Chadni 1990 yildan buyon boshqarib kelgan prezident Idris Debi Itno isyonchilarga qarshi jang vaqtida olgan tan jarohati tufayli 68 yoshida vafot etdi. Bu haqda Associated Press Chad armiyasi vakilining davlat televideniyesida bergan bayonotiga asoslangan holda xabar tarqatdi.
Le Figaro gazetasining yozishicha, uning o‘limi haqida mamlakat qurolli kuchlari rasmiy vakili Azem Bermandoa Aguna ma'lum qilgan. Uning so‘zlariga ko‘ra, prezident «mamlakat hududiy yaxlitligini himoya qilish uchun jonini bergan».
AFP nashrining yozishicha, yakshanba kuni prezident Liviya tomondan bostirib kirgan ayirmachilarga qarshi harbiy harakatlarda armiyaga boshchilik qilgandi. Shimoldan hujum 11 aprel kuni, Chad prezidentligi saylovlari bo‘lib o‘tgan kunda boshlangandi. Isyonchilar mamlakat ichkarisi tomon yuzlab kilometr masofaga kirib kelib, poytaxt Ndjamenaga yaqinlashgach, Debi armiyaga qo‘shilgandi.
Markaziy saylov komissiyasi Idris Debi oltinchi marta prezidentlikka saylangani haqida e'lon qilishidan bir necha soat o‘tib harbiylar uning vafoti haqida ma'lum qilishdi. Saylovlarda uni saylovchilarning 79 foizdan ortig‘i qo‘llab-quvvatlagani ma'lum bo‘lgan. Bu g‘alaba unga yana olti yil davomida hokimiyatda qolish imkonini bergan bo‘lardi.
Keyingi 18 oy mobaynida mamlakatni boshqarib turadigan o‘tish davri kengashiga Idris Debining 37 yoshli o‘g‘li Maxamat rahbarlik qiladi.
- Idris Debi Itno — Afrikadagi eng uzoq vaqt davomida rahbarlik qilib kelayotgan davlat rahbarlaridan edi. U 1990 yil dekabrida davlat to‘ntarishi orqali hokimiyatga kelgandi. Uning boshqaruvi davrida muxolifat prezidentni qatag‘onlarda ayblagan. Reuters agentligi xabariga ko‘ra, 2018 yilda Debi konstitutsion islohot o‘tkazgan, bu o‘zgartirishlar unga hokimiyatda 2033 yilga qadar bo‘lish imkonini berardi. G‘arb davlatlari, shu jumladan, Fransiya Debini mintaqadagi radikal ekstremistik kuchlarga qarshi kurashdagi ittifoqchi sifatida bilardi.
