08:22 / 19.10.2020
49242
Каттақўрғон тумани ҳокими вафот этди

Самарқанд вилояти ва Қўшработ туманининг собиқ ҳокими, сўнгги йилларда Каттақўрғон тумани ҳокими лавозимида ишлаб келган Аъзамхон Баҳромов 60 ёшида вафот этди.

«Бешафқат ўлим халқпарвар ва фидойи инсон, Самарқанд вилояти Каттақўрғон тумани ҳокими Аъзамхон Баҳромовни 60 ёшида орамиздан олиб кетди.

Жанозаси бугун - 2020 йил 19 октябрь куни соат 13:00да Тошкент шаҳри Юнусобод тумани «Уч қаҳрамон» маҳалласида бўлади», дейилади туман ҳокимлиги матбуот хизмати хабарида.

Аъзамхон Баҳромов 1960 йил 12 январда Жиззах вилояти Ғаллаорол туманида туғилган. У 1986 йил Тошкент халқ хўжалиги институтини (ҳозирги Тошкент давлат иқтисодиёт университети) тугатган. 1986-1992 йилларда шу институт ассистенти, аспиранти бўлган. Кейинчалик Тошкент давлат иқтисодиёт университетининг катта ўқитувчиси, доценти, декан ўринбосари вазифасида ишлаган. Шунингдек, Вазирлар Маҳкамаси, турли ҳокимлик, идора ва ташкилотларда масъул лавозимларда фаолият юритган. 

Аъзамхон Баҳромов 2006 йилнинг декабридан 2008 йилнинг апрелигача вилоят ҳокими вазифасини бажарувчи бўлган, сўнг Қўшработ тумани ҳокими (04.09.2017 – 11.11.2017) лавозимида ишлаган, 2017 йил 11 ноябрда Каттақўрғон тумани ҳокими вазифасига тайинланган эди.

Марҳумнинг ўлими сабаби ҳақида аниқ маълум қилинмаган.

  • Маълумот учун, пандемия даврида ҳудудий раҳбарлар орасида бир неча ўлим ҳолатлари қайд этилди. Қорақалпоғистон Республикаси Жўқорғи Кенгеси раиси, сенатор Муса Ерниязов, Бухоро вилояти ҳокими Карим Камалов, бош вазир ўринбосари Ўктам Барноев коронавирус туфайли вафот этган.
  • Июль ойида Қорақалпоғистон Республикаси Қонликўл тумани ҳокими Даулет Толибаев коронавирус қурбони бўлганди. 8 сентябрь куни Қашқадарё вилоятининг Миришкор тумани ҳокими Ғайрат Бегалиев ва унинг ўринбосарларидан бири коронавирус асоратлари оқибатида вафот этди. 
  • Сентябрь ойи бошида Каттақўрғон тумани прокурори Ойбек Хўжаев вафот этганди.
  • 29 сентябрь куни Андижон вилоятидаги Хонобод шаҳри ҳокими Мусахон Мамадалиев вафот этгани маълум бўлди.
  • 7 октябрь куни Наманган вилояти ҳокими ўринбосари Баҳромжон Нурматов ҳамда Андижон вилояти Олтинкўл тумани ҳокими Назиржон Ўринбоев касаллик оқибатида оламдан ўтгани хабар қилинди.
Top