O‘zbekistonga chetdan olib kirilgan telefonni IMEI ro‘yxatidan qanday o‘tkazish mumkin?

Ro‘yxatdan o‘tkazilmagan telefon 30 kundan keyin mobil aloqa tarmog‘ini topishdan to‘xtaydi. Ro‘yxatdan o‘tkazish tartibi telefonning mamlakatga qanday kelganiga bog‘liq. Agar telefonni o‘zingiz olib kelgan bo‘lsangiz, avval uni bojxonada rasmiylashtirib, keyin IMEI-kodini UzIMEI tizimida ro‘yxatdan o‘tkazasiz. Agar telefon chet eldan yetkazib berish orqali kelgan bo‘lsa, bojxonada rasmiylashtirish bilan yetkazib berish xizmati shug‘ullanadi, siz faqat IMEI-kodni ro‘yxatdan o‘tkazasiz.

Telefon olib kirish

Agar telefonni o‘zingiz olib kirayotgan bo‘lsangiz, bojxonadan o‘tishingiz kerak. Bu bosqichga e’tibor bermaslik ham mumkin, chunki maqola yozilayotgan paytda O‘zbekistondagi mobil aloqaga ulanmagan telefonlar uchun majburiy deklaratsiya to‘ldirish haqida ogohlantirishlar mavjud emas.

IMEI — telefonga bog‘langan 15ta raqamdan iborat unikal kod. Har bir SIM-karta sloti o‘z IMEI-kodiga ega. Agar SIM-kartadan foydalana boshlaganingizdan keyin 30 kun ichida IMEI-kodlarini ro‘yxatdan o‘tkazmasangiz, telefonda mobil aloqa bloklanadi.

IMEI ro‘yxatdan o‘tkazilishi uchun bojxonada rasmiylashtiriluvini tasdiqlovchi hujjat kerak: kirayotganda to‘ldiriladigan deklaratsiya yoki kirgandan keyin olinadigan bojxona kirim orderi. Deklaratsiyani bojxonada Yo'lovchi deklaratsiyasi ilovasida to‘ldirish mumkin. Kirayotganda barcha IMEI-kodlarini ko‘rsatish kerak. Bojxonadan o‘tayotganda umumiy qiymati quyidagi narxga teng bo‘lgan telefonlarni bojxona bojisiz olib kirish mumkin:

• 1000 $ — aeroport orqali, ko‘pi bilan 2 dona telefon.
• 500 $ — temiryo‘l yoki daryo transporti orqali, yarim yilda 1 dona.
• 300 $ — avtomobilda yoki piyoda, yarim yilda 1 dona.

Umumiy qiymat bundan yuqori bo‘lsa, oshgan limitning 30%i miqdorida boj to‘lanadi. Bojxona telefon qiymatini o‘z bazasi bo‘yicha belgilaydi. Qurilma narxi chekka qarab ham belgilanishi mumkin.

Deklaratsiya to‘ldirishdan oldin telefonning IMEI-kodini bilib oling.

Telefon IMEI-kodini qanday bilish mumkin

IMEI-kodini quyidagi yo‘llar orqali bilish mumkin:

• Qurilmada *#06# tering. Ekranda shtrix kodli bir yoki bir nechta IMEI-kodlari paydo bo‘ladi.
• Telefon qutisidan.
• Qurilmaning Sozlamalar bo‘limida Telefon haqida → Batafsil ma’lumot va xususiyatlar → Umumiy ma’lumot orqali.
• Kafolat talonidan.
• Ayrim qurilmalarning akkumulyatori ostidan.

Ba’zan IMEI-kodini ko‘chirib olish imkoni bo‘lmasligi mumkin. Ro‘yxatdan o‘tkazishdan oldin kodlarni yozib oling yoki skrinshot qiling.

Yo'lovchi deklaratsiyasi ilovasida deklaratsiya to‘ldirish

Google Play yoki App Store dan ilovani ko‘chirib oling. Ro‘yxatdan o‘tmasdan ham kirsa bo‘ladi, lekin ilovadan chiqqandan so‘ng ma’lumotlarni yo‘qotish xavfi mavjud. Quyidagi yo‘llar orqali kirish mumkin:

• Telefon raqami orqali
• OneID orqali

«Mobil qurilmani deklaratsiya qilish» yoki «Yangi deklaratsiya»ni tanlang. «Kirish» yo‘nalishini ko‘rsating, qayerdan kirib kelganingizni va siz bilan 16 yoshdan kichik kimdir bor-yo‘qligini belgilang. Olib kelayotgan tovar turlarini tanlang yoki «Yuqorida ko‘rsatilganlardan hech biri yo‘q» variantini tanlang.

Olib kirayotgan valuta va qimmatbaho buyumlarni ko‘rsating. Agar hech nima olib kirmayotgan bo‘lsangiz, «Keyingisi»ni bosing. O‘zbekistonda foydalanmagan mobil qurilmalaringizni har birini alohida qo‘shing.

Telefon brendi, narxi, vazni, sonini ko‘rsating. Qurilma narxini bojxonada bilib olish mumkin yoki cheklar asosida belgilash mumkin.

Shuningdek, IMEI kodlarini kiriting yoki kamera orqali skaner qiling. Skaner qilish uchun shtrix-kodli IMEI’ni ko‘rsating. So‘ng deklaratsiyani yuboring.

Ekranda QR-kod chiqadi, uni bojxonada ko‘rsating va talab qilinsa, bojni to‘lang.

IMEI’ni ro‘yxatdan o‘tkazishning qanday usullari bor?

IMEI kodini quyidagi usullar orqali ro‘yxatdan o‘tkazish mumkin:

• uzimei.uz saytida
• Birda ilovasida
• my.gov ilovasida «IMEI raqamni FaceID orqali ro‘yxatdan o‘tkazish» xizmati orqali
• uzimei.uz ofisida
• Mobiuz, Ucell, Uzmobile ofislarida (faqat mijozlar uchun)

IMEI-kodi faqat bir marta ro‘yxatdan o‘tkaziladi. Qayta ro‘yxatdan o‘tkazish imkoni yo‘q.

IMEI-kodini ro‘yxatdan o‘tkazish narxi qancha?

Ro‘yxatdan o‘tkazish narxi telefondan foydalanilgan muddatga bog‘liq.

• 82 400 sum (BHMning 20%i) —SIM-kartadan birinchi marta foydalanilganidan so‘ng 30 kun ichida.
• 103 000 sum (BHMning 25%i) — SIM-kartadan birinchi marta foydalanilganidan so‘ng 30 kun o‘tgach.

Ro‘yxatdan o‘tkazmasdan 30 kun foydalanilganidan so‘ng telefonda mobil aloqa bloklanadi. Aloqa ro‘yxatdan o‘tkazilgach va qurilma o‘chirib-yoqilganidan keyin tiklanadi.

uzimei.uz saytida IMEI-kodini ro‘yxatdan o‘tkazish

uzimei.uz saytida Mobil qurilmaning IMEI-kodlarini onlayn ro‘yxatdan o‘tkazish grafasiga IMEI kodni kiriting.

Foto5 uzimei saytida IMEI-kodlarini ro‘yxatdan o‘tkazish

Siz kiritgan kod avval tekshiriladi. Ro‘yxatdan o‘tishni davom ettiring. Telefon raqamingiz va tekshiruv kodini kiriting. Keyin tug‘ilgan sanangiz, JShShIR, shaxsni tasdiqlovchi hujjatning seriyasi va raqamini ko‘rsating. Agar ikkinchi IMEI-kodi bo‘lsa, uni ham kiriting. So‘ngra kamera orqali shaxsingizni tasdiqlab, arizani yuboring.

Telefoningizga to‘lov uchun SMS keladi. To‘lovni Click, Payme ilovalarida yoki bankda amalga oshirishingiz mumkin. Agar to‘lovni ilova orqali amalga oshirsangiz, uzimei.uz uchun to‘lovni toping, ariza raqamini kiriting va ko‘rsatilgan summani to‘lang. To‘lovni 10 kun ichida amalga oshirishingiz kerak.

Birda ilovasida IMEI-kodini ro‘yxatdan o‘tkazish

Birda ilovasini o‘rnating va oching. Telefon raqami orqali profilga kiring. IMEI-kodlarini ro‘yxatdan o‘tkazishdan oldin to‘lov uchun bank kartangizni qo‘shing. «Bank kartasini qo‘shish»ni bosing, karta raqami, amal qilish muddatini kiriting va «Qo‘shish»ni bosing. Sizga bank kartasini qo‘shish uchun kodli SMS keladi.

So‘ngra IMEI-kodlarini ro‘yxatdan o‘tkazishni tanlang. Agar telefonning birinchi IMEI-kodini ro‘yxatdan o‘tkazsangiz «Yangi ro‘yxatdan o‘tkazish»ni yoki ikkinchi IMEI-kodini ro‘yxatdan o‘tkazsangiz «Qo‘shimcha ro‘yxatdan o‘tkazish»ni tanlang.

IMEI-kodlarini, JShShIR, tug‘ilgan sana, shaxsni tasdiqlovchi hujjatning seriyasi va raqamini kiriting. So‘ng kamera yordamida shaxsingizni tasdiqlang va to‘lovni amalga oshiring.

my.gov.uz ilovasida IMEI’ni ro‘yxatdan o‘tkazish

my.gov ilovasini o‘rnating va kiring. «IMEI raqamni FaceID orqali ro‘yxatdan o‘tkazish» xizmatini toping. Qurilma IMEI-kodlarini, pasport seriya va raqami, tug‘ilgan sanangiz, telefon raqamini kiriting. So‘ng kamera yordamida shaxsingizni tasdiqlang va to‘lovni amalga oshiring.

IMEI ro‘yxatdan o‘tkazilganini tekshirish

IMEI ro‘yxatdan o‘tkazilganini tekshirishning bir nechta usullari bor:

• *1170# orqali. Til→ IMEIni tekshirish → IMEI-kodini tanlash uchun sonlarni kiriting.
• 1170 raqamiga IMEI kodi yozilgan SMS xabar jo‘natish.
• uzimei.uz saytida. Buning uchun IMEI-kodini ro‘yxatdan o‘tkazish holatini tekshirish grafasiga kodni yozing.

IMEI-kodi ro‘yxatdan o‘tkazilmagan holatda uzimei.uz saytidagi xabar

Har bir kodni tekshiring.

Shuningdek, O‘zbekistonda telefon sotib olishdan oldin ro‘yxatdan o‘tkazilganligini albatta tekshiring. Barcha IMEI-kodlari ro‘yxatdan o‘tkazilgan bo‘lishi shart. Ro‘yxatdan o‘tkazilmagan telefonda mahalliy SIM-kartadan foydalanish imkoni bo‘lmaydi.

Yetkazib berish xizmati orqali xorijdan kelgan telefonni qanday rasmiylashtirish mumkin?

Agar telefonni xorijdan kuriyer yoki pochta orqali olgan bo‘lsangiz, bojxona rasmiylashtiruvi bilan yetkazib berish xizmati shug‘ullanadi. Siz IMEI-kodlarini ro‘yxatdan o‘tkazishingiz kerak. Jo‘natmalarni bojxona to‘lovisiz olish uchun limit mavjud. Bir oyda olish mumkin bo‘lgan tovarlar qiymati:

• 200 $ — xalqaro kuriyerlik jo‘natmalari
• 100 $ — xalqaro pochta jo‘natmalari

Bundan ortiq bo‘lganda boj to‘lanadi — limitdan oshgan summaning 30%i miqdorida.

IMEI-kodlarini Uzimei ofisida ro‘yxatdan o‘tkazishingiz mumkin. Sizga quyidagilar kerak bo‘ladi:

• qurilma solingan konvert (marka, pochta identifikatori shtrix-kodi bilan)
• shaxsni tasdiqlovchi hujjat
• qurilmaning o‘zi

Xulosa

• Keyin o‘zingiz ro‘yxatdan o‘tkazib yurmasligingiz uchun O‘zbekistonda IMEI-kodlari ro‘yxatdan o‘tkazilmagan qurilmalarni sotib olmang. 
• Telefonni o‘zingiz olib kirsangiz, 2 bosqichdan o‘tasiz: telefon bojxonada rasmiylashtiriladi va IMEI-kodlari ro‘yxatdan o‘tkaziladi.
• O‘zbekistonda mobil aloqadan foydalanish uchun telefon IMEI-kodi ro‘yxatdan o‘tkazilishi lozim.
• Telefonni bojxonada rasmiylashtirmasdan va boj to‘lamasdan IMEI-kodlarni ro‘yxatdan o‘tkazib bo‘lmaydi.
• Agar telefonni o‘zingiz olib kirsangiz, bojxonada rasmiylashtirish va SIM-kartadan foydalana boshlagach 30 kun ichida IMEI-kodini ro‘yxatdan o‘tkazish arzonroq tushadi.
• O‘zbekistonga kirishda telefonni rasmiylashtirmagan bo‘lsangiz, uni rasmiylashtirish uchun bojxona kirim orderi olish va boj to‘lash lozim.
• IMEI-kodi ro‘yxatdan o‘tkazilmagan taqdirda mobil aloqa bloklanadi va ro‘yxatdan o‘tkazilganidan keyin blokdan ochiladi.