Yo‘l harakati qoidalarining buzilishiga doir ma'muriy ishlarni ko‘rib chiqish tartibiga qo‘shimcha kiritiladi

Ichki ishlar vazirining “Yo‘l harakati qoidalarining buzilishiga doir ma'muriy ishlarni ko‘rib chiqish tartibi to‘g‘risidagi yo‘riqnomaning 45-bandiga qo‘shimcha kiritish haqida”gi buyrug‘i loyihasi e'lon qilindi. 

Bildirilishicha, loyiha O‘zbekiston Respublikasining 2020 yil 21 iyuldagi O‘RQ–629-son “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonuniga muvofiq ishlab chiqilgan.

Loyihada O‘zbekiston Respublikasi ichki ishlar vazirining 2011 yil 31 maydagi 68-son buyrug‘i bilan tasdiqlangan Yo‘l harakati qoidalarining buzilishiga doir ma'muriy ishlarni ko‘rib chiqish tartibi to‘g‘risidagi yo‘riqnomaning 45-bandiga qo‘shimcha kiritish nazarda tutilmoqda.

Xususan, mazkur Yo‘riqnomaning 45-bandi tezkor va maxsus xizmatlarning ko‘k yoki qizil yoxud ko‘k va qizil rangli yaltiroq mayoqchani yoqqan holda hamda maxsus tovushli signallar bilan yaqinlashib kelayotgan transport vositalariga ularning to‘siqsiz o‘tib ketishi uchun yo‘l bergan transport vositalari haydovchilari tomonidan sodir etilgan ma'muriy huquqbuzarliklar foto- va videoqayd etishning maxsus avtomatlashtirilgan texnik vositalari orqali qayd etilgan taqdirda, haydovchilarning ma'muriy huquqbuzarligi oxirgi zarurat holatlarda sodir etilgan deb topilishini va ma'muriy ish O‘zbekiston Respublikasi Ma'muriy javobgarlik to‘g‘risidagi kodeksning 271-moddasiga muvofiq tugatilishini nazarda tutuvchi norma bilan to‘ldirilmoqda.

Qayd etilishicha, loyiha Davlat budjetidan qo‘shimcha mablag‘lar ajratilishini talab qilmaydi.

Buyruq loyihasi haydovchilarga yanada qulaylik yaratishga, jumladan, tezkor va maxsus xizmatlarning avtotransport vositalarini yo‘llarda imtiyoz huquqidan foydalangan holda harakatlanishi davomida boshqa harakat qatnashchilarini ularga yo‘l berishi natijasida yuzaga kelishi mumkin qoidabuzarliklarga nisbatan ma'muriy ish yuritishni tugatish orqali fuqarolarning huquq va manfaatlarini himoya qilishga xizmat qiladi, deyiladi hujjatga tushuntirish xatida.