Aziz Abduhakimov Ispaniyada UNWTO bosh kotibi bilan uchrashdi. Toshkent viloyatida global investitsiya forumi o‘tkaziladi

Turizm qo‘mitasi xabariga ko‘ra, Aziz Abduhakimov Butunjahon turizm tashkiloti (UNWTO) bosh kotibi Zurab Pololikashvili bilan uchrashdi. Aziz Abduhakimov uchrashuv doirasida UNWTO bosh assambleyasi XXV sessiyasini 2023 yilda Samarqand shahrida o‘tkazish uchun O‘zbekiston tayyor ekanligini ta'kidlab o‘tdi.

UNWTO bosh kotibi Zurab Pololikashvili O‘zbekistonning turizmni bolalikdan boshlashga doir tashabbusini yuqori baholab, ushbu tashabbusni butun dunyo mamlakatlari maktablarida alohida fan sifatida kiritish va sohaga oid darslik yaratishga turtki bo‘lishini ta'kidladi.

"Turizmni rivojlantirishni bolalardan boshlash bo‘yicha O‘zbekiston tajribasi UNWTO hamkorligida butun dunyo mamlakatlarining boshlang‘ich maktablari uchun alohida fan joriy qilish va darslik yaratishga turtki bo‘ladi. Bu fanni Osiyoda ilk bor O‘zbekiston maktablarida sinovdan o‘tkazishni taklif qilaman", - dedi Pololikashvili.

Shuningdek, Aziz Abduhakimov UNWTO bosh kotibi Zurab Pololikashvili bilan Toshkent viloyatida global investitsiya forumini o‘tkazish bo‘yicha kelishuvga erishdi.

Tomonlar 2021 yilning iyun oyida (jahondagi sanitar-epidemiologik vaziyatdan kelib chiqib) Toshkent viloyatining Bo‘stonliq tumanida UNWTO shafeligi ostida global investitsiya forumi o‘tkazilishiga doir kelishuvga erishishdi. Zurab Pololikashvili UNWTO Italiya bilan hamkorlikda Birinchi bolalar turizmi forumini tashkil qilishni rejalashtirayotganini ma'lum qilib, uning doirasida O‘zbekistonning yosh sayyohlarni tarbiyalashdagi tajribasi taqdimotini o‘tkazishni taklif qildi. Shu bilan birga, 2022 yilda ikkinchi shunday forumni O‘zbekistonda o‘tkazish imkonini ko‘rib chiqish so‘raldi.

Bundan tashqari, bosh vazir o‘rinbosari Aziz Abduhakimov boshchiligidagi O‘zbekiston delegatsiyasi UNWTO’ning "Global turizm inqirozi bo‘yicha qo‘mitasi" yig‘ilishida ishtirok etdi. Kun tartibidagi asosiy masalalardan biri COVID-19 vaksinalarining turizmni tiklashga doir muvofiqlashtirilgan yondashuviga bag‘ishlandi. UNWTO o‘z tarkibidagi qo‘mita a'zolarining turizm sohasi va sayohatlarga bo‘lgan ishonchni tiklash bo‘yicha global kampaniya uchun kuchlarni birlashtirishga chaqirdi.