Imom Moturidiy markazi faoliyatini tashkil etish bo‘yicha hukumat qarori qabul qilinadi

Vazirlar Mahkamasining “O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazi faoliyatini tashkil etish va qo‘llab-quvvatlash chora-tadbirlari to‘g‘risida”gi qarori loyihasi e'lon qilindi. 

Qayd etilishicha, prezidentning “Imom Moturidiy xalqaro ilmiy-tadqiqot markazini tashkil etish chora-tadbirlari to‘g‘risida” 2020 yil 11 avgustdagi PQ–4802-son qaroriga muvofiq O‘zbekiston xalqaro islom akademiyasi huzurida davlat muassasasi shaklidagi Imom Moturidiy xalqaro ilmiy-tadqiqot markazi tashkil etilgan.

Quyidagilar:

O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazining ustavi;

O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazining tuzilmasi tasdiqlanadi.

O‘zbekiston xalqaro islom akademiyasi rektoriga, zarur hollarda O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazi tuzilmasiga xodimlarning umumiy cheklangan soni hamda mehnatga haq to‘lash fondi doirasida o‘zgartirishlar kiritish huquqi beriladi.

Akademiya O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita O‘zbekiston musulmonlari idorasi va O‘zbekiston Fanlar akademiyasi bilan birgalikda bir oy muddatda Markazga yuqori malakali mutaxassislarni jalb etish choralarini ko‘radi.

O‘zbekiston Respublikasi Oliy va o‘rta maxsus ta'lim vazirligi, Madaniyat vazirligi hamda O‘zbekiston Fanlar akademiyasi:

buyuk ajdodlarimizdan qolgan yozma manbalar bo‘yicha maqsadli ilmiy tadqiqotlarni amalga oshirish uchun O‘zbekiston Fanlar akademiyasining Abu Rayhon Beruniy nomidagi Sharqshunoslik instituti, oliy ta'lim muassasalari va muzey fondlarida saqlanayotgan qo‘lyozma hamda toshbosma manbalarning faksimile, foto, skaner nusxalari bilan Markazni bepul ta'minlaydi.

Akademiya, O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita va O‘zbekiston musulmonlari idorasining Akademiya tarkibidagi “Ilmiy tadqiqotlar va innovatsion loyihalar” markazini tugatish va uning mavjud moddiy-texnika bazasini taqsimlash balansiga muvofiq Markaz tasarrufiga o‘tkazish to‘g‘risidagi taklifi ma'qullanadi.

O‘zbekiston Respublikasi Moliya vazirligi:

Akademiyaga xorijiy mehmonlarni kutish va ularga xizmat ko‘rsatish uchun 1 ta yengil avtotransport vositasini saqlash uchun qo‘shimcha limit hamda Markazga 1 ta yengil avtotransport vositasi xarid qilish uchun mablag‘ va uni saqlash uchun limit ajratadi;

Markaz tomonidan taqdim etiladigan ro‘yxatga muvofiq moddiy-texnik baza va infratuzilmani barpo etish uchun zarur bo‘ladigan mablag‘larni ajratadi;

Markazning asoslantirilgan talabiga muvofiq moddiy-texnik baza va infratuzilmani barpo etish, shuningdek ushbu qarorni amalga oshirish bilan bog‘liq xarajatlarni 2020 yilda ijtimoiy soha bo‘yicha tasdiqlangan budjet parametrlari doirasida ajratsin, 2021 yildan boshlab esa O‘zbekiston Respublikasi Davlat budjeti parametrlarida nazarda tutadi.

Markaz Akademiya binosida tekin foydalanish huquqi asosida joylashtirilishi inobatga olinadi.

Markaz ilmiy xodimlariga O‘zbekiston Respublikasi Vazirlar Mahkamasining “Ilmiy xodimlar mehnatini yanada rag‘batlantirish chora-tadbirlari to‘g‘risida” 2009 yil 18 avgustdagi 233-son qarori amal qilinishi tatbiq etiladi.