Moʻgʻuliston prezidenti Uxnaagiyn Xurelsux Ulan-Bator shahrida oʻtkazilayotgan COP17 konferensiyasi doirasida Oʻzbekiston milliy pavilyoniga tashrif buyurdi. Unga Oʻzbekiston prezidentining ekologiya masalalari boʻyicha maslahatchisi - Ekologiya va iqlim oʻzgarishi milliy qoʻmitasi raisi Aziz Abduhakimov hamrohlik qildi.
Tashrif davomida Moʻgʻuliston prezidentiga Oʻzbekistonda ekologiya sohasida amalga oshirilayotgan islohotlar haqida maʼlumot berildi. Shuningdek, atrof-muhitni muhofaza qilish, iqlim oʻzgarishi hamda ikki mamlakat oʻrtasidagi hamkorlikni yanada rivojlantirish masalalari yuzasidan fikr almashildi.
Uxnaagiyn Xurelsux Oʻzbekiston tomonidan ilgari surilayotgan tashabbuslar, ekologik muammolarni hal qilish borasida qilinayotgan ishlarga yuqori baho berdi. Qolaversa, ekologik va iqlim muammolarini hal etishda ikki tomonlama hamkorlikni yanada mustahkamlashga tayyor ekanini qayd etgan.
