«Lord Bemford». Angliyada yangi yulduz

Ammo bu «Lids»ga xalaqit bermadi, hal qiluvchi qahramon esa Patrik Bemford bo‘ldi.

«Ikkinchi bo‘limda, hisob 0:0 ekanida meni almashtirib yuborishsa kerak, deb o‘yladim», – deya kuldi o‘yindan so‘ng to‘pni esdalik uchun ushlab olgan hujumchi. Bilamizki, odatda het-trik qilgan futbolchilar to‘pni uyga olib ketadilar. Bemford 19 daqiqada raqib darvozasini uch marta aniq nishonga olishga muvaffaq bo‘ldi.

Aslida, Bemford nafaqat ushbu o‘yinda, umuman «Lids» tarkibida zaxira variantiga aylanishga yaqin turgandi. Chempionship yulduzining APLda ham birdek muvaffaqiyat qozonishiga u qadar ishonqiramagan klub «Valensiya»dan Rodrigoni katta summaga sotib ham olgandi. Ammo hozircha, Bemford nafaqat «Lids»da, balki butun ligada ko‘zga ko‘ringan hujumchilardan biri bo‘lib turibdi. «Aston Villa» bilan o‘yindagi gollar esa, bir necha jihatlarda tarixiy bo‘ldi.

• «Lids» 17 yildan beri APLda het-trik ko‘rmagandi – oxirgisi 2003 yilda Mark Viduka tomonidan amalga oshirilgan. To‘g‘ri, bu davrda jamoa APLda o‘ynamagandi ham.
• Bemford «Lids» tarixida safar uchrashuvining bir bo‘limida het-trik qayd etgan ilk futbolchiga aylandi. Hujumchi shuningdek, jamoasidagi ilk het-trigiga erishdi.
• Oxirgi 28 yilda ilk marta, APL debyutanti qatorasiga olti uchrashuvda maydonni golsiz tark etmadi. 1992/93 yilgi mavsumda «Midlsbro» shunday ko‘rsatkich qayd eta olgandi.
• Patrik 6 turdan so‘ng, 6 gol urib, Muhammad Saloh bilan birgalikda to‘purarlar bahsida uchlikni zabt etib turishibdi. Faqat Kelvert-Lyuin va Son Xon Min hisobida ko‘proq gol bor.

Patrik Bemford «Chelsi»ning o‘sha mashhur ijara siyosatining yorqin nomoyondalaridan biridir. U 2012 yilda London klubida paydo bo‘lgan, besh yil davomida olti marta turli klublarda ijarama-ijara yurib, «Chelsi» safida birorta ham o‘yinda maydonga tusha olmagan. Keyinchalik, «Midlsbro»ga borgan, so‘nggi yillarda «Lids Yunayted»da to‘p surib kelmoqda.

Bemfordning ochilishida Marselo Belsaning xizmati katta – hujumchi murabbiyning yoqimtoy shogirdlaridan biri hisoblanadi. O‘tgan mavsumda Bemford 43 o‘yinda asosiy tarkibda tushirildi. Bemfordning eng katta kamchiligi vaziyatlardan unumli foydalana olmaslik edi – mavsum davomida 16 gol urgan futbolchi qulay imkoniyatlardan foydalana olmaslik borasida ham «tengsiz» bo‘lgan. Bemford 34 marta xavfli vaziyatni golga aylantira olmagan – bu boradagi eng yaqin ta'qibchidan 16taga ko‘p. xG jadvalida u yana 12 marta gol urishi lozim edi. Ammo bu yaqqol kamchilik ham Belsaning hujumchi haqidagi ijobiy fikrini o‘zgartirmadi. Premer Ligada hozircha, hammasi boshqacha ketmoqda.

«Men albatta, Belsadan minnatdorman, aynan u birinchi bo‘lib, menda «to‘qqizlik»ni ko‘rgandi. Biz juda yaqin aloqadamiz, hamkorlikda qanday qilib yanada kuchliroq bo‘lishni juda yaxshi bilamiz», deydi Bemford.

Bemford - aksariyat futbolchilar uchun noodatiy muhit va sharoitda ulg‘aygan. U badavlat oilada tug‘ildi, Nottingemdagi qimmat xususiy maktabda tahsil oldi va hatto skripka, fortepiano, saksofon va gitara chala oladi. 8 yoshidan «Nottingem Forest» akademiyasida futbol bilan shug‘ullana boshlaydi, ammo maktabda futbol jamoasi bo‘lmagani uchun, 10-sinfgacha regbi jamoasida fulbek ampluasida o‘ynagan.

Patrik maktabni yaxshi baholarga tugatdi, bitiruv imtihonlarni yuqori ballga topshirdi. Fransuz tili, tarix, biologiya fanlaridan a'lo baho oldi. Shuningdek, ispan va nemis tillarini mukammal biladi. Unga hatto Harvardda sport stipendiati bo‘lishni taklif qilishgan. Buning uchun Bemford biznes fakultetiga hujjat topshirishi kerak edi.

Ammo futbol o‘ynashni tanladi. Hozircha yomon emas.