘plash va qo‘shimcha xomashyo to‘plash), ijtimoiy yo‘nalishlar bo‘yicha xizmatlar (uyda repetitorlik qilish, bolalarga qarab turish va ularni parvarish qilish, uy xo‘jaligini yuritish, xonalarni tozalash, xalq tabobati) ko‘rsatish ham aholi orasida ommabop bo‘lib turibdi.

Eslatib o‘tamiz, o‘zini o‘zi band qilgan shaxslarning mehnat faoliyati natijasida olingan daromadlari jismoniy shaxslar jami daromadlari tarkibiga kiritilmaydi.

O‘zini o‘zi band qilganlar safida bo‘lish uchun SOLIQ mobil ilovasi orqali yoki my.soliq.uz portalida ro‘yxatdan o‘tish talab qilinadi. O‘zini o‘zi band qilganlar oyiga 111,5 ming so‘m miqdorida ijtimoiy soliqni to‘lashadi.