Toshkent viloyati yuqumli kasalliklar shifoxonasi bosh shifokori Guljahon Yo‘ldosheva qariyb bir oydan buyon qamoqda qolmoqda. Jamoatchilikda voqea yuzasidan ko‘plab savollar yuzaga keldi, izohlar yangradi. Bu orada bir narsa ayon bo‘lib qoldi – gap faqat bir shifokor sha'ni va taqdiri haqida ketmayapti. Balki mazkur hodisa ahamiyati xususiy bir holatdan oshib o‘tib, jamiyatimiz yuz tutib turgan bir qancha illatlarni jamoatchilik ko‘z o‘ngida namoyon etgandek.
Holatga sabab bo‘lgan narsa esa shifokor G.Yo‘ldoshevaning Kun.uz saytiga bergan intervyusi, shifoxonasi duchor bo‘lgan muammolarni gapirib bergani bo‘ldi.
Aynan o‘sha intervyu e'lon qilinganidan bir kun o‘tib shoshilinch ravishda jinoyat ishi qo‘zg‘atilgan. Xo‘sh, Guljahon Yo‘ldosheva intervyuda nimalarni aytib bergan edi?
«Men Chirchiq shahrida joylashgan Toshkent viloyati yuqumli kasalliklar shifoxonasining bosh vrachiman. Shifoxonamiz 1960 yilda tashkil topgan. Boshida bu shifoxona Chirchiq shahriga qarashli bo‘lib, 100 ta koykaga mo‘ljallangan bo‘lgan. So‘ngra koykalar soni 80 tagacha qisqartirildi, keyinroq, 2000 yilda Chirchiq shifoxonasi viloyat shifoxonasiga o‘tkazildi. Bu yerdagi reanimatsiya va qabul bo‘limlari ham qisqarib ketdi.
Prezidentning 2017 yil 6 sentyabrdagi qarori bilan men Toshkent viloyat yuqumli kasalliklar shifoxonasining bosh vrachi etib tayinlandim. Kelganimda bu yerda na reanimatsiya, na qabul bo‘limi, na OITV bo‘limi bor edi – faqat o‘tkir ichak infeksiyalari va havo-tomchi infeksiyalari bo‘limi faoliyat ko‘rsatardi.
Bu yerda ish boshlagan davrimda prezidentning bir qator qarorlari chiqdi, ular asosida birinchi galda reanimatsiya bo‘limi tuzilmasini tashkil etdik. Chunki bu muhim edi, og‘ir kasallarni Toshkent viloyati bo‘yicha olib boradigan joy yo‘q edi.
Toshkent viloyat sog‘liqni saqlash boshqarmasiga reanimatsiya bo‘limini qayta jihozlash va uskunalar bilan ta'minlashda moliyaviy yordam so‘rab bir necha bor murojaat qildik, lekin murojaatlarimiz javobsiz qolib ketdi.
Prezident qaroriga ko‘ra tuzilmaga o‘zgartirishlar kiritildi va OITV bo‘limini ochdik, chunki Toshkent viloyatida bittayam OITV bo‘limi yo‘q edi. Avvaliga OITV bo‘limida 10 ta, so‘ngra 20 ta koyka ochildi. Xuddi shuningdek, OITV bo‘limini qayta jihozlash hamda zarur uskunalar uchun mablag‘ so‘rab xat yozdik.
