«Ba'zi qonunlar o‘z vaqtida ayrim shaxslar manfaatiga moslab chiqarilgan» – Senat raisi Yoshlar parlamentida nutq so‘zladi

Unda Oliy Majlis Senati raisi Tanzila Norboyeva, senatorlar va yoshlar masalalari bo‘yicha mas'ul boshqa mas'ul idoralar vakillari ham ishtirok etdi.

Davra suhbati avvalida Tanzila Norboyeva yoshlar parlamentini tuzishdan ko‘zlangan maqsadlar haqida gapirdi.

«Yoshlar parlamenti a'zolari Senatda qabul qilinayotgan barcha qonunlar, ayniqsa, yoshlar masalasiga oid qonunlarga o‘z takliflarini berishi kerak. Yoki, hukumat hozir qanday yangi qonunlar qabul qilishi kerak? Nimalar O‘zbekistonning rivojiga to‘siq bo‘lyapti? Balki biz yoshi kattalar shu jihatlarni ko‘rmayotgandirmiz. Marhamat, barcha o‘z taklifini kiritsin», – dedi u.

Senat raisi O‘zbekistonning amaldagi hukumati oldida turgan qator masalalarni ham sanadi va ularni hal qilishda yoshlarning o‘rni yuqori ekanini ta'kidladi.

«Tan olish kerak, hozir ishlayotgan ayrim qonunlar korrupsiyaga yo‘l ochadi yoki sof raqobatga yo‘l bermaydi. Bu qonun yoki normalar o‘z vaqtida ayrim shaxslarning manfaatlariga moslab ishlab chiqilgani ham haqiqat.

Xalqaro reytinglar, gender tengligi masalalarini oling. Bu ko‘rsatkichlarda o‘rnimizni yaxshilash biz uchun juda muhim. Chunki bu orqali O‘zbekistonga kiradigan investitsiyalar oqimini yaxshilaymiz.

Odam savdosi muammosi ham oldimizdagi katta muammo. Afsuski, bu muammoning qurbonlari juda ko‘p holatda yoshlar va ayollar bo‘lib qolyapti.

Men nega bularni gapiryapman. Bu masalalarda albatta sizning taklif va tashabbuslaringiz biz uchun juda muhim», – dedi Norboyeva.

Tadbir davomida Yoshlar parlamenti a'zolari tomonidan uning ish rejasiga kiritish uchun O‘zbekistonda internet sifatini yaxshilash, BMT qoshidagi tashkilotlar bilan hamkorlikda yoshlar hayotiga oid turli seminarlar o‘tkazish, kitobxonlik targ‘iboti, sport, bandlik, ta'lim va madaniyatni rivojlantirishga oid qator takliflar bildirildi.