Zulhijja oyi avvalgi 10 kunida qilinadigan amallarning fazilatlari

Abu Hurayra roziyallohu anhudan rivoyat qilinadi: Rasululloh sallallohu alayhi vasallam:

“Alloh uchun ibodat qilinishga Zulhijjaning o‘n kunidan sevimliroq kunlar yo‘qdir. Uning har kunlik ro‘zasi bir yillik ro‘zaga, har tundagi ibodat Laylatul qadrdagi ibodatga tengdir”, — deganlar.

Imom Termiziy, Imom Ibn Moja va Imom Bayhaqiy rivoyatlari.

Yuqoridagi muborak hadisi sharif biz hozirda istiqomat qilib turganimiz hijriy-shamsiy yilning 11-oyi bo‘lmish Zulhijja oyining avvalgi o‘n kunligi haqidadir.

Ma'lumot o‘rnida 1441 hijriy-shamsiy yilning Zulhijja oyining 1-10-kunlari 2020 milodiy yilning 22-31 iyul kunlariga to‘g‘ri kelmoqda.

Qolaversa, Alloh taolo Qur'oni Karimda ba'zi narsalar bilan qasam ichgan, mufassirlarning aytishicha, bu qasam ichilgan narsalar Alloh taolo nazdida qadri balandligidan dalolatdir. Xususan, Qur'oni Karimning Fajr surasi 1-2 oyatlarida “Qasamyod etaman tong (vaqti) bilan, «o‘n kecha» bilan”, - deya e'lon qiladi.

Mashhur mufassir Ibn Kasir rahimahulloh suraning ikkinchi oyatidagi “o‘n kecha”ni tafsir qilar ekanlar, ulug‘ sahoba Abdulloh ibn Abbos roziyallohu anhudan rivoyat qilib, bu “o‘n kun”dan murod Zulhijja oyining dastlabki o‘n kunidir, deganlar.

Zulhijja oyining dastlabki o‘n kunining va bu kunlardagi amallarning fazilatlari borasida Imom Buxoriy va boshqa muhaddislarimizdan ko‘plab sahih hadisi shariflar rivoyat qilingan. Jumladan, Payg‘ambarimiz Muhammad sallallohu alayhi vasallam:

“Alloh taolo nazdida biror kun va u (kun)lardagi amal ushbu o‘n kun (va ularda qilingan amal)dan afzal (va) Alloh azza va jallaga suyukli emas. Bas, u (kun)larda tahlil, takbir va Allohga hamdlarni ko‘paytiringlar” (Imom Ahmad rivoyat qilgan).

Tahlil — Laa ilaaha illalloh;  

Takbir — Allohu akbar;

Hamd — Alhamdulillah, deyishlikdir.

Tobeinlardan Said ibn Jubayr rahimahulloh Zulhijjaning o‘n kuni kirganda solih amallar va ibodatga shu darajada kirishib, amal qilganlarki, hatto oxiriga borib qodir bo‘lmay qolganlar. Azizlar, sahobiylar va ularga ergashganlarning amali solih va ibodatlar masalasidagi g‘am-tashvishlari, har bir kunni g‘animat bilishlari shunday bo‘lgan.

Ulamolar bu kundagi afzal amallar va fazilatli ibodatlarni zikr qilishib, ularning ichida quyidagilarni alohida ajratib ko‘rsatishgan:

• Namoz o‘qishni ko‘paytirish, xususan farz namozlarni vaqtida o‘qishning yanada fazilatli bo‘lishi;
• Ro‘za tutish, zero ro‘za afzal solih amallardan biridir. Ammo, Zulhijjaning o‘ninchi kunidan o‘n uchinchi kunigacha, ya'ni to‘rt kun ro‘za tutish haromdir. Shu bois dastlabki to‘qqiz kunda ro‘za tutish fazilatli hisoblanadi;
• Hadisda kelganidek bu kunda Alloh taologa tahlil, takbir va hamdu-sanoni ko‘paytirish. Imom Buxoriydan rivoyat qilinadiki, Ibn Umar va Abu Hurayra roziyallohu anhumolar Zulhijjaning o‘n kunligida bozorga chiqib, takbir aytishardi va musulmonlar ham ularga ergashib takbirni takrorlashardi.
• Arafa kuni ro‘za tutish fazilati. Bu yil taqvimda 30 iyul – payshanba kuniga to‘g‘ri kelmoqda. Zero, bu kundagi ro‘zaning fazilati hadisi sharifda o‘tgan va keyingi bir yildagi kichik xato-kamchiliklarga kafforat bo‘ladi, deb rivoyat qilingan;
• Qurbon hayiti kunidagi qurbonlik qilish fazilati. Moli nisobga yetgan har bir mo‘minga qurbonlik qilish vojibdir. O‘zbekiston Musulmonlari idorasi 2020 yil uchun nisob miqdorini 21 250 000 so‘m qilib belgilagan edi;
• Hayit kunlari qavmu qarindoshlar va yoru do‘stlar o‘zaro xabarlashishi, muhtojlar holidan xabar olishlari hamda bir-birlarini xursand qilishlari fazilati. Bu yilgi Qurbon hayiti kunlari karantin kunlariga to‘g‘ri kelishi munosabati bilan, epidemiologik holatni inobatga olgan holda ushbu qoidalarga qat'iy ravishda rioya qilish muhim hisoblanadi. Bu xususda O‘zbekiston Musulmonlar idorasi Ulamolar kengashining 2020 yilgi Ramazon Hayiti uchun fatvosi ham e'lon qilingandi.
• Xayru ehsonlarni ko‘paytirish fazilati.

Alloh taolo yurtimiz musulmonlariga ham bu yilgi Zulhijja oyining 10 kunligini O‘ziga go‘zal ibodatda o‘tkazishlikni, keyingi yil Ramazon va Qurbon hayiti bayramlarini barcha mo‘min-musulmonlar tan sihatlikda, vabolar daf bo‘lgan holda kengchilikda nishonlashni nasib etsin!

Maqola materiali muslim.uz saytidan olindi.