00:28 / 16.11.2020
2703
Перуда яқинда президент лавозимини эгаллаган Мануэль Мерино истеъфоси талаб этилди

10 ноябрда Перу президенти лавозимини эгаллаган Мануэл Меринонинг истеъфога чиқиши талаб этилмоқда. Бундай талабни мамлакатнинг бир қатор сиёсатчилари, жумладан парламент спикери Луис Валдес қўймоқда. 

Фото: REUTERS / Peruvian Congress

EFE нашрининг хабар беришича, перулик сиёсатчилар мамлакат бўйлаб ўтган норозиликларни куч билан бостириш оқибатида 2 киши ҳалок бўлгандан кейин шундай позицияни эгаллашган. Ушбу вазият эндигина шакллантирилган ўтиш ҳукуматидан бир неча вазирнинг ўз курсисини тарк этишга мажбур қилган. Мамлакатнинг янги бош вазири Антеро Флорес-Араос эса уни тайинлаган президент Мерино билан биргагина истеъфога кетишини айтган.

Таъкидланишича, Мерино азалдан Перуда хушланмайди. У парламент собиқ президент Мартин Вискаррага импичмент эълон қилгандан кейин президент лавозимини эгаллаганди. Вискарра парламент қарорига қаршилик кўрсатмаган ва лавозимини бўшатиб берган. Унинг ўрнини аввал парламент раиси бўлган Мерино эгаллаган. 

Мамлакат аҳолиси конгресснинг ушбу қарорига қарши кўчаларга чиққан. Ўтган ҳафта давомида Перу бўйлаб Вискарра қўллаб-қувватловига  ва Меринога қарши норозиликлар ўтган. Полиция намойишчиларни тарқатиш учун резина ўқлар ва кўзни ёшлатувчи газ қўллаган.

Перу парламенти 9 ноябрда Вискарранинг истеъфосини қўллаб-қувватлаган. Депутатлар уни “ахлоқан лаёқатсиз” деб эълон қилишган. Вискаррага импичмент эълон қилинишига 2011-2014 йилларда Могекуа провинцияси губернатори бўлган вақтида пора олганлиги билан боғлиқ илгари сурилган айблов сабаб бўлган. Вискарранинг ўзи пора олганини рад этмоқда. У мамлакатда айнан коррупцияга қарши кураши сабабли кенг қўллаб-қувватланган.

Top